Read lunyore YOSHWA 5 Bible Online

YOSHWA 5 - lunyore bible

YOSHWA 5

¹Abaruchi ba Baamori abali emasaba wa Yorodani nende abaruchi bosi aba Bakanaani abali bokhutsindulo tsiokhunyanza ya Mediterenia bahul'la mbu OMWAMI yakhamia omuchela kwa Yorodani okhwola olwabandu ba Isiraeli bali nibakhalanisie nibambukhile. Kho bahambwa noburi obukali ma nibarimukhwa ikholo khulwa Baisiraeli.

²OMWAMI yabool'la Yoshwa mbu, “Lomba emibano okhurula khumachina ma osebe Abaisiraeli.”

³Kho Yoshwa yakhola singa obwo OMWAMI yali nalakile, ma nasebela Abaisiraeli hasikulu esilangangwa Haraloti (mbu Esikulu sie Es'sebo).

⁴Olwa abandu Baisiraeli barula Emisiri, bosi abes'saatsa bali nibamala okhusebwa. Ne kata mbwo muluhono lwemihika amakhumi kane echiabandu bamala nibakhalanianga esitsiimi, abaana bosi sibaali nibasebwakhwo tawe. Khandi, mukhumal'likha khwamatukhu kene yako abandu bosi abarula Emisiri nibahela emihika chiokhukhupana mwihe bali nibamala okhufwa sichila sibamuhelesia OMWAMI oluyali tawe. Singa obwa OMWAMI yesuha, sibali okhuhuchil'lwa okhulola esibala esinolu esiobuhinda, esiayali niyasubisia abakuka babwe tawe.

⁷Abasiani babandu yaba sibaali kata nibasebwa tawe, ne lwali olwibulo yilu oluhia olwa Yoshwa yali okhuseba.

⁸Olunyuma, olwa es'sebo siali nisihweye, lihanga liosi liamenya mukambi okhwola olwa abasebwa bali nibahonne.

⁹OMWAMI nabool'la Yoshwa mbu, “Olwaleelo mal'le okhukhuhiniakhwo es'simba murwe esiokhuba omuhambe mu Misiri.” Niko akachila habundu hene yaho nihalangwa Giligali[1], kata okhwola leelo.

¹⁰Olwa Abaisiraeli bali nibasili mukambi aha Giligali khusipaapi esiali ahembi Yeriko, bali okhulia lisabo lie Pasaka omukolooba kwelitukhu lielikhumi nakhane eliomwesi yikwo.

¹¹Litukhu elialondakhwo lwali olwokhuranga okhuliakhwo ebiokhulia ebiaraakwa mu Kanaani, obuswache obusambe nende omukaati okurali mwo amamela.

¹²Amana kalekha okhukwa olwene yilwo, ne Abaisiraeli sibakanyoolakhwo khandi tawe. Okhurula olwene yilwo balitsanga ebiokhulia ebiarakwa mu Kanaani.

¹³Olwa Yoshwa yali ahembi Yeriko, nonoho yalola omundu nasinjiye imbeli uwe natil'le olukanga. Yoshwa yatsia khuye namureeba; “Ibe oli mulala khubasikari befwe nohomba oli omusuku?”

¹⁴Omundu tsana nakalusia naboola, “Sindi mulala khuboboye yabo tawe. Ndi hano singa omwemeli wamahe ko MWAMI.” Yoshwa yakwa hasi mukhwekayakaya ma naboola, “Ndi omurumwa uwo, omwami. Wenyanga khole sina?”

¹⁵Ne omwemeli wamahe ko MWAMI uyo namubool'la, “Hinia ebilaaro bibio mubilenje sichila, ahosingiye hano nahatsienukhu.” Ma Yoshwa nakhola singa obwa yali nabooleywe.