Read lunyore 1 TIMOTEO 5 Bible Online

1 TIMOTEO 5 - lunyore bible

1 TIMOTEO 5

¹Oramulul'la omundu omusakhulu tawe, nebutswa ol'lome khuye singa obwa wakhal'lomele napapa uwo. Okhol'le ababuukha singa obwa wakhakhol'la abamwabobo.

²Abasiele obakhol'le singa obwa wakhakhol'la abamama baabo; ne abakhaana obakhol'le singa obwa wakhakhol'la ababotso baabo mubusiyikhu bwosi.

³Ohelesie abakhasi abali abalekhwa basiahene oluyali.

⁴Nebutswa omukhasi omulekhwa naba nali nabaana nohomba abetsukhulu, okhwola barange okhweka okhumanyia oluyali khubeinyumba yabwe, nokhubatenda abebuli nabakuka babwe, sichila ling'ana yili neliokhuyanzisia mumoni mwa Nyasaye.

⁵Uyo oli omulekhwa siahene, nalekhwa yenyene, narali nomundu wokhumukhonya, wabiikha okhunaaya khukhwe mu Nyasaye ne atikanga mukhusaaya om'basu nobutukhu nareeba obukhonyi.

⁶Nebutswa owehananga khukhweyanzisia wamala okhufwa nasili mwoyo.

⁷Amang'ana yaka okalake mbu barakhanyoolekha nesikha tawe.

⁸Nebutswa omundu wosi naba nabula okhutenda abekho baabe, ne okhusila muno abeinyumba yiye yene, omundu mwene uyo wamala okhwambakhana obusubili, khandi nomubi okhuyomba omundu orali omusubili.

⁹Omundu sanyala okhubalwa singa omulekhwa nasili okhwosia emihika amakhumi kasasaba tawe. Okhumeetakhwo okhwola abe niyalinji omusubilwa womusaatsa mulala,

¹⁰okhwola abe noluyali khumilimo chichie emilahi: Omukhasi owakhusia abaana baabe obulahi, niyenjisia abacheni bulahi, nakhola emilimo chiokhwetutuyia khubasubili basie, nakhonyel'la abandu abanyakhananga, niyakholanga siomulimo omulahi nende nesinani.

¹¹Nebutswa abakhasi abalekhwa abasili abayia obakaye; sichila olwa okhwekomba khwabwe khubalomba okhwenya okhutesibwe, nibarula khu Kristo,

¹²ne nibaba nesikha khulwa okhufunaka esiesuho esiabesuha khuye olwokhuranga.

¹³Khandi okhumeetakhwo balanala okhuba abakara nibayeyema mutsinyumba tsiosi; ne okhuyomba yaka, bekanga okhuba abatsanzani nabehuyahuyi, abal'lomanga amang'ana akabarakwan'ne okhul'loma.

¹⁴Khwise bwakhabeye obulahi abakhasi abasili abayia okhuteesibwa, bebule abaana, balinde tsingo tsiabwe, okhwikal'le ahabasuku bakhenjil'la okhul'loma amang'ana amabi khwifwe.

¹⁵Okhuba baliho abalala khubakhasi abalekhwa abebera nibalonda Setani.

¹⁶Omukhasi wosi osubilanga naba nali nabakhasi abalekhwa mubandu baabe, abakhonyel'le aralekhela likanisa obusiro yibwo tawe; kho likanisa libe elinyala okhukhonyel'la abakhasi abalekhwa abali khubwabwe.

¹⁷Abakhulundu abakholanga emilimo chiobwemeli bulahi bakwana okhuhebwa oluyali okhurungwa esiakhabili ne okhusila muno yabo abatitikhananga obutinyu okhukamba nende okhwibaala Ling'ana lia Nyasaye.

¹⁸Okhuba Amahandiko kaboolanga, “Oraboha ing'ombe omunwa olwa ehulanga amatuma tawe.” Khandi “Omukholi wemilimo akwana okhunyoola omurungo kukwe.”

¹⁹Orahuchil'la omundu omukhulundu okhulerwa imbeli khulwa okhuyasibwa, niburaliho obukobokheli okhurula khubakobokheli babili nohomba bataru tawe.

²⁰Abandu abakholanga tsimbi obakondokhele imbeli wabandu bosi, kho abandu bandi barie.

²¹Khulakanga imbeli wa Nyasaye nende imbeli wa Yesu Kristo, nende imbeli wabamalaika abatsienukhu mbu olonde amebaalo yaka nobula nesikha nohomba norakhola ebieela khumundu wosi musiesindu esiokholanga.

²²Oratetekhana okhura amakhono khumundu wosi, khulwa okhumutsienula khumulimo kwo Mwami tawe. Orasanga mutsimbi tsiabandu bandi tawe; welinde obe omusiyikhu.

²³Oranywa amaatsi konyene tawe, nebutswa onywetsenje ewaini ndututu khulweinda yiyo nende obutekhele obukhuhambanga khasotso.

²⁴Tsimbi tsiabandu balala tsili habulafu, tsiemelanga imbeli wabwe okhwola khukhukhalachilwa esiina; ne abandu bandi tsimbi tsiabwe tsilolekhanga olunyuma.

²⁵Nimbwo emilimo emilahi chilolekhanga habulafu ne kata echiranyala okhuba habulafu sichinyala okhubiswa tawe.