Read lunyore YOSHWA 3 Bible Online

YOSHWA 3 - lunyore bible

YOSHWA 3

¹Omukamba okwalondakhwo Yoshwa nende Baisiraeli bosi babuukha mabwebwe nibarula mukambi ya Sitimu nibatsia hamuchela kwa Yorodani, ahabali okhwebunjikha mukambi nibasilindil'la okhukukhalania.

²Olunyuma lwamatukhu kataru abemeli babir'ra mukambi

³ma nibabool'la abandu mbu “Olwa namulole abesaalisi nibachingile Lisanduku lie Indakano yo MWAMI Nyasaye wenywe, musambule ekambi ma mubalonde.

⁴Musili okhubakhwo hano olundi lwosi, khe nabamumanyie injila eya mulondakhwo. Nebutswa murakhesunda ahembi Khwisanduku lie Indakano tawe; mube inyuma okhuhela ekilomita ndala.”

⁵Yoshwa nabool'la abandu mbu, “Mwetsienule, sichila mukamba OMWAMI nakhole akamangalimwa mwinywe.”

⁶Khe yabool'la abesaalisi babukule Lisanduku lie Indakano kamele n'nalio imbeli wabandu. Bakhola singa obwa yaboola.

⁷OMWAMI yabool'la Yoshwa mbu, “Esia nzia okhukhola olwaleelo sitsa okhuchila abandu ba Isiraeli bosi bachake okhukhuha oluyali singa omundu omukhongo, ne khandi nabamanyilisie mbu ndi n'nawe singa ndalinji nende Musa.

⁸Obool'le abesaalisi abachingile Lisanduku lie Indakano mbu olwa boola khumuchela, okhwola babir're m'maatsi ma basinjile ahembi khuluchinga lwomuchela.”

⁹Ma Yoshwa nabool'la abandu mbu, “Yitse hano muhulile ako OMWAMI Nyasaye wenywe yenyanga okhumuboola.

¹⁰Olwa mwesunda imbeli, siahene alakhunga Abakanaani, Abahiti, Abahiwi, Abaperisi, Abakirikashi, Abaamori, nende Abayebusi. Namumanye mbu Nyasaye oli mwoyo ali halala n'nenywe

¹¹olwe Lisanduku lie Indakano yo MWAMI wesibala siosi nalimuranjil'le ni okhwambukhanga Yorodani.

¹²Luno mwele abandu likhumi nababili, mulala okhurula mubuli lwibulo lwabandu ba Isiraeli.

¹³Olwa abesaalisi abachingile Lisanduku lie Indakano yo MWAMI wesibala siosi nabasene mumaatsi, omuchela kwa Yorodani nakulekhe okhubira, ne amaatsi aketsanga mumuchela nakebunjikhe habundu halala.”

¹⁴Olwabandu basambula ekambi okhwambukha Yorodani, abesaalisi bemela imbeli wabwe.

¹⁵Kali amatukhu kelichesa ne omuchela kwa Yorodani, kwali nikwitsuye. Nebutswa olwabesaalisi abali nibachingile Lisanduku lie Indakano boola khu Yorodani ma nibasena mumuchela,

¹⁶amaatsi kasinjila ma nikebunjikha habundu halala, emukulu ehale homuchela kurulanga helitaala elili khusibafu sia Soretani Adamu elili ahembi amaatsi kakwo sikatsia okhwilukha khwako okhutsia munyanza ye chumbi khwakhalasia ne abandu bali abanyala okhwambukhila ahembi Yeriko.

¹⁷Abandu bambukha nibachendanga khwiloba eliomu, olwa abesaalisi abali nibachingile Lisanduku lie Indakano yo MWAMI bali nibasinjila khwiloba eliomu hakari homuchela kwa Yorodani. Abesaalisi basinjilaho okhwola olwabandu bosi bali nibambukhile.