Read lunyore YOSHWA 20 Bible Online

YOSHWA 20 - lunyore bible

YOSHWA 20

¹OMWAMI yabool'la Yoshwa,

²abool'le abandu ba Isiraeli mbu “Mwahule amatookho kobwilukhilo khulwokhukhaaba emilembe akandalaka Musa akhubool'le khukako.

³Omundu owira omundu undi khulwa amarabba anyala okhutsiayo yehonokosie khumundu omukhabanga khulwa okhurunga es'sialia.

⁴Anyala okhwilukhila mwitookho elala khuko, okhutsia habundu wesiina habwinjil'lo bwelitookho, ma yenoosie abemeli esiekhol'le. Ma nabamuhuchil'le nayenjile mwitookho ma bamuhe habundu hamenya, kho abe onyala okhumenyamwo.

⁵Omundu okhabanga okhurunga es'salia naba namulondayo, abandu bomwitookho baramuhaana khuye tawe. Okhwola bamusoole sichila yer're omundu khulwamarabba ne tawe khulwe lirima.

⁶Alamenya mwitookho okhwola olwa nabe nayal'lwe nende abandu khandi nende okhwola okhufwa khwomundu oba nali Omwesaalisi Omukhongo olwene yilwo. Kho omundu uyo akalukhe ingo mwitookho lilie liene, eliayelukha narulamwo.”

⁷Kho, khulubeka lwemasaba wa Yorodani bahula litookho lia Kedeshi elili mu Galilaya, musibala siokhusikulu esia Nafutali; Shekemu musibala siokhusikulu esia Efuraimu; nende Heburoni musibala siokhusikulu esia Yuda.

⁸Ebukwe wa Yorodani khusipaapi siemusitsimi esili ebukwe wa Yeriko, bahula Beseri mulusoma lwa Rubeni; Ramotsi mu Gileadi, mulusoma lwa Gadi; nende Golani mu Bashani, mulusoma lwa Manase.

⁹Yaka kalinji amatookho kobwilukhilo bwakhaba omulembe akahulwa khulwa abandu bosi aba Isiraeli nende khulwo omundu wosi omucheni omenyanga mubo. Omundu wosi owera omundu undi khulwamarabba anyala okhunyoola okhusoolwa muko okhurula khumundu orunanga okhurunga es'salia; siyakhanyal'le okhwirwa narayaaliywe habulafu tawe.