Read lunyore 2 BATESALONIKE 1 Bible Online

2 BATESALONIKE 1 - lunyore bible

2 BATESALONIKE 1

¹Ise Paulo, Sila nende Timoteo, khumuhandichilanga inywe abandu abekanisa ya Tesalonike, abandu ba Nyasaye Papa nende Omwami Yesu Kristo.

²Esirenda sibe khwinywe, nomulembe okhurula khu Nyasaye Papa wefwe nende khu Mwami Yesu Kristo.

³Abaana befwe, okhwola khumukhupile Nyasaye embwo khasotso khulwenywe. Kali habwene khwifwe okhukhola mbwo sichila obusubili bwenywe bwemeetekhanga munonono, khandi obuyanzi bwasiamulala khwinywe ali n'nabwo khubasie busilananga.

⁴Niko akachila ifwe abene khweitsoomianga khulwe inywe mumakanisa ka Nyasaye. Khweitsoomianga khulwa okhwetinyilisia okhwa mutsilil'langa okhuba n'nakhwo, nende obusubili bwa muli n'nabwo mukhukhupibwa esibi khwenywe khwosi nende obusalili obwa mwakananga n'nabwo.

⁵Yako kosi kamanyianga mbu obukhalachi bwa Nyasaye nobwa habwene ne mukhumalila mulabalwa abakwan'ne okhunyoola Obwami bwa Nyasaye, obuchilanga nimusalila.

⁶Nyasaye alakhola elili lilunji: alalera okhukhupibwa esibi khu yabo abamukhupianga inywe esibi,

⁷nokhumurunga inywe abakhupibwa esibi, okhuhuluukha halala n'nefwe, okhwola khukhubisukha khwo Mwami wefwe Yesu Kristo okhurula mwikulu halala nabamalaika bobunyalibwe,

⁸mulumemo lwomul'lo, okhubakhalachila esiina yabo abafukulanga okhumumanya Nyasaye nende yabo abasulanga okhuhul'la Amang'ana Amalahi ako Mwami wefwe Yesu.

⁹Abene yabo balanyoola esinyasio siokhumalwa okhweinziayo, ne bakhabikhwe ehale okhurula imbeli wo Mwami khandi imbeli woluyali lwobunyalibwe,

¹⁰olwa alitsa khu Litukhu yilio okhuhebwa obukhongo okhurula khubandube, nende oluyali okhurula khubosi abasubila. Nenywe khandi mwakhabe halala n'nabo sichila mwasubila amang'ana aka khwamuribul'la.

¹¹Ne niko akachila nikhumusaayila amatukhu kosi. Khusaayanga Nyasaye wefwe amukhole okhuba abakwan'ne mubulamu obwa yamulanjila okhumenya. Ye alahesia khulwetsingufu tsitsie obwekombi bwenywe bwosi khulwo obulahi ma amalile omulimo kwenywe kwobusubili.

¹²Munjila iyi eliira lio Mwami wefwe Yesu lilanyoola oluyali okhurula mwinywe, nenywe okhurula muye, khulwe esirenda sia Nyasaye wefwe nende esio Mwami Yesu Kristo.