Read lunyore 1 TIMOTEO 1 Bible Online

1 TIMOTEO 1 - lunyore bible

1 TIMOTEO 1

¹Ise Paulo omurumwa wa Yesu Kristo khulwe lilako lia Nyasaye omuhonia wefwe, nende Yesu Kristo oli okhunaya khwefwe.

²Mandichilanga Timoteo, omwana wanje wa tooto mubusubili: Esirenda, netsimbabasi, nemilembe, ebirulanga khu Nyasaye Papa nende Yesu Kristo Omwami wefwe bibe khuibe.

³Nzenyanga omenye Efeso singa obwa ndakhuyungia olwandali ninzitsanga Emakedonia. Abandu bandi bebaalanga amebaalo akarali akatooto, nawe okhwola obakaye mbu baratsilil'la tawe.

⁴Obabool'le balekhe okhulonda khutsingano tsiabandu nende obubali bwetsinzibulo oburali nesihesi, obuleranga butswa obuhingani, oburanyala okhwombokha abandu khubulindi bwa Nyasaye obwamanyikha khulwokhusubila.

⁵Esifune sielilako yili nokhusisimusia obuyanzi oburulanga mumwoyo omusiyikhu namakani amalahi nokhusubila okhurali nobukalama.

⁶Abalala bamal'le okhwebera okhurula khu yibio nibakosia injila yabwe mumahingane kabutswa.

⁷Benyanga okhuba abebaali belilako lia Nyasaye nebutswa sibamanyilisia akababoolanga, nohomba kata akabalakanga nobukufuhalu tawe.

⁸Ifwe khwamanya mbu Lilako nelilahi omundu naba nalirumikhilanga habwene.

⁹Okhwola khwitsul'le mbu, amalako sikalombwa khulwo omundu omulunji tawe, nebutswa khulwa abesikala marwi nende abarengu, nende abararia Nyasaye, aboni nende khulwa abarali abatsienukhu; abanyekani, aberanga abasamwana nende abanyina babwe nende aberi bandi,

¹⁰khulwa abaheyi nende abaheyi basiani abaheyanga nabasiani basiabwe, khulwa abebi bokhukusia abandu, khulwa ababehi abahaananga obukobokheli bwobubehi nende abakholanga ling'ana liosi eliuba ndirahambananga namebaalo katooto.

¹¹Amebaalo yako kanyolekhanga mu Mang'ana Amalahi akandahebwa mbu ngakambe, Amang'ana Amalahi akobukhongo bwa Nyasaye owitsomibwanga.

¹²Mboolanga embwo khu Yesu Kristo Omwami wefwe, oumbetsanga tsingufu khulwe emilimo chianje. Mukhupilanga embwo sichila yalola mbu ise ndi ohel'le ma, niyanzahula okhumurumikhila.

¹³Ise olwokhuranga ndanyeka eliira lilie khandi ndali owokhukhupia Omwami esibi nende okhumusandia. Nebutswa Nyasaye yambeela tsimbabasi, sichila ndali nisili okhuba nobusubili khandi ndakholanga mukhukorwa.

¹⁴Ne Omwami yatsukhil'la esirenda sisie esinji khu ise ma niyamba obusubili nobuyanzi obuli obwefwe mu Yesu Kristo.

¹⁵Ling'ana yili niliokhusubilwa elikwan'ne okhuhuchil'lwa nabandu bosi, mbu, Kristo Yesu yetsa musibala ahonie aboni ne ise ndi owetsimbi tsinyinji okhuyomba;

¹⁶nebutswa Nyasaye yambeela tsimbabasi mbu mu ise owokhuranga mutsimbi Yesu Kristo amanyie habulafu okhwesimilisia khukhwe khwosi, mbu mbe esimanyilo esie yabo abalisubila khuye olweinyuma ma batoole obulamu oburahwa.

¹⁷Yee, khu Mwami oweinziayo, orafwitsanga, oralolekhanga, Nyasaye oli mulala yenyene, olukoosi nobukhongo bibe khuye inziayo. Amina.

¹⁸Omwana wanje Timoteo, khuhetsanga lilako yili olilinde, elili singa amang'ana akoburoobi akaboolwa mumatukhu akabira khuibe. Rumikhila amang'ana yako singa esilasan'no sisio mbu olwane obulahi;

¹⁹notinyanga mubusubili bubwo nende omwoyo omulahi. Abandu balala bara elubeka ebindu yibio, ma obusubili bwabwe nibukora kupu.

²⁰Humenaya nende Alekisanda bali abalala khubene yabo; aba ndahana okhuhebwa esinyasio na Setani, mbu balekhe okhunyeka Nyasaye.