Read lunyore 2 BATESALONIKE 3 Bible Online

2 BATESALONIKE 3 - lunyore bible

2 BATESALONIKE 3

¹Eliokhumal'likha, abaana befwe, mukhusaayile mbu ling'ana lio Mwami litsitsachil'le okhulanda bwangu nilihuchil'lwa noluyali singa obwaliali mwinywe.

²Khandi musaaye mbu Nyasaye akhuhonie khubandu abasiamu khandi ababi; okhuba sibali bosi abali nobusubili tawe.

³Nebutswa Omwami nomusubilwa, alamuralisia namulinda okhurula khu Mubi uyo.

⁴Nefwe khuli nolutswoni mu Mwami khulwenywe mbu mukholanga khandi mulatsilil'la okhukakhola amang'ana aka khwamulaka.

⁵Omwami amwemel'le mubumanyilisi obukhongo bwobuyanzi bwa Nyasaye, nende mubwesimilisi bwa Kristo ahaananga.

⁶Abaana befwe, khumulaka muliira lio Mwami wefwe Yesu Kristo, mbu mweyahule khubuli mwana wefwe wosi omukara, naba naralonda amang'ana aka khwali okhumuchesia.

⁷Inywe mumanyile siahene mbu okhwola mukhole singa obwa khwali okhukhola. Ifwe olwa khwali n'nenywe, sikhwali abakara tawe.

⁸Sikhwalia esiokhulia siomundu wosi sila okhumurunga tawe. Nebutswa khwakhola emilimo nikhunyakhana; khwatiyanga om'basu nobutukhu mbu khulekhe okhusitohela omundu wosi khwinywe.

⁹Sikhwakhola mbwo sichila khwabula obunyali bwokhusaba obukhonyi okhurula khwinywe tawe; nikarali khwakhola mbwo kho khube esilolelo esiamulonda.

¹⁰Okhuba kata olwa khwali n'nenywe khwamulaka mbu, “Omundu wosi orakhola emilimo, araliakhwo ebilibwa tawe.”

¹¹Khuboolanga yaka sichila khuhul'langa mbu baliho mwinywe abali abakara, abeyinjisianga m'mang'ana kabandi nibarakholakhwo omulimo kwosi tawe.

¹²Kho abafwana mbwo, khubalaka nikhubachetsiyia muliira lio Mwami wefwe Yesu Kristo mbu bakhole emilimo chiabwe nobuholelu, nibalia ebiokhulia biabwe abene.

¹³Nenywe abaana befwe, murachonya okhukhola amalahi.

¹⁴Haundi omundu yakhabaho owakhabula okhukhola amang'ana akakhumurumilanga mubarwa yino. Nikakhaba mbwo mumumanyilisie ne murahambana n'naye tawe, mbu asimbe omurwe.

¹⁵Nebutswa muramuhamba obusuku tawe, nikarali mumuchetsiyie singa omwana wenywe.

¹⁶Ne luno Omwami ohaananga omulembe omwene amuhelesie omulembe amatukhu kosi munjila tsiosi. Omwami abe n'nenywe mwesi.

¹⁷Nomukhono kwanje omwene, mandikanga mbu; Amasiesi okhurula khu Paulo. Nimbwo esimanyilo sianje mutsibarwa tsiosi sili. Nimbwo mandikanga.

¹⁸Esirenda sio Mwami wefwe Yesu Kristo sibe n'nenywe mwesi.