Read lunyore 2 BATESALONIKE 2 Bible Online

2 BATESALONIKE 2 - lunyore bible

2 BATESALONIKE 2

¹Okhulondokhana khumang'ana kokhwitsa khwo Mwami wefwe Yesu Kristo, nokhubukaana khwefwe imbeliwe, khumusaaya abaana befwe,

²mbu murabba abangu bokhukoyanibwa mumapaalo kenywe, kata okhuhenda khulwa amang'ana kabandu mbu Litukhu lio Mwami limal'le okhwola tawe. Haundi kapalwanga mbu khwali okhuboola yaka olwa khwaroobanga nohomba olwa khwakambanga, nohomba kata olwa khwakahandika mubarwa.

³Murahuchil'la okhukaatwa nomundu wosi munjila yosi yosi tawe. Okhuba Litukhu yilio sililetsa Induli yokhumal'likha nesili okhwekhola tawe ma Okundu okubi[1] kulalolekha okwakhalachilwa okhutsia mu Kehena.

⁴Kulafukula sie esindu esiabandu balolanga mbu ni Nyasaye, nohomba kata siesindu esia bekayakayanga, naye aleleng'ania ikulu wabio biosi. Kata omwene alenjila niyekhala mu Hekalu ya Nyasaye niyelanga Nyasaye.

⁵Khane simwitsul'lnga mbu olwa ndali nisili n'nenywe ndamubool'la amang'ana kano tawe?

⁶Ne siliho esindu esikal'langa yaka okhwekhola luno, ne inywe musimanyile. Kho, Omundu omubi alabisukha inyinga nemal'le okhwola.

⁷Okhuba obunyali bwamambiswi kesikalamarwi kasikholanga emilimo; ne uyo okekal'langa alatsilil'la okhukhola mbwo okhwola olwa alahinibwaho.

⁸Ma Omubi uyo alakhabisulwe, nebutswa olwa Omwami Yesu yetsa alamwira nemiiya okhurula m'munwakwe, namukhuya nobulafu obukali bwokhwitsa khukhwe.

⁹Omubi uyo yakhetse netsingufu tsia Setani ne yakhakhole akamangalimwa nende akokhuchenya akobubehi,

¹⁰ne yakharumikhile obukaati bwobubi bwosi khu yabo abakhalachilwa okhutiba. Bakhatibe sichila sibayanza obwatooto, ma kho bahonibwe tawe.

¹¹Khulwe yako Nyasaye abaretsangamwo tsingufu tsiobusiamu tsikhole emilimo mubo okhubakhola mbu basubile khwing'ana liob'behi.

¹²Olwokhumal'likha kabe mbu yabo abanyoolekha nibarasubiye obwatooto, nebutswa nibayanza okhukhola tsimbi, balakhalachilwa esiina.

¹³Kakhuhel'le okhumukhupila Nyasaye embwo khasotso khulwe inywe, abaana befwe, inywe, abo Mwami yayanza. Okhuba Nyasaye yali okhumwela okhurula khale okhuhonibwa mukhutsienulwa khwo Mwoyo khandi khulwobusubili bwenywe mubwatooto.

¹⁴Nyasaye yamulanjila ling'ana yili munjila ya Amang'ana Amalahi akakhwamukambila, kho mube abanyala okhunyoola oluyali lwo Mwami wefwe Yesu Kristo.

¹⁵Kho abaana befwe, muralile, nimuhanda khumechesio katoto yako akakhwamwechesia mukhukamba khwefwe, nende mutsibarwa chiefwe.

¹⁶Omwami wefwe Yesu Kristo omwene, halala nende Nyasaye Papa wefwe, owakhuyanza ifwe khulwe esirendasie ma nakhuha olutswoni olurahwa nende okhunaya okhuralilu,

¹⁷amuhotselesie inywe namutinyilisia khasotso okhukhola nokhuboola akali amalahi.