Read lunyore YOSHWA 6 Bible Online

YOSHWA 6 - lunyore bible

YOSHWA 6

¹Ebilibwa bia Yeriko biali nibiekalwa ma nibialindwa khulwokhwikal'la Abaisiraeli esioba. Siyaliho omundu onyala okhwinjila nohomba okhurula mwitookho tawe.

²OMWAMI yabool'la Yoshwa, “Retsanga Yeriko mumakhono kaako, nende abaruchi balio nende abasikari balio abalwenyukhu bosi.

³Ibe nende abasikari baabo mubotokhane litookho yili l'lala khwitukhu khulwa amatukhu kasasaba.

⁴Abesaalisi bane nabataru, abokhukhupa tsinzika bemele imbeli we Lisanduku lie Indakano. Khwitukhu liakhane nakhataru ibe nende abasikari baabo mubotokhane litookho yili hali khane nakhataru olwa abesaalisi nababe nibakhupanga tsinzika.

⁵Ma bakhupe liyoosi elala khulwoluhono. Olwabandu nabahulile liyoosi yilio, bosi bahanzukhe butinyu, ne amasisi Kelitookho kalabungulukha. Ma omukanda kwosi okwabasikari nakutsie silunji mwitookho.”

⁶Yoshwa yalanga abesaalisi ma nababool'la, “Bukule Lisanduku lie Indakano, ma bane nabataru khwinywe batsie imbeli walio, nibachingile tsinzika.”

⁷Ma nalaka abandu baabe bachiake okhubotokhana litookho, halala nomukanda okuli nebilasan'nwe nikwemeye imbeli we Lisanduku lie Indakano yo MWAMI.

⁸Olwa Yoshwa yali namal'le okhul'loma, abesaalisi abali netsinzika tsine natsitaru nibarula nibatsia nibatsikhupanga. Inyuma weyaba, betsa abesaalisi abali nibachingile Lisanduku lie Indakano.

⁹Omukanda okuli nebilasan'ne kwali nikubaranjiliye imbeli; ma abasikari bokhulinda inyuma nabo nibalondakhwo.

¹⁰Nebutswa Yoshwa yali namal'le okhulaka abandu baabe balekhe okhukhupa liyoka khandi, baral'loma ling'ana okhwola olwaahaana lilako.

¹¹Kho yabool'la omukanda kwabandu yiku okhubukula Lisanduku lie Indakano yo MWAMI okhubotokhana litookho l'lala. Ma nibakalukha mukambi nibakonamwo.

¹²Yoshwa yabuukha m'mabwebwe omukamba kwalondakhwo, ma abesaalisi abachingile Lisanduku lie Indakano nibalibukula.

¹³Abesaalisi bane nabataru abali netsinzika tsine natsitaru nibarula nibatsia imbeli we Lisanduku lie Indakano khandi nibakhupanga tsinzika. Abasikari abali nende ebilasan'nwe bali okhutsia imbeli ma abasikari bokhulinda inyuma nabo nibalondakhwo oluhono yilu lwosi tsinzika tsiali nitsikhupanga.

¹⁴Mwitukhu liakhabili yili babotokhana litookho khandi l'lala ma khandi nibakalukha mukambi. Bakhola mbwo khulwa amatukhu kasasaba.

¹⁵Litukhu liakhane nakhataru babuukha mukamba tsuli khandi nibabotokhana litookho esia khane nakhataru munjila indelwa iyio. Yili nilio litukhu lionyene eliababotokhana litookho esiakhane nakhataru.

¹⁶Okhubotokhana olwakhane nakhataru, abesaalisi nibali ahembi okhukhupa tsinzika, Yoshwa yalaka abandu baabe okhukhupa liyoka, ma naboola, “OMWAMI umuheye litookho!

¹⁷Litookho nende ebindu biosi ebilimwo okhwola bimululwe biosi singa esihanwa khu MWAMI. Litamba Rahabu nende ebeinyumbaye bonyene balekhwe, sichila yabisa abalambuuli befwe bamasilisi.

¹⁸Nebutswa murabukulakhwo esindu siosi esiokhumululwa tawe, nimuba nimubukula namuleere omunyakhano nende obwononekhu khukambi ya Baisiraeli.

¹⁹Esindu siosi esialombwa khufetsa, etsahabu, omukasa nohomba esibia sireywe sibeka khulwo MWAMI. Nesiokhubikhwa mwibiikhilo lio MWAMI.”

²⁰Ma abesaalisi nibakhupa tsinzika. Ne olwabandu bahulila, bahanzukha okhuhanzukha okhukali ne amasisi nikabungulukha. Ma omukanda kwosi okwelihe nikwanichila silunji khusikulu nikwinjila mwitookho nikulibukula.

²¹Barumikhila tsinganga tsiabwe okhwira siomundu wosi owali mwitookho, abasaatsa nabakhasi, ababuukha nende abasakhulu. Khandi nibeera tsing'ombe, amakondi nende etsisikhili.

²²Yoshwa nabool'la abandu babili abali okhurumwa singa abalambuuli bamasilisi mbu, “Tsie munyumba yelitamba Rahabu mumlileere esioba nende abeinyumba yalio, singa obwa mwali okhulisubisia.”

²³Kho batsia nibaleera Rahabu esioba, halala nende samwana nende nyina, abasiani babwe nende abeinyumba yiye bosi. Bababukula bosi, ma nibabahila ahokhunyool'la omulembe ahembi nende ahe ekambi ya Baisiraeli yali.

²⁴Ma nibahambia litookho nibalisamba liosi, halala nebindu biosi ebialimwo, okhuhiiniakhwo ebindu ebialombwa khufetsa, khutsahabu, khumukasa nende khusibia, ebiabamala nibabukula nibara mwibiikhilo lio MWAMI.

²⁵Nebutswa Yoshwa yahonia obulamu bwelitamba Rahabu nende abekho balio bosi, sichila liabisa abalambuuli bamasilisi babili aba Yoshwa yaruma okhutsia Yeriko. (Abetsukhulu baabe basimenyele mu Isiraeli okhwola leelo.)

²⁶Olwene yilwo Yoshwa yahaana esiesuho naboola, “Omundu wosi owakhateema okhwombokha litookho lia Yeriko obuhia yakhabe musilaamo esio MWAMI ahaananga. Uyo owakhalombe omusinji kwalio, omusianiwe owambeli yakhafwe. Uyo owakhombokhe ebilibwa bialio, omusianiwe omukhokosi yakhafwe.”

²⁷Kho OMWAMI yali na Yoshwa ma ifuma yiye nelanda musibala siosi.