Read lunyore YOSHWA 17 Bible Online

YOSHWA 17 - lunyore bible

YOSHWA 17

¹Esitonye sieliloba elili emasaba wa Yorodani siahanwa khutsinyumba tsindala etsiolwibulo lwa Manase omusiani wa Yosefu owokhuranga. Makiri samwana Gileadi yali omusiani wa Manase omukhulundu khandi omulwani welihe, kho ebibala bia Gileadi nende Bashani, ebili ebukwe wa Yorodani biali okhuhanwa khuye.

²Liloba eliali emasaba wa Yorodani liahanwa khubetsinyumba tsia Manase tsindi tsiosi. Nabo bali: Abieseri, Heleki, Asieieli, Shekemu, Heferi nende Shemita. Yaba bali abasaatsa mubolwibulo lwa Manase omwana wa Yosefu, ne balinji abemeli abetsinyumba tsiabwe.

³Selofehadi omusiani wa Heferi owali omusiani wa Gileadi, omusiani wa Makiri, omusiani wa Manase siyalikhwo nomusiani wosi tawe nebutswa abakhaana bonyene. Amera kabwe kali Mahila, Noa, Hokila, Milika, nende Tirisa.

⁴Batsia khu Eliasa omwesaalisi nende khu Yoshwa omwana wa Nuni nende khubemeli, ma nibaboola mbu, “OMWAMI yalaka Musa okhukhuha ifwe nende abekho befwe bes'saatsa, esitonye sie mbu khumenye mwo.” Kho, singa OMWAMI yali nalakile baheebwa liloba nibalondana nende abekho babwe abes'saatsa.

⁵Niko akachila Manase nanyoola emikabwa likhumi okhumeeta khu Gileadi nende Bashani akali ebukwe wa Yorodani,

⁶sichila abolwibulo lulwe abesikhasi kata abes'saatsa bali okhuhebwa esibala. Esibala sia Gileadi siahebwa abolwibulo lwa Manase lundi lwosi.

⁷Olusoma lwa Manase lwali okhurula Asheri okhwola Mikimetsatsi, ebukwe wa Shekemu. Olwakho lwalwo lwatsia enandete okhwinjisiamwo abandu ba Entapua.

⁸Esibala esili ahembi Tapua siali esia Manase, nebutswa litookho lia Tapua eliokhulwakho, liali elia bolwibulo lwa Efuraimu.

⁹Kho olwakho lwamala nilutsia emwalo khumuchela kwa Kana. Litookho eliali enandete womuchela liali elia Efuraimu kata nikali bali mulusoma lwa Manase.

¹⁰Abolwibulo lwa Efuraimu bali enandete, ne Abolwibulo lwa Manase nibaba esinyolu, ne inyanza ya Mediterenia neba singa olwakho lwabwe olwemasaba. Asheri yali esinyolu - emasaba, ne Isakari naba wesinyolu ebukwe.

¹¹Mutsisoma tsia Isakari nende Asheri; Manase yabukula Betsi Shani nende Ibileamu halala nende amatookho matititi akababotokhana, kata khandi Tori (eliali khuluchugo lweinyanza) Endori, Taanaki, Mehioto nende amataala akakabotokhana.

¹²Abandu ba Manase, sibali abanyala okhukhunga abandu abamenyanga mumatookho yako tawe, kho Abakanaani batsilil'la okhumenyamwo.

¹³Kata olwa Baisiraeli bamala nibaba abakufu sibahinia Abakanaani bosi musibala tawe, nebutswa babahachia okhubatiyila.

¹⁴Abolwibulo lwa Yosefu babool'la Yoshwa mbu, “Busina nokhuhelesia butswa esitonye silala esieliloba mbu sibe omukabwa kwefwe abene? Khuli abenji okhusila sichila Nyasaye wakhulamila tsikhabi.”

¹⁵Yoshwa nakalusia naboola mbu, “Nikaba muli abenji okhusila ne esibala siokhusikulu esia Efuraimu nesitititi okhusila khwinywe, kho tsie m'mutsuru muremule mwelombele abene liloba musibala sia Abaperisi nende Abarefaimu.”

¹⁶Bakalusia nibaboola, “Liloba liokhusikulu silili likali okhukhuhela tawe, nebutswa Abakanaani abomusipaapi bali nende amakaari kabwe akalombwa khusibia, yabo abamenyanga mu Betsi Shani nende amataala akababotokhan'ne nende yabo abamenyele mwibanda lia Yesereli.”

¹⁷Yoshwa nabool'la abetsinzibulo tsia Efuraimu nende Manase mbu, “Tooto muli abenji, ma muli netsingufu okhusila. Namunyoole omukabwa okuyomba mulala.

¹⁸Liloba liokhusikulu nalibe elienywe. Nekata nikuba nikuli nomutsuru, namukuremule ma namukubukule okhurula olubeka l'lala okhwola olubeka lundi. Nebutswa namubakhunge Abakanaani okhurulamwo, kata nikali bali namakaari kebibia ma khandi nabandu betsingufu.”