Read lunyore YOSHWA 9 Bible Online

YOSHWA 9 - lunyore bible

YOSHWA 9

¹Obulechi bwa Baisiraeli bwamanyikha khubaruchi bosi abali emasaba wa Yorodani mubikulu, hasi webikulu, ma okhutsilil'la khutsindulo tsiosi etsie Inyanza ya Mediterenia okhwola Lebanoni eli esinyolu. Abene yabo bali abaruchi ba Bahiti, Abaamori, Abakanaani, Abaperisi, Abahiwi, nende Abayebusi.

²Bosi beetsa halala ma nibahambana okhulwana Yoshwa nende Abaisiraeli.

³Abahiwi abamenyanga mu Kibeoni, bahul'la aka Yoshwa yali nakhol'le khumatookho ka Yeriko nende Ai,

⁴ma nibachooma okhumukaata. Batsia nibanyoola ebiokhulia ma nibatuukha etsisikhili tsiabwe mumakunia akarandukha nende emitaata chiewaini chiamaseelo echiakhupwa ebilaka.

⁵Nibebiikha tsingubo tsiamatasi nende ebilaaro ebiakhunguha ebiali nibiakhupilwenje ebilaka. Emikaati echia babukula chiali emiomu ma nichiakhupa olukukhu.

⁶Kho nibatsia mukambi ha Giligali ma nibabool'la Yoshwa nende Abaisiraeli mbu, “Khurula musibala siehale. Khwenyanga mulombe indakano n'nefwe.”

⁷Abaisiraeli nibaboola mbu, “Nisina esiakhachila khulombe n'nenywe indakano? Haundi mumenyele ahembi.”

⁸Nibabool'la Yoshwa, “Khuli butswa abarumikhilibo.” Yoshwa nabareeba, “Inywe ninywe beena ne murul'le hena?”

⁹Ma nibamubool'la mbu, “Khurul'le musibala siehale okhusila, Omwami, sichila khwahulila ako MWAMI Nyasayewo. Khwahulila amang'ana amenji akayakhola mu Misiri

¹⁰nende akayakhola khubaruchi babili aba Amori abalinji ebukwe wa Yorodani: omuruchi Sihoni owa Heshiboni nende omuruchi Ogu owa Bashani, abamenyanga musibala sia Ashitarotsi.

¹¹Abemeli befwe nende abandu bosi abamenyanga musibala siefwe bakhubooleye khunyoole ebiokhulia ebihela ma khutsie okhwakaana n'nenywe. Khwali okhubool'lwa khwekhole abatiyi benywe ma khumureebe mulombe indakano n'nefwe.

¹²Lole ebiokhulia biefwe, olwa khwarula ingo n'nabio ma nikhusimukha okhwitsa okhwakaana n'nenywe biali nibisili ebiyu. Nebutswa lole! Luno biomele ma bikhupile olukukhu.

¹³Olwa khwetsusia emitaata chiamaseelo nende ewaini, chiali emiyia, nebutswa lole chirandukhile. Tsingubo tsiefwe nende ebilaaro bikhunguyile khulwo oluchendo olurambi.”

¹⁴Abaisiraeli bahuchil'la ebiokhulia bindi okhurula khubo, nebutswa sibareeba OMWAMI ling'ana khuko tawe.

¹⁵Yoshwa yalomba indakano yobulina nabandu ba Kibeoni ma nabahuchil'la bamenye n'nabo. Abemeli bomukanda kwa Isiraeli besuha okhuhesia indakano iyio.

¹⁶Amatukhu kataru nikahweye olunyuma lwe indakano yali nekhol'lwe, Abaisiraeli bali okhumanya mbu tooto abandu yaba bamenya ahembi khubo.

¹⁷Kho Abaisiraeli bachiaka okhutsia ne olunyuma lwamatukhu kataru boola mumatookho omwabandu yaba bamenya; akali Kibeoni, Kefira, Beerotsi, nende Kiriatsi Yearimu.

¹⁸Abaisiraeli sibaali abanyala okhubeera tawe, sichila abemeli babwe bali nibesuhile khubo muliira lio MWAMI Nyasaye wa Isiraeli. Abandu bosi bali okhwekaana amang'ana yaka khubemeli,

¹⁹nebutswa abemeli nibakalusia mbu, “Khumal'le okhubesuhila muliira lio MWAMI Nyasaye wa Isiraeli. Luno sikhunyala okhubasalisia tawe.

²⁰Okhwola khubalekhe bamenye khulwe esiesuho siefwe. Nikhuba nikhurakhola mbwo Nyasaye nakhuhe esinyasio.

²¹Lekhe bamenye, nebutswa nabakhwasakilenje tsikhwi nibakhusombela amaatsi.” Yaka niko akabemeli baboola.

²²Yoshwa yalaka abandu ba Kibeoni okhuleerwa khuye, ma nabareeba, “Busina mwali okhukhukaata nimukhubool'la mbu mwali nimural'le ehale, olwa mumenyele butswa hano?

²³Sichila mwali okhukhola yaka, Nyasaye umureeyekhwo esilaamo. Abandu benywe nababetsenje abasumba khasotso, nabasakenje tsikhwi nende okhusomba amaatsi khulwe inyumba ya Nyasaye wanje.”

²⁴Nibakalusia Yoshwa nibaboola mbu, “Omwami, khwakhol'le mbwo sichila ifwe abarumikhilibo khwabool'lwa mbu OMWAMI Nyasayewo yalaka omurumikhili uwe Musa okhumuhelesia esibala siosi nende okhwira abandu bosi abamenyangamwo barule imbeli wenywe. Khwakhola mbwo sichila khwali nikhumuriye; khwali noburi khulwobulamu bwefwe.

²⁵Luno khuli mubunyali bwenywe; mukhukholele akamupaalanga namalahi.”

²⁶Kho kano niko aka Yoshwa yakhola: yabasoola ma siyahuchil'la abandu ba Isiraeli okhubeera tawe.

²⁷Munyinga indelwa iyo yabakhola abarumikhili, okhwasaka tsikhwi nende okhusombela abandu ba Isiraeli nende olusambwa lwo MWAMI amaatsi. Okhwola leelo basikholanga omulimo yiku habundu ho MWAMI yahula okhwekayakayilwa.