Read lunyore YOSHWA 14 Bible Online

YOSHWA 14 - lunyore bible

YOSHWA 14

¹Kano nako namang'ana akamanyianga obwe liloba lia Kanaani elili emasaba wa Yorodani liakabulwa mubandu ba Isiraeli. Omwesaalisi Eliasa, Yoshwa omusiani wa Nuni, nende abakhulundu abomutsinyumba tsietsinzibulo tsia Isiraeli balikabula mubandu.

²Singa OMWAMI yali niyalaka Musa, tsisoma tsietsinzibulo tsirano natsine nende enusu etsili emasaba wa Yorodani tsiakabulwa khulwo okhukhupilwa imbulu.

³Musa yali namal'le okhukabula liloba liebukwe wa Yorodani khutsinzibulo tsibili nende enusu. (Nebutswa siyali niyakabul'lakhwo Abalawi esitonye siomukabwa tawe.

⁴Abetsukhulu ba Yosefu bakabulwa mutsinzibulo tsibili: Manase nende Efuraimu.) Abalawi sibakabul'lwakhwo esitonye siomukabwa tawe. Mubukono yibwo banyoola amatookho akokhumenyamwo, nende ebikuuri biokhwayamwo tsing'ombe tsiabwe nende amakondi.

⁵Abandu ba Isiraeli bakabula liloba singa obwo MWAMI yali niyalaka Musa.

⁶Litukhu lindi abandu bandi okhurula mulwibulo lwa Yuda betsa Giligali aha Yoshwa yali nali. Mulala khubo, Kalebu omusiani wa Yefune Omukeni yamubool'la mbu, “Umanyile ako MWAMI yabool'la Musa omundu wa Nyasaye khumang'ana kaako nende akanje olwa yali nali Kadeshi Barinea.

⁷Ndali owemihika amakhumi kane olwa Musa omurumikhili wo MWAMI yali okhuuruma okhurula Kadeshi Barinea okhulambuula esibala yisi masilisi. Ndali okhuleera amakalusio katooto khuye.

⁸Abandu bandatsia n'nabo, kata mbwo, bachila abandu befwe nibaria. Mubusubilwa ndali okhumuhulila OMWAMI Nyasaye wanje.

⁹Khulwa akene yako, Musa yali okhundaka mbu abaana banje halala n'nase khwakhahebwe liloba elia ndachendakhwo lilabe omukabwa kwefwe.

¹⁰Ne luno noluhono lwemihika amakhumi kane nachirano okhurula OMWAMI nabool'la Musa akene yaka. Olwene yilwo nilwo olwa Isiraeli bali nibabir'ranga musitsiimi. Ne OMWAMI singa yasubisia, waininda okhurula olwene yilwo. Menga olole! Ndi owemihika amakhumi munane nachirano

¹¹ne sili butswa netsingufu luno singa obwa ndali olwa Musa yali okhuuruma. Sili butswa netsingufu etsihela okhulwana lihe nohomba okhukhola esindu sindi siosi.

¹²Kho luno mbelesia liloba liokhusikulu sio MWAMI yaasubisia khwitukhu yilio olwabandu banje halala n'nase khwahana amakalusio. Khwali okhukhubool'la olwene yilwo mbu olwibulo lwabalika abalangwanga mbu Anakimu bali ebwene iyio mumatookho akombokhelwa amasisi amakali. Haundi OMWAMI nabe n'nase, ma nambakhungemwo singa OMWAMI yaboola.”

¹³Yoshwa yalaamila Kalebu omusiani wa Yefune tsikhabi ma namuhelesia litookho lia Heburoni okhuba omukabwa kukwe.

¹⁴Heburoni lisili butswa eliabetsukhulu ba Kalebu omusiani wa Yefune omukeni, sichila yalonda amalako ko OMWAMI Nyasaye wa Isiraeli mubusubilwa.

¹⁵Olwokhuranga Heburoni lialangwanga litookho lia Aruba. (Aruba lialinji litookho lia Banakimu likali okhusila.) Luno omulembe kwaliho musibala.