Read lunyore YOSHWA 21 Bible Online

YOSHWA 21 - lunyore bible

YOSHWA 21

¹Abemeli betsinyumba tsia Abalawi batsia khu Eliasa omwesaalisi, nende khu Yoshwa omusiani wa Nuni, nende khubemeli babetsinyumba tsie tsinzibulo tsiosi etsia Isiraeli.

²Habwene yaho mwitookho lia Shilo musibala sia Kanaani bababool'la mbu, “OMWAMI yalaka okhubir'ra mu Musa mbu khuhebwe amatookho kokhumenyamwo nende obwayilo okhukabotokha khulwa tsing'ombe tsiefwe.”

³Kho okhulondokhana nende lilako lio MWAMI abandu ba Isiraeli bahelesia Abalawi amatookho nalebe nende emikunda chiobwayilo okhurula mutsisoma tsiabwe tsiene.

⁴Abesilibwa sia Kohatsi mutsinyumba tsia Balawi nibo abali abokhuranga okhukabul'lwa amatookho. Abetsinyumba tsiolwibulo lwa Haruni omwesaalisi bakabul'lwa amatookho likhumi nakataru okhurula mutsisoma tsia Yuda, Simioni, nende Benjameni.

⁵Abandi bosi abali abesilibwa sia Kohatsi bakabul'lwa amatookho likhumi okhurula mutsisoma tsia Efuraimu, Dani, nende enusu ya Manase.

⁶Esilibwa sia Gerishoni siakabul'lwa amatookho likhumi nakataru okhurula mutsisoma tsia Isakari, Asheri, Nafutali nende enusu yindi ya Manase.

⁷Abetsinyumba tsiesilibwa sia Merari bakabul'lwa amatookho likhumi nakabili okhurula mutsisoma tsia Rubeni, Gadi, nende Sabuloni.

⁸Khulwokhukhupa imbulu abandu ba Isiraeli bakabul'la Abalawi amatookho yaka nende emikunda chiokhwayamwo, singa obwo MWAMI yali niyalaka okhubir'ra mu Musa.

⁹Yaka niko amera akamatookho okhurula mutsisoma tsia Yuda nende Simioni akali okhuhanwa

¹⁰khubolwibulo lwa Haruni abali abesilibwa sia Kohatsi, esiarula khu Lawi. Omukabwa kwabwe kwali okhwokhuranga okhukholwa.

¹¹Bahebwa litookho lia Ariba (Ariba yali samwana Anaki) oulangwanga Heburoni, musibala siokhusikulu esia Yuda, halala nende obwayilo obwalibotokhana.

¹²Habula emikunda chielitookho, kata nende amataala kalio amatititi, kali nikamal'le okhuhanwa khu Kalebu omusiani wa Yefune singa akake.

¹³Khubaana ba Haruni omwesaalisi baheelesibwa Heburoni (elala khumatookho kobwilukhilo),

¹⁴Yatiri, Eshitemoa,

¹⁵Holoni, Debiri,

¹⁶Aini, Yuta, nende Betsi Shemeshi halala nende obwayilo bwabwe. Kosi kali amatookho karano nakane okhurula khu tsinzibulo tsia Yuda nende Simioni.

¹⁷Okhurula khulusoma lwa Benjameni bahebwa amatookho kane: Gibeoni, Geba,

¹⁸Anatsotsi nende Almoni nende obwayilo bwako.

¹⁹Kosi halala kali amatookho likhumi nakataru, halala nende obwayilo bwako, akali okhuhanwa khubesaalisi abolwibulo lwa Haruni.

²⁰Abetsinyumba tsindi Abalawi besilibwa sia Kohatsi bali okhukabul'lwa amatookho kandi okhurula mulusoma lwa Efuraimu.

²¹Bahebwa amatookho kane. Shekemu nende obwayilo bwalio musibala siokhusikulu esia Efuraimu (elala khumatookho kobwilukhilo), Geseri,

²²Kibisaimu, nende Betsi Horoni, nende obwayilo bwako.

²³Okhurula mulusoma lwa Dani bali okhuhebwa amatookho kane: Eliteke, Kibetsoni,

²⁴Aiyaloni, nende Katsirimoni, nende obwayilo bwako.

²⁵Okhurula mulusoma lwa Manase olwemasaba bahebwa amatookho kabili: Taanaki nende Katsirimoni nende obwayilo bwako.

²⁶Abetsinyumba yitsi abesilibwa sia Kohatsi banyoola amatookho likhumi kosi halala, nende obwayilo bwako.

²⁷Omukanda kundi okwa Abalawi, esilibwa sia Gerishoni, banyoola okhurula mulusoma lwa Manase olwebukwe amatookho kabili: Kolani mu Bashani (elala khumatookho kobwilukhilo) nende Beeshitera, nende abwayilo bwako.

²⁸Okhurula mulusoma lwa Isakari banyoola amatookho kane: mbu Kishioni, Taberatsi,

²⁹Yarimutsi, nende Enganimu, nende obwayilo bwako.

³⁰Okhurula mulusoma lwa Asheri banyoola amatookho kane: mbu Mishaeli, Abitoni,

³¹Helikatsi, nende Rehobu, nende obwayilo bwako.

³²Okhurula mulusoma lwa Nafutali banyoola amatookho kataru: mbu, Keteshi elili mu Galilaya, nende obwayilo bwalio (elala khumatookho kobwilukhilo), Hamotsi, Tori, nende Karitani, nende obwayilo bwako.

³³Tsinyumba tsindi tsindala tsia abesilibwa sia Gerishoni banyoola amatookho likhumi nende kataru nende obwayilo bwako.

³⁴Abandi bosi khubolwibulo lwa Abalawi, abesilibwa sia Merari, banyoola okhurula mulusoma lwa Sabuloni amatookho kane: Yokineamu, Karita,

³⁵Timina, nende Nahalali, nende obwayilo bwako.

³⁶Okhurula mulusoma lwa Rubeni banyoola amatookho kane: Beseri, Yahasi,

³⁷Ketemotsi, nende Mefatsi, nende obwayilo bwako.

³⁸Okhurula mulusoma lwa Kadi banyoola amatookho kane: Ramotsi elili mu Gileadi, nende obwayilo bwalio (nalio liali elala khumatookho kobwilukhilo), Mahanaimu,

³⁹Heshiboni, nende Yaseri nende obwayilo bwako.

⁴⁰Kho esilibwa sia Merari siali okhukabilwa amatookho likhumi na kabili kosi halala.

⁴¹Amatookho ka Balawi okhurula musibala sia Baisiraeli kosi halala kali amakhumi kane nende munane nende obwayilo bwako.

⁴²Buli elala khumatookho ka Balawi yaka lialinji nobwayilo obwalibotokhana.

⁴³Kho OMWAMI nahelesia Abaisiraeli liloba liosi eliayali niyasubisia abakuka babwe mbu alibahelesia. Olwa bali nibalibukuye, bamala nibamenyamwo.

⁴⁴OMWAMI yabahelesia omulembe mwiloba liosi, singa yali niyasubusia abakuka babwe. Kata siyaliho mulala owokhubasuku babwe owakhanyal'le okhubalwana, sichila OMWAMI yahelesia abandu ba Isiraeli obulechi khubasuku babwe bosi.

⁴⁵OMWAMI yahesia sielisubisio eliayali niyesuhila abandu ba Isiraeli.