Read lunyore YOSHWA 7 Bible Online

YOSHWA 7 - lunyore bible

YOSHWA 7

¹Lilako lio MWAMI khu Isiraeli okhubula okhubukula esindu siosi okhurula Yeriko esiakhabeye esiokhumululwa siliali okhulondwa tawe. Omundu owalangwa Akani yali okhwikala amarwi naralonda lilako yilio tawe, ma OMWAMI nabihil'lwa Abaisiraeli. (Akani yali omusiani wa Karimi omwitsukhulu wa Sabudi owesilibwa sia Sera, owolwibulo lwa Yuda.)

²Yoshwa yaruma abandu okhurula Yeriko okhutsia mwitookho lia Ai, eliali ebukwe welitookho lia Betseli, ahembi Betsaweni, nabalaka mbu batsie okhulambuula esibala isio. Olwabali nibakhol'le mbwo,

³bakalusisia Yoshwa ling'ana nibaboola; “Oranyakhana noruma abandu bosi okhuseera litookho lia Ai tawe. Orume butswa abandu abahela etsielefu tsibili nohomba tsitaru. Oraruma omukanda kwosi okwelihe okhutsia yila okhulwana tawe; silili litookho likali tawe.”

⁴Kho Abaisiraeli etsielefu tsitaru batsia okhuseera Ai, nebutswa kabahakia okhwilukha nibakalukha inyuma.

⁵Abandu ba Ai babakhunga okhurula musilibwa sielitookho okhwola khu Sebarimu nibeera abandu abahela ahembi amakhumi kataru nabasasaba nibaserengeranga okhurula khusikulu. Abaisiraeli barimukhwa ikholo ma nibaba noburi obukali.

⁶Yoshwa nende abemeli ba Isiraeli barandula tsingubo tsiabwe mukhubelela, nibakwa hasi imbeli we Lisanduku lie Indakano yo MWAMI, nibakonaho okhwola mukolooba, nibebakha olukhuukhi khumirwe chiabwe okhumanyia esibeela siabwe.

⁷Yoshwa naboola, “OMWAMI Nyasaye! Busina nokhwambusia okhukhuleera injelekha wa Yorodani? Wakhuleera khulwo okhukhura mumakhono ka Baamori mbu bakhumulule? Busina khuratsililiye okhumenya oluchelekha lundi lwa Yorodani?

⁸Ndakhaboola sina, E OMWAMI, luno Abaisiraeli bamal'le okhwilukha okhurula khubasuku?

⁹Abakanaani nende abandu bandi bosi musibala nabahulile yako; ma nabakhubotokhane ma nabakhwire fwesi. Nawe nokhole sina khulwo okhusoola oluyali lulwo?”

¹⁰OMWAMI nabool'la Yoshwa, “Sinjila. Busina okon'ne hasi singa mbu?

¹¹Abandu ba Isiraeli bon'ne! Bamal'le okhufunaka indakano eya ndakhola n'nabo. Bamal'le okhubukula khubindu ebiakhalachilwa esiina khulwokhumululwa. Bayiba ebindu yibio, nibabeha, ma nibabira khubindu biabwe abene.

¹²Yisi nisio esichil'le Abaisiraeli nibabula okhuleka abasuku babwe. Bali okhwilukha okhurula khubo sichila bo abene bali nibamal'le okhukhalachilwa okhumululwa! Sinambe halala n'nenywe khandi nimuramulula ebindu biamwalakwa mbu murabukula tawe!

¹³Sinjila! Tsienula abandu obarechekhe okhwitsa imbeli wanje. Babool'le naberechekhe mukamba, sichila Ise, OMWAMI Nyasaye wa Isiraeli, namboole mbu, ‘Abaisiraeli muli nende ebindu bindi ebia ndamulaka mbu mumulule! Simunyala okhuleka abasuku benywe olwa musili okhuhiniaho ebindu yibi tawe!’

¹⁴Kho babool'le mbu mukamba nabaleerwe ebulafu, siolwibulo khulwibulo. Olwibulo olwa nanzahule nalwitse ebulafu, siesilibwa khusilibwa. Esilibwa siananzahule nasitse ebulafu: inyumba khunyumba. Inyumba yananzahule nayitse ebulafu, omundu mulala siamulala.

¹⁵Uyo owanobe niyahuywe ma nanyoolwe nebindu ebialakwa okhumululwa nasambwe, halala nabeinyumbaye nende biosi ebiali n'nabio, sichila uler're es'simba murwe esibi khu Baisiraeli khandi ufunakile Indakano yanje.”

¹⁶Mukamba tsuli litukhu lialondakhwo Yoshwa yaleera Abaisiraeli ebulafu, siolwibulo khulwibulo, ne olwibulo lwa Yuda lwahulwa.

¹⁷Yaleera olwibulo lwa Yuda ebulafu, siesilibwa khusilibwa ma esilibwa sia Sera nisiahulwa. Ma naleera esilibwa sia Sera ebulafu, sieinyumba khunyumba, ne inyumba ya Sabudi niyahulwa.

¹⁸Yamala naleera abeinyumba ya Sabudi ebulafu, omundu mulala siamulala, ma Akani omusiani wa Karimi omwitsukhulu wa Sabudi niyahulwa.

¹⁹Yoshwa namubool'la, “Omusiani wanje, boola akatooto kaako hano imbeli wo MWAMI, Nyasaye wa Isiraeli ma weyame. Mbool'la luno akawakhola. Orateema okhukabisa okhurula khu ise tawe.”

²⁰Akani nakalusia naboola, “Nakatooto. Ndayon'na OMWAMI Nyasaye wa Isiraeli, ne yaka niko akandakhola.

²¹Mubindu ebiakhwabukula ndalolamwo ingubo indahi, efetsa ehela ahembi etsikilo tsibili, nende esitonye sietsahabu esihela obusiro obuyomba enusu yekilo. Ndali okhubikhayilwa okhusila ma nimbibukula. Nobinyoole mbiayabilwa mwiheema lianje, nende efetsa isi walio.”

²²Kho Yoshwa yaruma abandu bandi, abelukha nibatsia khwiheema ma nibanyoola mbu ebindu ebiali okhukhalachilwa okhumululwa biali tooto nibiayabilwamwo, nende efetsa isi weliheema.

²³Babihinia mwiheema, nibabihila khu Yoshwa nende khu Baisiraeli bosi ma nibabialisia hasi imbeli wo MWAMI.

²⁴Yoshwa, halala na Baisiraeli, babukula Akani, efetsa, ingubo, nende esitonye sietsahabu, halala nabasiani ba Akani nende abakhaanabe, tsing'ombetsie, etsisikhili, nende amakondike, liheemalie, nende ebindu biosi ebia yali n'nabio; ma nibamuhila mwibanda liomunyakhano.

²⁵Ma Yoshwa naboola, “Busina oleer're omunyakhano kufwana mbu khu ifwe? OMWAMI yetsa okhuleera omunyakhano khuibe luno!” Abandu bosi nibalasa Akani namachina ma nafwa; khandi balasa abeinyumbaye namachina ma nibabasamba nende ebindu ebiabali n'nabio.

²⁶Nibara esifuumi esikali esiamachina khuye, esiliho okhwola leelo. Niko akachilanga habundu bwene hala hasilangwa mbu libanda lia Akori[2]. Ma Omwami siyatsilil'la okhuba nelirima tawe.