Read lunyore YOSHWA 8 Bible Online

YOSHWA 8 - lunyore bible

YOSHWA 8

¹OMWAMI yabool'la Yoshwa mbu, “Bukula abasikari bosi mutsilil'le okhutsia khwitookho lia Ai. Muraria nohomba muresikoka tawe. Ise namuhelesie obulechi khumuruchi wa Ai; abandube nababe abenywe halala nelitookho liosi nende esibala siosi.

²Namukhole khu Ai nende omuruchi walio akamwali okhukhola khu Yeriko nende omuruchi walio. Nebutswa luno namubiikhe ebindu bialio nende tsing'ombe, nabibe ebienywe. Mwerechekhe okhuseera litookho bungoyingoyi okhurul'la inyuma.”

³Ma Yoshwa yamala niyerechekha okhutsia Ai nende abasikari baabe bosi. Yali okhutola etsielefu amakhumi kataru okhurula mumikanda chichie emilahi okhusila echia abasikari ne nachiruma esioba butukhu

⁴nende amalako yaka mbu, “Mwebise elubeka lundi lwelitookho, nebutswa muratsia ehale okhusila okhurula khulio tawe. Mwerechekhe okhuliseera.

⁵Abandu banje halala n'nase nakhwinjil'le litaala. Olwabandu ba Ai nabarule esioba okhwitsa okhukhuseera, nakhusukhane nende okhwilukha, singa khwakhola olwokhuranga.

⁶Nabakhulondel'le okhwola olwa nakhube nikhubahil'le ehale okhurula khwitookho. Nabapaale mbu khubelukhanga, singa obwa khwakhola olwokuranga.

⁷Ma namurule mubwebiso bwenywe nende okhuleka litookho. OMWAMI Nyasaye wenywe nalihaane khwinywe.

⁸Nimumal'le okhuleka litookho, mulisambe nomul'lo, singa obwo OMWAMI alachile. Yaka niko amalako kenywe.”

⁹Kho Yoshwa yabaruma esioba, ma nibatsia mubukono bwabwe obwokhwebisa nibalindil'layo, olubeka lwemasaba wa Ai, hakari ha Ai nende Betseli. Yoshwa yakona mukambi.

¹⁰Khale mukamba tsuli Yoshwa yabuukha nalanga abasikari okhwitsa halala. Ma ye nende abemeli ba Isiraeli nibabemel'la okhutsia Ai.

¹¹Abasikari halala n'naye batsia khubwinjil'lo bukali bwokhutsia mwitookho ma nibombokha ekambi khulubeka lwesinyolu. Ne libanda liali hakari habwe nende Ai.

¹²Yabukula abandu abahela ahembi etsielefu tsirano nabara mubukono bwokhwebisa khulubeka lwemasaba we litookho, hakari wa Ai nende Betseli.

¹³Abasikari bali nibachan'nwe khulwe lihe. Ekambi yabasikari ingali yali khulubeka lwesinyolu welitookho ne abasikari bandi bali khulubeka lwemasaba. Yoshwa yakona mwibanda.

¹⁴Olwomuruchi wa Ai yalola abandu ba Yoshwa, yatetekhana. Ye nende abandu baabe bosi barula okhutsia mwibanda lia Yorodani okhulwana Abaisiraeli habundu halala singa olwokhuranga, naramanya ali ahembi okhuseerwa okhurul'la inyuma.

¹⁵Yoshwa nende abandu baabe bekhola singa abelukhanga, ma nibelukha nibahengele musitsiimi.

¹⁶Abandu bosi mwitookho bali nibalangilwe okhwitsa halala okhubalondel'la, ne olwa bakhunga Yoshwa, batsilil'la okhwesunda ehale okhurula khwitookho.

¹⁷Siomundu mu Ai yalondel'la Abaisiraeli, ne litookho nililekhwa nilialamile, sila omundu wokhulisoola.

¹⁸Ma OMWAMI nabool'la Yoshwa, “Sonia lifumolio khwitookho lia Ai, ndihaananga khuibe.” Yoshwa yakhola singa yabool'lwa,

¹⁹ne olwa yachinga omukhonokwe, abandu abali nibebisile babuukha bwangu, nibelukha nibenjila mwitookho ma nibalileka. Bwangu bwangu nibalihambia omul'lo.

²⁰Olwabandu ba Ai bahenga inyuma, balola omwosi nikutumanga mwikulu. Siyaliho injila yosi eyabahonokokhelamwo tawe, sichila Abaisiraeli abali nibelukhiye musitsiimi luno basukhana nibabaseera.

²¹Olwa Yoshwa nende abandube balola mbu abandu bali nibalekele litookho ma khandi liali nilihitsanga, bakalukhana nibachaaka okhwira abandu ba Ai.

²²Abaisiraeli abali mwitookho bali okhwitsa nibenjila mubulwani. Kho abandu ba Ai bali okhunyoola nibafumbiywe tsimbeka tsiosi na Baisiraeli, ma bosi nibeerwa. Siyaliho owali okhwilukha khandi siyaliho kata mulala owali okhuhona,

²³narali omuruchi wa Ai yenyene. Yali okhutilwa ma nahilwa aha Yoshwa yali.

²⁴Abaisiraeli bali okhwira siomundu khubasuku abali musitsiimi ahabali nibabataabisie okhutsia. Ma nibakalukha mu Ai ma nibeer'rayo siomundu wosi.

²⁵Abandu ba Ai bosi abali okhwirwa litukhu yilio bali etsielefu likhumi natsibili abasaatsa nende abakhasi.

²⁶Yoshwa yatsilil'la okhusonia lifumolie khu Ai ne siyalikokakhwo hasi tawe okhwola olwabandu bosi bali nibamal'le okhwirwayo.

²⁷Abaisiraeli bebukul'la tsing'ombe nende ebindu ebiayaaywa mwitookho, singa obwo MWAMI yali nabooleye Yoshwa.

²⁸Yoshwa yasamba Ai ma nalilekha butswa likunda. Lisili butswa mbwo okhwola leelo.

²⁹Yasunga omuruchi wa Ai khumusaala ma nalekha omubili kukwe ho okhwola mukolooba. Eliuba nilinjilanga Yoshwa yalaka omubilikwe kuhinibwe, ma nikufubwa hasi mubwinjil'lo bwokhutsia musilibwa sielitookho. Nibakufuunikha nende esifuumi esikali esia amachina, esisiliho okhwola leelo.

³⁰Yoshwa yombokhela OMWAMI Nyasaye wa Isiraeli olusambwa khusikulu sia Ebali.

³¹Yalulomba okhulondokhana namebaalo aka Musa, omurumikhili wo MWAMI, yali niyahelesia Abaisiraeli. Singa obwa kaboolanga mu Malako ka Musa mbu, “Olusambwa olwalombwa namachina akasili okhukhalakwakhwo nende ebitiyilo biesibia.” Bakhol'lakhwo omusango kwokhusambwa khu MWAMI, ma khandi nibahaana emisango.

³²Habwene yaho imbeli wa Baisiraeli Yoshwa yahandika khumachina amahandiko kandi aka Malako ka Musa yali niyahandika mumoni mwa Baisiraeli.

³³Abaisiraeli, nende abemeli babwe, abakhongo, nende abakhalachi, kata khandi abacheni abamenyibwe basinjila khutsimbeka tsibili etsie Lisanduku lie Indakano yo MWAMI, nibahengele abesaalisi abali nibalichingile. Omukanda mulala kwabandu kwasinjila nikukhupile emikongo chiabwe khusikulu sia Kerisimu ne okundi nikukhupile emikongo chiabwe khusikulu sia Ebali. Musa omurumikhili wo MWAMI yali niyabalaka bakhole mbwo olwe inyinga yabwe eyokhunyoola ikhabi nebe niyool'le.

³⁴Yoshwa yamala nasoma Amalako kosi butinyu, natsokanianga tsikhabi nende ebilaamo, butswa singa kahandiikwa musitapu sia Malako.

³⁵Yoshwa yali okhusomela omukanda yikwo kwosi kwalimwo abakhasi nende abaana kata khandi abacheni abamenyibwa mubo.