Read lunyore YOSHWA 4 Bible Online

YOSHWA 4 - lunyore bible

YOSHWA 4

¹Olwe lihanga liosi liali niliambukhile omuchela kwa Yorodani, OMWAMI yabool'la Yoshwa mbu,

²“Wele abandu likhumi nababili, mulala okhurula mubuli olwibulo.

³Ma obalake babukule amachina likhumi nakabili okhurula hakari homuchela kwa Yorodani, okhurula habundu ahabesaalisi bali nibasinjiye. Obabool'le bachinge amachina yaka batsie n'nako mabakare hasi aha mwitsa okhulomba ekambi mukolooba kuno.”

⁴Ma Yoshwa nalanga abandu likhumi nababili aba yali niyel'le,

⁵ma naboola, “Tsie mu Yorodani imbeli we Lisanduku lie Indakano yo MWAMI Nyasaye wenywe. Buli mulala khwinywe abukule lichina are khwibeka lilie, sielichina elala khubuli olwibulo mutsinzibulo tsia Baisiraeli.

⁶Amachina yaka kakhetsusie abandu khuko OMWAMI akhol'le. Mumatukhu ketsanga, olwa abaana benywe balimureeba esia machina yaka kamanyianga khwinywe,

⁷mwakhababool'le mbu amaatsi komuchela kwa Yorodani kakhalisia olwe Lisanduku lie Indakano yo MWAMI liakhalania omuchela. Amachina yaka buli lwosi kakhetsusie abandu ba Isiraeli khukali okhwekholekha hano.”

⁸Abandu balonda amalako ka Yoshwa. Singa obwo OMWAMI yali nalakile Yoshwa, babukula amachina likhumi nakabili okhurula hakari ha Yorodani, khusiolwibulo mutsinzibulo tsia Isiraeli, bachinga nibahila ahabali nibalombele ekambi, ma nibakara hasi habwene yaho.

⁹Yoshwa khandi yasichikha amachina likhumi nakabili hakari homuchela kwa Yorodani, ahabesaalisi abachinga Lisanduku lie Indakano bali okhusinjila. (Amachina yako kasiliho okhwola leelo.)

¹⁰Abesaalisi basinjila hakari homuchela kwa Yorodani okhwola olwebindu biosi biali nibimal'le okhwekhola ebio MWAMI yalaka Yoshwa abool'le abandu bakhole. Yaka niko aka Musa yali niyalaka. Abandu bahuchila okhukhalania omuchela.

¹¹Olwa bosi bali nibali oluchelekha lundi, abesaalisi nibali ne Lisanduku lie Indakano baranjil'la okhutsia imbeli wabandu.

¹²Abandu abolwibulo lwa Rubeni, Gadi nende enusu yolwibulo lwa Manase, niberechekheele okhulwana lihe, bakhalania okhutsia imbeli wabandu bosi singa Musa yali nababooleye bakhole.

¹³Imbeli wo MWAMI abandu abahela ahembi etsielefu amakhumi kane abali niberechekhele okhulwana bakhalania nibatsia musipaapi esiali ahembi Yeriko.

¹⁴Ako MWAMI yakhola litukhu yilio kachila abandu ba Isiraeli okhumanyilisia mbu Yoshwa nomundu omukhongo. Bamuhelesia oluyali mubulamu bubwe bwosi, singa obwa bali nibahelesia Musa oluyali.

¹⁵Ma OMWAMI nabool'la Yoshwa

¹⁶okhulaka abesaalisi abali nibachingile Lisanduku lie Indakano okhurula esioba womuchela kwa Yorodani.

¹⁷Yoshwa yakhola mbwo,

¹⁸ne olwabesaalisi boola khuluchinga lwomuchela, amaatsi komuchela kachiaka okhubira khandi niketsusia tsindulo tsiakwo.

¹⁹Abandu bambukha Yorodani litukhu lielikhumi khumwesi kwokhuranga ma nibalomba ekambi yabwe mwitookho lia Giligali, eililiebukwe wa Yeriko.

²⁰Habwene yaho Yoshwa yasichikha amachina likhumi nakabili akahinibwa mu Yorodani.

²¹Nabool'la abandu ba Isiraeli mbu, “Amatukhu ketsanga, olwa abaana benywe bakhamureebe esiamachina yaka kamanyianga,

²²mwakhababool'e khukelitukhu liabandu ba Isiraeli bambukha omuchela kwa Yorodani khwiloba eliomu.

²³Mubabool'le mbu OMWAMI Nyasaye yakhamia amaatsi ka Yorodani khulwenywe okhwola olwa mwali nimukhalanisie, singa butswa yakhamia amaatsi ke Inyanza inzakhanyu khulwefwe.

²⁴Khulwesifune yisi siomundu wosi musibala yakhamanye singa obunyali bwo MWAMI buli obukhongo, khandi mwakhahelesie OMWAMI Nyasaye wenywe oluyali emihika nemihika.”