Read lunyore 1 TIMOTEO 3 Bible Online

1 TIMOTEO 3 - lunyore bible

1 TIMOTEO 3

¹Ling'ana yili neliokhusubilwa: Omundu naba narunanga omulimo kwokhuba omwemeli mwikanisa yekombanga omulimo omulahi.

²Kho kenyekhanga omwemeli alekhe okhuba nesikha, abe omusaatsa oli nomukhasi mulala yenyene, abe owokhwekaya khumang'ana amabi, owamakani akobuchesi, oweifwo indahi, owokhwinjisia abacheni mungomwe; okhwola abe omwibaali omulahi;

³arabba owokhukholwa namalwa, nohomba omundu owobusoolo nebutswa omuhoma, orali orayanza obusoolo, khandi orayanzanga amapesa.

⁴Okhwola alinde obulahi abeinyumba yiye omwene; ne abaanabe babe abokhwelela nende okhwetembelesia khuye.

⁵Okhuba omundu naba naramanya okhulinda abeinyumba yiye bulahi, yakhatenda mbwena likanisa lia Nyasaye?

⁶Arakhaba omusubili omweka tawe, khase yakhatsalikha ma yakhakhalachilwa esiina singa Setani yakhalachilwa.

⁷Kenyekhanga waba owoluyali olulahi khubandu besioba welikanisa; khase yakhaba nende es'simba murwe narechelwe nende Setani.

⁸Abakhonyel'li mwikanisa khandi bakwana babe abandu beifwo indahi, abasubilifu, abaranywetsa ewaini inyinji, abarali abokhulangukhila amapesa.

⁹Okhwola bahande khubwatooto bwobusubili obwabisulwa mumwoyo omusiyikhu.

¹⁰Ne abene yabo batemwe mbelio; kho olweinyuma nibaba nibabula esikha banyala okhurumikha singa abakhonyel'li.

¹¹Abakhasi babwe khandi babe abeifwo indahi, abarali abokhwikhal'la abandu, abokhwekaya okhukhola amang'ana mabi, abasubilwa mumang'ana kosi.

¹²Omukhonyel'li womukanisa akwana abe omusaatsa womukhasi mulala, abe onyala okhulinda abaana baabe nende abeinyumba yiye obulahi.

¹³Okhuba abarumikhanga bulahi singa abakhonyel'li banyoolanga oluyali olulahi abene, khandi banyoolanga tsingufu tsingali mukobusubili bwabwe mu Yesu Kristo.

¹⁴Khuhandichilanga ebarwa yiyi ninaayanga okhwitsa khu ibe bwangu.

¹⁵Nebutswa nimba nindakhasisil'la, khuhandichilanga ebarwa yiyi ekhumanyie singa obwabandu bakwan'ne okhukhola munyumba ya Nyasaye, eyili niyo likanisa lia Nyasaye olimwoyo, niyo esiilo yatooto nende omusinji kwatooto.

¹⁶Abulaho owakhambakhana obwelibiso liobusubili bwefwe mu Yesu Kristo lili likhongo: Yalolekha nali mwikondo liomundu, Namanyibwa okhuba omulunji muliiba lio mwoyo, abamalaika nibamulola. Amang'ana kaake kakambwa mutsimbia. Abandu abomusibala nibamusubila, nabukulwa nahilwa mwikulu.