Read lunyore YOSHWA 18 Bible Online

YOSHWA 18 - lunyore bible

YOSHWA 18

¹Olwabali nibamal'le okhuleka abandu besibala yisio, amukanda kwosi kwa Baisiraeli kwebunjelesia halala mwitookho lia Shilo ma nikwombokha liheema liokhubaho khwo MWAMI.

²Bali nibasiliho abandu ba Isiraeli abetsinzibulo tsine natsitaru abali nibasili okhuhebwa omukabwa kwabwe okweliloba.

³Ma Yoshwa nareeba abandu ba Isiraeli mbu, “Namulinde khulwo luhono sina nimusili okhutsia okhubukula esibala esio MWAMI Nyasaye wabakuka benywe amuheye?

⁴Mbelesie abandu bataru okhurula mubuli olwibulo. Nambarume okhutsia okhulambuula nende okhusena liloba elia bakhenya okhumenyamwo singa esiabwe. Ma bakalukhe ahandi.

⁵Liloba nalikabulwe mubo mubitonye bine nabitaru. Olwibulo lwa Yuda lwakhabe mulusoma lwalwo oluli enandete, ne olwibulo lwa Yosefu mulusoma lwalwo oluli esinyolu.

⁶Bahandiike amang'ana kokhwinosia emikabwa chine nachitaru yichi ma bander're. Namukhupile imbulu okhureeba OMWAMI Nyasaye wefwe khulwe inywe.

⁷Kata Abalawi sinabanyoolekhwo omukabwa kweliloba singa abandi khwinywe tawe sichila omukabwa kwabwe nokhurumikha singa abesaalisi bo MWAMI. Ne akatooto kali mbu tsinzibulo tsia Kadi, Rubeni, nende enusu yolwibulo lwa Manase lwamala okhunyoola liloba liabwe elili ebukwe wa Yorodani, elia Musa omurumikhili wo MWAMI yali niyabahelesia.”

⁸Abandu yabo barula nibatsia injila yabwe okhusena liloba olwa Yoshwa yali namal'le okhubahelesia amalako kano mbu: “Tsie khwiloba liosi mulisene, ma mukalukhe khu ise. Ma hano mwitookho lia Shilo nase nareebe OMWAMI khulwe inywe khulwo okhukhupa imbulu.”

⁹Kho abandu basalaana mwiloba yilio nibara mubuhandike singa obwabasikabula mubitonye bine nabitaru, nibahandikanga amera kamataala hasi. Bamala nibakalukha Shilo aha Yoshwa yali nali mukambi.

¹⁰Yoshwa yakhupa imbulu okhureeba OMWAMI khulwabo, ma nahaana esitonye sieliloba khu siolwibulo lwabandu ba Isiraeli khutsinzibuloetsiali nitsisikaye.

¹¹Olusoma olwali olwa betsinyumba tsiolwibulo lwa Benjameni lwali olwokhuranga okhuhanwa. Liloba liabwe liali hakari holwibulo lwa Yuda nende olwibulo lwa Yosefu.

¹²Khulubeka lwesinyolu olwakho lwabwe lwachiachila khu Yorodani ma lwamala nilutsia okhwola khusikongomo esili esinyolu wa Yeriko ma niluhenga emasaba okhubir'ra musibala siokhusikulu okhutsia okhwola musitsiimi sia Betsaweni.

¹³Khe olwakho lwatsia okhwola khusikongomo esili enandete wa Lusi (khandi esilangwanga mbu Betseli) ma okhuselengera okhutsia Alarotsi Adari, khusikulu esili enandete wemwalo wa Betsi Horoni.

¹⁴Olwakho lwamala niluhenga olubeka lundi, nilukotolanga enandete okhurula emasaba wesikulu yisi khandi okhutsia Kiriatsi Baali (nohomba Kiriatsi Yearimu), esili esiolwibulo lwa Yuda: Yilwo lwali olwakho lwemasaba.

¹⁵Olwakho lwenandete lwachiachila khundulo khwa Kiriatsi Yearimu ma nilutsia khumichela chia Nefutoa.

¹⁶Ma lwamala nilutsia emwalo hasi wesikulu esihengele mwibanda lia Hinomu, elili esinyolu woluchinga lwelibanda lia Refaimu. Lwamala nilutsia enandete okhubir'ra mwibanda lia Hinomu, elili enandete wesikulu sia Yebusi niluhengele Enirogeli.

¹⁷Lwamala nilusukhana okhuhenga esinyolu okhwola Enishemeshi ma nilutsia Kelitotsi, ehengan'ne nende olung'anyi lwa Atumimu. Olwakho lwamala nilutsia emwalo okhwola khwichina lia Bohani (Bohani yali omusiani wa Rubeni)

¹⁸ma nilubir'ra esinyolu khusikulu esihenganga khwibanda lia Yorodani. Lwamala nilutsia emwalo mwibanda,

¹⁹nilubir'ranga esinyolu wesikulu sia Betsi Hokila, ma niluhwela esinyolu aha lwinjil'langa khunyanza yechumbi, aha omuchela kwa Yorodani kwinjil'langa munyanza imwo. Yilu lwali olwakho lwenandete.

²⁰Omuchela kwa Yorodani kwali olwakho lwebukwe. Yitsi tsialinji tsinzakho etsieliloba elietsinyumba tsiolwibulo lwa Benjameni tsiahebwa singa omukabwa kwabwe.

²¹Amatookho akali akabetsinyumba tsiolwibulo lwa Benjameni kali Yeriko, Betsi Hokila, Emeki Kesisi,

²²Betsi Arabba, Semaraimu, Betseli,

²³Awimu, Para, Ofira,

²⁴Kefuramoni, Ofuni nende Keba. Kosi kali amatookho likhumi nende kabili, halala namataala akakabotokhana.

²⁵Kaliho khandi akandi mbu Kibeoni, Rama, Berotsi,

²⁶Misea, Kefira, Mosa,

²⁷Rekemu, Iripeeli, Tarala,

²⁸Sela, Haelefu, Yebusi (noho mba Yerusalemu), Gibea, nende Kiriatsi Yearimu. Kosi kali amatookho likhumi nende amataala akakabotokhana. Yili neliloba elia abetsinyumba tsiolwibulo lwa Benjameni tsiahebwa singa omukabwa kwabwe.