Read lunyore YOSHWA 23 Bible Online

YOSHWA 23 - lunyore bible

YOSHWA 23

¹Inyuma woluhono olurambi OMWAMI yahelesia Abaisiraeli omulembe okhurula khubasuku babwe abababotokhana. Olwene yilwo Yoshwa yali omusakhulu okhusila,

²kho yalanga Abaisiraeli bosi, nabakhulundu abakhalachi, abemeli, nende abakhongo babandu, ma nababool'la mbu, “Luno ndi omusakhulu okhusila.

³Mwamal'le okhulola ebindu biosi ebio MWAMI Nyasaye wenywe yakhol'la amahanga yaka kosi khulwenywe. OMWAMI Nyasaye wenywe yabeye namulwan'nanga.

⁴Ndamala okhumukabul'la omukabwa kwetsinzibulo tsienywe, liloba liamahanga akasili mu Kanaani kata nende eliamahanga aka ndamala okhuleka, okhurula khumuchela kwa Yorodani ebukwe okhwola khunyanza ya Mediterenia khulubeka lwemasaba.

⁵OMWAMI Nyasaye wenywe nachile nabelukhe okhurula khwinywe ma nibakalukha inyuma. Nabakhunge olwa namube nimwesundanga imbeli. Mwakhabukule liloba liabwe, singa obwo OMWAMI Nyasaye wenywe yamusubisia.

⁶Kho mulole mbu mulondanga amang'ana kosi nimukhola siesindu siosi esiahandikwa musitapu sia Malako ka Musa. Murachaayakhwo esitonye siosi khuko tawe.

⁷Ma khandi murahambaanakhwo nabandu yaba abalekhelwe mwinywe nohomba okhul'loma khumera akabanyasaye babwe nohomba okhukarumikhila mukhwesuha nohomba mukhwekayakaya abanyasaye yabo nohomba okhubenamila tawe.

⁸Musilenje yisio, mube abasubilwa khu MWAMI, singa obwa mwabeyenje okhwola luno.

⁹OMWAMI wataabia amahanga amakhongo khandi aketsingufu.

¹⁰Omundu wosi khwinywe anyala okhutaabia abandu elefu ndala sichila OMWAMI Nyasaye wenywe amulwan'nanga inywe, singa butswa obwayasubisia.

¹¹Kho mulole mbu muyanzanga OMWAMI Nyasaye wenywe.

¹²Nimuba nimurabba abasubilwa ma nimuhambana nende amahanga akasikala mwinywe ma nimuteesania n'nabo,

¹³Kho mumanye tooto mbu OMWAMI Nyasaye wenywe sinakhunge amahanga yako khandi tawe, nenywe simwakhesunda imbeli tawe. Nebutswa nababe singa omubero kwokhumuleer'ra esibi nohomba singa obuko khwinywe khandi singa olukhoba khumukongo nohomba amahuwa akamutsomole mutsimoni tsienywe. Ne yaka nakatsilil'le okhwekhola okhwola olwa musibala esilahi yisi esio MWAMI Nyasaye wenywe yamuhelesisie.

¹⁴“Luno ndi ahembi okhufwa. Siomundu khwinywe wamanyila mumwoyo nende mubulamu mbu OMWAMI Nyasaye wenywe wamala okhumuhelesia ebindu biosi ebilahi ebia yasubisia. Sielisubisio liosi eliayasubisia liamala okhuhesikha; ne kata elala khuko siliabula okhwekhola tawe.

¹⁵Singa yali okhuhesia sielisubisio eliayesuha khwinywe, khandi nimbwo yakhahesie buli esirisio.

¹⁶Nimuba nimurahesia Indakano yo MWAMI Nyasaye wenywe yamulaka okhulinda, khandi nimuba nimurumikhila nende okhwekayakaya abanyasaye bandi, kho mwirimalie yakhamuhelesie esinyasio, ne nonoho yakhabuleho kata mulala khwinywe owakhasikale musibala esilahi yisi esia yamuhelesia.”