Read lunyore YOSHWA 15 Bible Online

YOSHWA 15 - lunyore bible

YOSHWA 15

¹Tsinyumba etsiabolwibulo lwa Yuda banyoola esitonye siesibala mubulondokhani singa mbu: Liloba liola enandete okhurula khulwakho lwa Edomu okhwola khusitsimi sia Sini.

²Olwakho lwe enandete yilu lwatsia okhurula khundulo khwenandete we Inyanza Yechumbi,

³ne lwatsia enandete okhurula khu Lung'anyi lwa Akirabimu ma nilwola Sini. Lwatsia enandete wa Kadeshi Barinea, nilubir'ra Hesironi ma nilutsia Atari, nilukotola okhutsia Karika.

⁴Lwatsilil'la okhwola Asimoni, ma nilulonda omuchela khulwakho lwe Misiri okhwola khunyanza ya Mediterenia aholwakho lwahwela. Yilwo lwali olwakho lwenandete lweliloba lia Yuda.

⁵Olwakho lwebukwe lwarula khu Inyanza yechumbi, okhutsia okhwola mubwinjil'lo ahomuchela kwa Yorodani kusundul'langa mwo amaatsi. Olwakho lwesinyolu lwachiakilaho,

⁶ne lwatsilil'la okhwola Betsi Hokila, ma nilutsia ahebikongomo biakan'nanga ahembi nende mwibanda lia Yorodani. Ma nilutsia okhwola khwichina lia Bohani (Bohani yali omusiani wa Rubeni).

⁷Okhurula khwibanda lia Akori okhwola Debiri, ma nilukotola okhutsia esinyolu niluhenga Giligali, niluchomele khulung'anyi Adumimu luli khulubeka lwenandete welibanda. Ma lwatsilil'la okhutsia khubitaho bia Enishemeshi, okhutsia khu Enirogeli,

⁸ma nilubir'ra mwibanda lia Hinomu elili enandete wesikulu sielitookho lia Bayebusi elilangwanga Yerusalemu liali nilili. Olwakho lwamala nilutsilil'la okhwola ikulu wesikulu elubeka lwemasaba welibanda lia Hinomu, ahelibanda lia Refaimu lihwel'langa khulubeka lwe esinyolu.

⁹Okhurula yaho lwatsia khubitaho bia Nefitoa ma nilutsia mumatookho akali ahembi nende esikulu sia Efuroni Ebweneiyo lwamala nilukotola niluhengele Baala (nohomba Kiriatsi Yearimu),

¹⁰aha lwamala nilubotokhana emasaba wa Baala okhutsia khusibala siokhusikulu esia Seiri, nilutsilil'la okhutsia elubeka lwesinyolu olwe esikulu sia Yearimu (nohomba Chesaloni), okhuselengera okhutsia Betsi Shemeshi, ma nilubir'ra Timina.

¹¹Olwakho lwatsilil'la okhutsia khusikulu esili esinyolu wa Ekironi, nilukotola okhutsia Shikenoni, nilubir'ra khusikulu sia Baala, ma nilutsilil'la okhutsia Yaminia. Lwahwela khunyanza ya Mediterenia,

¹²eyamala nelomba olwakho lwemasaba. Mwiloba eliabotokhanwa netsinzakho yitsi abandu betsinyumba tsia Yuda bamenyangamwo.

¹³Singa obwo MWAMI yalaka Yoshwa, esitonye silala khwiloba lia Yuda siahanwa khu Kalebu omusiani wa Yefune, okhurula mulwibulo lwa Yuda. Yanyoola Heburoni litookho lialinji elia Aruba, samwana Anaki.

¹⁴Kalebu yakhunga abetsukhulu ba Anaki okhurula mwitookho yilio. Nabo bali abebilibwa bia Sheshai, Ahimani, nende Talimai.

¹⁵Okhurula yaho yatsia okhuseera abandu abamenyanga mu Debiri: (Litookho yili lialangwanga Kiriatsi Seferi.)

¹⁶Kalebu naboola mbu, “Nambane omukhaana wanje olangwa Akisa ateesibwe nomundu owanonyale okhuleka litookho lia Kiriatsi Seferi.”

¹⁷Otsinieli, omusiani wamwabo Kalebu omuti owalangwa Kenasi, yamala aleke litookho yilio. Kho Kalebu namuhelesia omukhaanawe Akisa amuteesie.

¹⁸Mwitukhu lies'selelo Otsinieli yahomba omukhaana uyo okhusaba samwana omukunda. Yamala niyekha okhurula khusikhiliye, ma Kalebu namureeba esia yenyanga.

¹⁹Yakalusia naboola, “Runanga umbekhwo ebitaho biamaatsi. Omukunda kwawambelesia kuli musibala esiomu.” Kho Kalebu yamuhelesia ebitaho ebili emukulu nende ebiemwalo.

²⁰Yili nilio liloba elia abetsinyumba tsiolwibulo lwa Yuda banyoola singa eliabwe.

²¹Amatookho akahengele enandete akalinji akabwe, yako akalinji ahembi nolwakho lwa Edomu kali Kabuseli, Eteri, Yakuri,

²²Kina, Dimona, Atata,

²³Keteshi, Hasori, Itsinani,

²⁴Sifu, Telemu, Bealoti,

²⁵Hasori Hatata, Keriotsi Hesironi (nohomba Hasori),

²⁶Amamu, Shema, Molata,

²⁷Hasari Kata, Heshimoni, Betsipeleti,

²⁸Hasari Shuali, Berisheba, Bisiotsia,

²⁹Baala, Limu Esemu,

³⁰Elitolati, Kesili, Horima,

³¹Sikilaki, Matimana, Sanisana,

³²Lebaotsi, Shilihimu, Aini nende Rimoni: Kosi halala kali amatookho amakhumi kabili nende karano nakane nikalimwo amataala akakabotokhana.

³³Amatookho akali hasi wesikulu kali Eshitaoli, Sora, Ashina,

³⁴Sanoa, Enganimu, Tapua, Enamu,

³⁵Yarimutsi, Atulamu, Soko, Aseka,

³⁶Shaaraimu, Ketera, Aditsaimu nende Keterotaimu. Kosi kali amatookho likhumi nakane nende amataala akakabotokhana.

³⁷Kaliho khandi Senani, Hatasha, Mikitalikadi,

³⁸Tileani, Misipa, Yokitseli,

³⁹Lakishi, Bosikatsi, Ekiloni,

⁴⁰Kaboni, Lamamu, Kitilishi,

⁴¹Kederotsi, Betsidagoni, Naama, nende Maketa. Kosi halala kali amatookho likhumi na kasasaba nende amataala matititi akakabotokhana.

⁴²Kaliho khandi Libuna, Etsari, Ashani,

⁴³Ifita, Ashina, Nesibu.

⁴⁴Keila, Akishibi, nende Maresha. Kosi kali amatookho karano nakane nende amataala matititi akakabotokhana.

⁴⁵Ekironi lialiyo nende amatookho kalio amatititi nende amataala,

⁴⁶halala nende amatookho kosi amakali nende matititi akali ahembi na Ashitoti, okhurula Ekironi okhutsia khunyanza ya Mediterenia.

⁴⁷Ashitoti nende Kasa nende amatookho kaako amatititi nende amataala. Nako kali okhwola khumuchela khulwakho lwe Misiri nende khundulo khweinyanza ya Mediterenia.

⁴⁸Musibala siomubikulu kaliho Shamiri, Tatsiri, Soko,

⁴⁹Tana, Kiriatsi Seferi (nohomba Tebiri),

⁵⁰Anabu, Eshitemoa, Animu,

⁵¹Gosheni, Holoni nende Kilo. Kosi kali amatookho likhumi nelala, nende amatookho matititi akakabotokhana.

⁵²Kaliho Arabu, Tuma, Eshani,

⁵³Yanimu, Betsi Tapua, Afeka,

⁵⁴Humuta, Heburoni, nende Siori: kosi kali amatookho karano nakane halala namataala matititi akakobotokhana.

⁵⁵Khandi kaliho Moani, Karimeli, Sifu, Yuta,

⁵⁶Yesereli, Yokideamu, Sanoa,

⁵⁷Kaini, Gibea nende Timina. Kosi kali amatookho likhumi halala namataala matititi akakabotokhana.

⁵⁸Khandi kaliho Halihuli, Betsusuri, Kedori,

⁵⁹Maaratsi, Betsanotsi, nende Elitekoni namatookho kasasaba, halala namatookho matititi nikakabotokhana.

⁶⁰Khandi Kaliho Kiriatsi Baali (nohomba Kiriatsi Yearimu) nende Rabba, amatookho kabili halala namatookho matititi akakabotokhana.

⁶¹Ne musitsiimi namwo kalimwo Betsi Arabba, Mitini, Sekaka,

⁶²Nibushani, litookho liechumbi nende Engedi. Kosi kali amatookho kasasaba halala nende amatookho matititi akakabotokhana.

⁶³Abandu bolwibulo lwa Yuda sibaali abanyala okhukhunga Abayebusi abali nibamenya mu Yerusalemu tawe. Abayebusi basitsilil'la okhumenyayo halala nabandu ba Yuda.