Read lunyore YOSHWA 2 Bible Online

YOSHWA 2 - lunyore bible

YOSHWA 2

¹Ma Yoshwa naruma abalambuuli bamasilisi babili okhurula mukambi ya Sitimu nabalaka okhutsia mambiswi okhulola esibala sia Kanaani, okhusila muno litookho lia Yeriko. Olwa boola khwitookho yilio, batsia okhukona munyumba yelitamba elilangwa mbu Rahabu.

²Omuruchi wa Yeriko yabool'lwa mbu Abaisiraeli nalebe bali nibetsele obutukhu yibwo okhulambuula esibala.

³Kho yaruma ling'ana khu Rahabu naboola, “Abandu bali munyumba yiyo betsele okhulambuula esibala siosi! Bahinie esioba!”

⁴Rahabu nakalusia, naboola mbu “Abandu bandi betsele, nebutswa simanyile ahabarul'le tawe. Batsiye eliuba niliyeelanga olwe esilibwa sielitookho siali nisisili okhwikala. Sindaali okhukhabilisia okhumanya ahabali nibatsitsanga tawe, nebutswa nobalondel'la bwangu, nolabatiila.” (Yaho Rahabu yali nabukuye abalambuuli babili yabo nabareye khusilama sieinyumbaye ikulu nababisile mumakata kemimela chiekatani.)

⁷Abandu bomuruchi barula mwitookho, ma esilibwa nisikalwa. Batsilil'la okhuruna abalambuuli bamasilisi Baisiraeli yabo okhwola habundu aheinjila yambukhilanga khumuchela kwa Yorodani.

⁸Abalambuuli bamasilisi nibasili okhwerulil'la obutukhu yibwo, Rahabu yatsia ikulu khusilama

⁹ma nababool'la mbu, “Manyile mbu OMWAMI wamuhelesia esibala yisi. Murisisie abandu bosi.

¹⁰Khwahul'la singa obwa OMWAMI yomia Inyanza Inzakhanyu imbeli wenywe olwa mwali nimurulanga Emisiri. Khwahul'la khandi singa obwamwera abaruchi ba Baamori abalangwa Sihoni nende Ogu khulubeka lwebukwe womuchela kwa Yorodani.

¹¹Khwali noburi olwa amang'ana yako kakwa mumarwi kefwe; ikhola yakhurimukha. Omwami Nyasaye wenywe ni Nyasaye womwikulu ikulu khandi hano khusibala.

¹²Mwesuye khuye mbu namukhol'le abeinyumba yanje bulahi singa obwa ndamukholeye, ma mumbelesie esilolelo mbu mbe onyala okhumusubila.

¹³Musubisie mbu namuhonie papa nende mama, abasiani befwe, abakhaana befwe, nende abetsinyumba tsiabwe bosi! Murakhalekha khwirwe tawe!”

¹⁴Abandu yabo nibamubool'la mbu, “Nyasaye akhwire bwefwe nikhuba nikhurakhakhola singa khuboolanga! Noba norakhabool'lakhwo omundu wosi esiakhukhol'lenje, khukhusubisianga mbu olwo MWAMI nakhuhelesie esibala yisi, nakhukhukhol'le amalahi.”

¹⁵Rahabu yamenya munyumba eyombokhelwa mwisisi lie litookho, kho yali okhwisia abandu yabo hasi okhubir'ra mwitilisa narumikhilanga omukoye.

¹⁶Nababool'la mbu, “Tsie musikulu khase, abandu bomuruchi bakhamunyoola. Mwebiseyo khulwa amatukhu kataru okhwola olwa nabakalukhe. Olunyuma we yako munyala okhukalukha hamwarula.”

¹⁷Abandu yabo nibamubool'la, “Sinakhuchweye okhuhesia amang'ana kosi akokhutsubile okhwesuha tawe.

¹⁸Yaka niko okokwan'ne okhukhola. Olwa nakhuseere esibala sienywe, nobohe omukoye omwakhanyu yiku khwitilisa eliawakhwisisiamwo hasi. Obukule papa uwo, mama uwo, abasiani benywe, nende abeinyumba ya papawo bosi obare halala munyumba yiyo.

¹⁹Omundu mulala naba natsia esioba weinyumba, okhufwa khukhwe khwakhaba obubi bubwe omwene, ma sikhwakhatulwakhwo tawe.

²⁰Kata mbwo noba niwakhabool'la omundu wosi akakhwabeye nikhukholanga, nefwe sikhwakhahesia amang'ana kosi akhokhutsuubile tawe.”

²¹Rahabu yahuchil'la ma nabaruma nibatsia. Olwa bali nibamal'le okhutsia, yaboha omukoye omwakhanyu khwitilisa.

²²Abalambuuli bamasilisi yabo batsia musikulu nibebisa. Abandu bomuruchi babakhaba habundu hosi musibala yisio khulwaamatukhu kataru nebutswa sibabanyoola tawe, ma nibakalukha Yeriko.

²³Abalambuuli babili yabo barula mubikulu, nibambukha omuchela, ma nibakalukha ha Yoshwa yali nali. Nibamubool'la kosi akali nikekholekhele,

²⁴ma nibaboola, “Khuli nende obwatooto mbu OMWAMI wamala okhukhuhelesia esibala siosi. Abandu bosi ebwene yila bakhuriye.”