Read lunyore YOSHWA 22 Bible Online

YOSHWA 22 - lunyore bible

YOSHWA 22

¹Kho Yoshwa yabunjelesia halala abandu bosi abolwibulo lwa Rubeni, Gadi, nende enusu yolwibulo lwa Manase;

²nababoolela, mbu, “Mwakhola amang'ana kosi aka Musa omurumikhili wo MWAMI yamulaka okhukhola, ma mwalinda amalako kanje kosi.

³Mumatukhu yaka kosi simwayanzukhila Omuisiraeli wasienywe kata l'lala tawe. Mwali okhwelinda nimulonda amalako ko Mwami Nyasaye wenywe.

⁴Luno singa obwa yamusubisia, OMWAMI Nyasaye wenywe umal'le okhuhelesia Abaisiraeli basienywe omulembe. Kho mukalukhe ingo musibala esia abene mwali okhwenyool'la, esibala esili ebukwe wa Yorodani, esia Musa omurumikhili wo MWAMI yamuhelesia.

⁵Mulole muhesisie lilako lia Musa yamulaka mbu: ‘Muyanze Omwami Nyasaye wenywe, mukhole obulalilo bubwe, muhesie amalako kaake, mube abasubilwa khuye, ma mumurumikhile nende omwoyo kwenywe kwosi nobulamu bwenywe bwosi.’ ”

⁶Yoshwa yabalaamila ikhabi ma nabasebula. Nabo bakalukha ingo.

⁷Musa yali niyahelesia enusu ya Manase liloba ebukwe wa Yorodani. Yoshwa naye yahelesia enusu yindi liloba elili emasaba wa Yorodani halala netsinzibulo tsindi. Olwa Yoshwa yaseebulana n'nabo

⁸yababool'la mbu “Kalukhe ingo wenywe nimuli abahinda betsing'ombe tsinyinji halala nefetsa, netsahabu, nomukasa, nesibia, netsingubo tsinyinji. Mukabulane nabasienywe ebindu biamuyakile okhurula khubasuku benywe.”

⁹Kho abandu bolwibulo lwa Rubeni, Gadi nende enusu yolwibulo lwa Manase bakalukha ingo. Balekha abandi khubandu ba Isiraeli ha Shilo musibala sia Kanaani ma nibasimukha okhutsia musibala siabwe siene, esibala sia Gileadi, esiabali nibabukula singa obwo MWAMI yali niyabalaka okhubir'ra mu Musa.

¹⁰Olwetsinzibulo tsia Rubeni, Gadi nende enusu yolwibulo lwa Manase tsioola Kelilotsi nibasili emasaba wa Yorodani, bombokha olusambwa olukali olwokhuyanzisia yaho ahembi nende omuchela.

¹¹Abandi khubandu ba Isiraeli babool'lwa mbu, “Hulile! Abandu betsinzibulo tsia Rubeni, Gadi, nende enusu ya Manase bamal'le okhwombokha olusambwa ha Kelilotsi, khulubeka lwefwe lwomuchela kwa Yorodani!”

¹²Olwa abandu ba Isiraeli bahulila yaka, omukanda kwosi kwebunjikha halala ha Shilo khulwo okhutsia okhulwana abetsinzibulo tsiebukwe.

¹³Kho abandu ba Isiraeli baruma Fenihasi omwana womwesaalisi Eliasa, okhutsia khubandu betsinzibulo tsia Rubeni, Gadi, nende Manase musibala sia Gileadi.

¹⁴Abemeli likhumi batsia nende Fenihasi, mulala okhurula mubuli olwibulo khutsinzibulo tsiemasaba nende omwemeli khubuli mulala mubebilibwa.

¹⁵Beetsa musibala sia Gileadi khubandu ba Rubeni, Gadi, nende enusu yolwibulo lwa Manase.

¹⁶Ne nibal'lomanga khulwo omukanda kwo MWAMI bababool'la mbu, “Busina mukhol'le esindu esibi yisi khu Nyasaye wa Isiraeli? Mukhol'le omurwe omutinyu khu MWAMI nimweyombokhela olusambwa yilu abene! Simumulondanga khandi tawe!

¹⁷Mwitsul'le tsimbi tsiefwe olwa khwali Peori, olwo MWAMI yahaana esinyasio khubandu baabe bene esiobulwaye? Khusisalilanga khulwa akene yako. Tsimbi yitsio siyahela tawe?

¹⁸Mutsitsanga okhusuula okhumulonda luno? Nimuba nimukhola omurwe omutinyu khu MWAMI olwaleelo, nabe nelirima khu siomundu wosi Omuisiraeli mukamba.

¹⁹Khe luno, nikaba esibala sienywe sisihel'le okhwekayakayilamwo tawe, mwitse musibala sio MWAMI, oweliheema lilie lili mubanze esibala sindi mwifwe. Nebutswa murakhol'la OMWAMI induli nohomba okhukhukhol'la ifwe induli khulwo okhwombokha olusambwa lundi okhumeeta khu olwo MWAMI Nyasaye wefwe tawe.

²⁰Mwitsul'le singa obwa Akani omwana wa Sera yasuula okhuhul'la lilako khukebindu ebialamwa mbu bionoonibwe; omukanda kwosi okwa Isiraeli kwali okhunyoola esinyasio khulwa akene yako. Akani siyali niye yenyene owafwa khulwe tsimbi tsitsie tawe.”

²¹Abandu betsinzibulo tsia Rubeni, Gadi, nende enusu yolwibulo lwa Manase bakalusia abemeli abetsinyumba tsietsimbia tsiemasaba mbu,

²²“Owobunyali yenyene ni Nyasaye! Niye OMWAMI! Owobunyali yenyene ni Nyasaye! Niye OMWAMI! Ye umanyile esichil'le nikhukhola mbu, khandi khwenyanga nenywe mumanye! Nikali khwali okhukhola induli ne sikhwali abasubilwa khu MWAMI tawe muralekha khutsilil'le okhumenya tawe.

²³Nikaba sikhulondele amalako ko MWAMI ma nikhwombokha olusambwa lwefwe abene okhusambilamwo emisango nohomba okhurumikhila khulwe ebihanwa biobuswache nohomba ebihanwa biobuhambani, lekhe OMWAMI mwene akhuhe esinyasio.

²⁴Tawe! Khwali okhululomba sichila khwali noburi mbu mumatukhu aketsanga abetsukhulu benywe bakhabool'le abetsukhulu befwe mbu ‘Nisina esiakhamanyia mbu muli abandu bo MWAMI, Nyasaye wa Isiraeli?

²⁵Yalomba Yorodani okhuba olwakho hakari hefwe nende inywe abandu ba Rubeni nende Gadi. Simuli nende esiakhamanyia mbu muli abandu bo MWAMI tawe.’ Khe abetsukhulu benywe bakhachila abetsukhulu befwe nibalekha okhumwekayakaya OMWAMI.

²⁶Kho ifwe khwombokhele olusambwa, tawe khulwa okhusamba omusango nohomba okhuhaana ebihanwa,

²⁷nebutswa musilenje isio singa esilolelo khulwa abandu befwe nende abenywe, khandi khulwe ebisoni ebilikhulonda mbu tooto khumwekayakayanga OMWAMI imbeli weliheema lilie litsienukhu nende okhuhaana ebihanwa biefwe okhusambwa emisango nende okhuhaana ebihanwa biobuhambani. Yaka kali khulwa okhulinda abetsukhulu benywe okhubula okhuboola mbu abefwe sibali nende esiakhamanyia mbu nabo MWAMI tawe.

²⁸Liali lipaalo liefwe mbu, nikaba yaka kakhekhola, abetsukhulu befwe bakhanyal'le okhuboola, ‘Loole! Abakuka befwe balomba olusambwa singa olusambwa lwo MWAMI. Siluli khulwo okhusamba emisango nohomba khulwa omusango, nebutswa singa esilolelo khulwa abandu befwe nende abenywe.’

²⁹Sikhwakhakholeye OMWAMI induli nohomba okhulekha okhumulonda khulwo okhwombokha olusambwa okhusambilakhwo ebihanwa nohomba khulwo obuswache nohomba emisango tawe. Sikhwakhombokhele olusambwa lundi lwosi okhuyomba olusambwa lwo MWAMI Nyasaye wefwe olusinjilanga imbeli weliheema liokhubaho khwo MWAMI.”

³⁰Fenihasi omwesaalisi nende abemeli bomukanda abali n'naye likhumi, abemeli babetsinyumba tsietsinzibulo tsiemasaba, bahul'la akabandu betsinzibulo tsia Rubeni, Gadi, nende enusu ya Manase baboola, ma nibakahuchil'la.

³¹Fenihasi, omwana womwesaalisi Eliasa, yababool'la mbu, “Luno khumanyile mbu OMWAMI ali n'nefwe. Simwamukholeye induli tawe, ma mwahonia abandu ba Isiraeli okhurula musinyasio sio MWAMI.”

³²Ma Fenihasi nende abemeli balekha abandu ba Rubeni nende Gadi musibala sia Gileadi, ma nibakalukha Kanaani, khubandu ba Isiraeli, ma nibababool'la amang'ana yako.

³³Abaisiraeli bakahuchil'la ma nibetsoomia Nyasaye. Sibamala khandi bal'lomekhwo khuko okhutsia mwihe okhumulula liloba lia abandu ba Rubeni nende Gadi tawe.

³⁴Abandu ba Rubeni nende Gadi baboola, “Olusambwa yilu nobukobokheli khu ifwe fwesi mbu OMWAMI ni Nyasaye.” Ma mbwo nibalulanga mbu “Olwo obukobokheli.”