Read lunyore YOSHWA 24 Bible Online

YOSHWA 24 - lunyore bible

YOSHWA 24

¹Yoshwa yabunjelesia tsinzibulo tsia Isiraeli tsiosi mwitookho lia Shekemu. Yalanga abakhulundu, abemeli, abakhalachi nende abakhongo ba Isiraeli, ma nibetsa imbeli wa Nyasaye.

²Yoshwa yamala nabool'la abandu bosi mbu: “Yaka niko ako MWAMI Nyasaye wa Isiraeli aboolanga: ‘Khale abakuka benywe bamenyanga injelekha womuchela kwa Efurate ma nibekayakaya abanyasaye bandi. Mulala khubakuka yabo yali Tera, samwana Aburahamu nende Nahori.

³Ma nimbukula Aburahamu, kuka wenywe, okhurula musibala esili injelekha womuchela kwa Efurate nimwemel'la okhubir'ra musibala siosi esia Kanaani. Ndamuhelesia abetsukhulu abenji. Ndamuha Isaka,

⁴ma nimbelesia Isaka, Yakobo nende Esau. Ndahelesia Esau esibala siomusikulu esia Edomu singa omukabwa kukwe, nebutswa kuka wenywe Yakobo nende abaana baabe bakongoma okhutsia Emisiri.

⁵Olunyuma ndaruma Musa nende Haruni, ma nimbana amanyakhano amakali khu Bamisiri. Nebutswa ndali okhumwemel'la okhurulamwo.

⁶Ndaleera abakuka benywe okhurula Emisiri, ne Abaamisiri babalondel'la nende amakaari halala nabasikari abelukhilanga khutsisululi. Nebutswa olwabakuka benywe boola khunyanza Inzakhanyu

⁷balakaya khu ise nibenyanga mbakhonye. Ndamala niira esilima hakari wabwe nende Abaamisiri. Ndalaka Inyanza okhwitsa nekongomanga khu Bamisiri ma amaatsi kayo nikabera. Mwamanya akandakhola khu Bamisiri. “ ‘Mwamenya musiyieyie oluhono olurambi.

⁸Ma ise nimwemel'la okhwitsa musibala sia Baamori, abamenyanga ebukwe wa Yorodani. Bamulwana, nebutswa ndamuhelesia obulechi khubo. Mwabukula esibala siabwe, ne ndabamulula olwa nenywe mwali nimwesundanga imbeli.

⁹Ma omuruchi wa Moabu olangwanga, Balaki omwana wa Sipori, namulwana. Yaruma ling'ana khu Balaamu omwana wa Beori ma namubool'la mbu amulake esilaka munwa siobubi.

¹⁰Nebutswa ise sindahulila Balaamu tawe, kho yamulaamila tsikhabi, ne mukene yaka ndali okhumuhonia okhurula khu Balaki.

¹¹Mwambukha omuchela kwa Yorodani ma nimwitsa Yeriko. Abandu ba Yeriko bamulwana, halala nende Abaamori, Abaperisi, Abakanaani, Abahiti, Abakirikashi, Abahiwi, nende Abayebusi. Nebutswa ndamuhelesia obulechi okhubaleka bosi.

¹²Olwa mwali nimwesundanga imbeli, ndabarimula ikholo kho mbe onyala okhukhunga abaruchi babili aba Baamori. Tsinganga nende obuhingo bwenywe sibiali nobunyali khubo tawe.

¹³Ndali okhumuha esibala esiamwali nimusili okhulimakhwo nende amatookho akamuraali nimwombokha. Luno mumenyelemwo khandi mulitsanga amatunde okhurula khumisabibu, nende emiseituni echiamuraraaka.’ ”

¹⁴Yoshwa natsilil'la okhuboola mbu, “Kho luno helesie OMWAMI oluyali khandi mumurumikhile mubwatooto nende mubusubilwa. Muhinieho abanyasaye babakuka benywe bali nibanala okhwekayakaya olwa balinji musibala sia Mesopotamia nende esie Misiri, ma murumikhile OMWAMI yenyene.

¹⁵Nimuba nimurenya okhumurumikhila, mwahule luno owanamurumikhilenje, nikali nabanyasaye babakuka benywe bekayakayanga musibala sia Mesopotamia nohomba nikali nabanyasaye ba Baamori, aba mumenyele musibala siabwe. Nebutswa ise nende abeinyumba yanje, nakhurumikhilenje OMWAMI.”

¹⁶Abandu nibakalusia nibaboola, “Sikhwakhalekha OMWAMI nikhurumikhila abanyasaye bandi kata nahati tawe!

¹⁷OMWAMI Nyasaye wefwe yahinia abapapa befwe nende ifwe okhurula mubuhambe Emisiri, ma nikhulola akamangalimwa aka yakhola. Yakhulinda siahabundu hosi aha khwatsitsanga nikhubir'ra mumahanga kosi.

¹⁸Olwa khwali nikhwesundanga imbeli nikhwinjila musibala sino, OMWAMI yakhunga Abaamori bosi abamenyangamwo. Kho nefwe khandi nakhurumikhile OMWAMI; ye ni Nyasaye wefwe.”

¹⁹Yoshwa yabool'la abandu mbu, “Simunyala okhurumikhila OMWAMI tawe. Ni Nyasaye omutsienukhu khandi oweimbalikha.

²⁰Ne nimuba nimumulekha ma nirumikhila abanyasaye bebucheni, yakhamukalukhane namuhelesia esinyasio. Yakhamumulule, kata nikali mbu yalinji omulahi khwinywe khale.”

²¹Abandu nibabool'la Yoshwa mbu, “Tawe! Nakhurumikhile OMWAMI.”

²²Yoshwa nababool'la mbu, “Muli abakobokheli abene khubwenywe sichila mbu mumal'le okhwahula okhurumikhila OMWAMI.” Nabo nibaboola mbu: “Yee, khuli abakobokheli.”

²³Yoshwa nabalaka mbu “Khe hinieho abanyasaye bebucheni yabo abamuli n'nabo, khandi mwehaane khu MWAMI Nyasaye wa Isiraeli nomwoyo kwenywe kwosi.”

²⁴Abandu bamala nibabool'la Yoshwa mbu, “Nakhurumikhile OMWAMI Nyasaye wefwe. Nakhulonde amalako kaake.”

²⁵Kho Yoshwa nalomba indakano nabandu litukhu yilio, ma habwene yaho mwitookho lia Shekemu nabahelsia amalako nende amebaalo akabalonda.

²⁶Yoshwa yahandika amalako yaka musitapu sia Malako ka Nyasaye. Ma nabukula lichina likhongo nalisinjisia ikulu isi womusaala kwomuruba okuli munyumba yo MWAMI.

²⁷Yabool'la abandu bosi mbu, “Lichina yili liakhabe obukobokheli bwefwe. Limal'le okhuhul'la amang'ana kosi ako MWAMI akhubooleye. Khe bwakhabe obukobokheli khwinywe, okhumwitsusia okhubula okhukhol'la OMWAMI Nyasaye wenywe indiri.”

²⁸Ma Yoshwa nasebula abandu, ne buli mundu nakalukha musitonye sieliloba lilie omwene.

²⁹Olunyuma lweyako, Omurumikhili wo MWAMI Yoshwa omwana wa Nuni yafwa nali omusakhulu owemihika emia ndala nende likhumi.

³⁰Bali okhumuyabila mwiloba lilie liene eliali Timunatsi Sera musibala siomubikulu esia Efuraimu esili esinyolu wesikulu sia Kaashi.

³¹Oluhono lwa Yoshwa yali mwoyo abandu ba Isiraeli barumikhila OMWAMI, ne olunyuma lwokhufwa khukhwe batsilil'la okhukhola mbwo oluhono olwabemeli yabo, abali nibelol'la abene amang'ana kosi ako MWAMI yali niyakhol'la Isiraeli bali nibasili mwoyo.

³²Omubili kwa Yosefu, okwabandu ba Isiraeli bali nibaleera okhurula Emisiri, kwayabilwa mwitookho lia Shekemu, musitonye siomukunda okwa Yakobo yali niyakula okhurula khubaana ba Hamori owali samwana Shekemu. Yakobo yali niyakukula khubukusi obuhela ebitonye biefetsa emia ndala. Liloba yili liali omukabwa kwa abolwibulo lwa Yosefu.

³³Eliasa omwana wa Haruni naye yafwa ma nayabilwa mwitaala lia Gibea, eliali musibala siomusikulu esia Efuraimu esiali nisiahanwa khumwana uwe olangwanga Fenihasi.