Read lunyore 1 TIMOTEO 6 Bible Online

1 TIMOTEO 6 - lunyore bible

1 TIMOTEO 6

¹Abandu bosi abali abasumba bakwana okhuhelesia abaami babwe oluyali lwosi, mbu omundu wosi aranyeka eliira lia Nyasaye nende elia amebaalo kefwe tawe.

²Abasumba abali nabaami abasubilanga barabachaaya tawe, sichila nabaana babwe. Harali babarumikhile obulahi okhusila, sichila abakhongo babwe ababakhol'langa obulahi nabasubili abayanzwa mu Kristo. Amang'ana yaka wibaale ma okatinyilisie.

³Omundu wosi naba niyebaala amang'ana kandi sibeka, narahuchil'langa kobwatooto bwo Mwami wefwe Yesu Kristo, nende amebaalo kobusubili bwefwe,

⁴ye nomwekhonyi, ne samanyile esindu siosi tawe. Ali nokhwonyonywa okhurali okhulahi okhwokhuhingana, nende okhusoolana khwamang'ana. Ne akene yaka kaleeranga okhusiendekha, obusoolo, amanyekano, amakani amabi,

⁵okhuhichikana khwabandu ababiiya mumakani kabwe nibabulamwo akatooto. Bapaalanga mbu obusubili khu Nyasaye neinjila eyabandu banyool'langamwo obuhinda.

⁶Omulukha kwatooto nokukholanga omundu okhuba omuhinda naba niyekhoyela ebindu ebiali n'nabio,

⁷okhuba sikhwaleera esindu musibala, khandi sikhunyala okhurula nesindu musibala tawe.

⁸Khulwe yako nikhuba nikhuli nende ebiokhulia nende tsingubo, ebiene yibio nibio ebia khwekhoyela.

⁹Nebutswa yabo abarunanga okhuba abahinda benjilanga mukhutemwa ma bakwa mumubero okwokhwekomba okhwinji okhwoluhingwa nende okhwesalisia okhuchilanga abandu nibakora ma batiba.

¹⁰Okhuba okhuyanza amapesa nibwo obuchachilo bwobubi tsimbila tsiosi. Abalala bakhaabanga obutinyu okhubunyoola mbu kata bakosibwanga nibarula khwisubila, nibeler'ra abene okhusalila okhwinji.

¹¹Nebutswa ibe, omundu wa Nyasaye, olekhane nebindu yibi. Orune obulunji nomwoyo kwosi halala nobunyasaye nobusubili, nobuyanzi, nokhwetinyilisia, nende obuhoma.

¹²Olwane obulwani obulahi obwobusubili, onyoole omukabwa kwobulamu oburahwa, obwa walanjilwa olwa weyama okhweyama okhulahi imbeli wabakobokheli abenji.

¹³Imbeli wa Nyasaye ohaananga obulamu khubindu biosi khandi imbeli wa Kristo Yesu, owali okhumanyia okhweyama khukhwe okhulahi imbeli wa Pontio Pilato,

¹⁴khulakanga ofumile Lilako, sila esipala norali nende esikha tawe okhwola olwa Omwami wefwe Yesu Kristo alilolekha:

¹⁵Okhulolekha khukhwe khwakhamanyibwe munyinga ekwan'ne na Nyasaye wobukasu khandi Omuruchi mulala yenyene, Omwami wabaami, Omukhongo wabakhongo.

¹⁶Niye yenyene orafwitsanga; amenyanga mubulafu obwomundu aranyala okhwesunda ahembi khubwo tawe. Abulaho omundu kata mulala owamulolakhwo; ne abulaho owakhamulole tawe. Oluyali nende obunyali oburahwa bibe khuye! Amina.

¹⁷Olake abahinda musibala yisi barabba nende okhutsalikha, nohomba barara obunaayi bwabwe khubuhinda obuhwetsanga, nebutswa babure khu Nyasaye, okhuhetsanga ebindu biosi nende amakhono amasiro kho nefwe khubisangal'le.

¹⁸Obalake mbu bakhole obulahi, babe abahinda mumilimo emilahi, khandi berechekhe okhuhaana namakhono amasiro nibakabul'lakhwo abasiabwe.

¹⁹Munjila iyi nabebikhile libiikhilo eliliba omuse omutinyu mwitukhu eliitsanga. Ma bakhanyoole obulamu obuli obulamu bwatooto.

²⁰Ibe, Timoteo, olinde bulahi akawabikhilwa okhulinda. Olekhane namang'ana kamanyekano nende obuhingani bwabutswa obwabandu bakulikhanga munjila imbi mbu “Obuchesi.”

²¹Abalala bahuchil'lakhwo okhuba nobuchesi yibwo, nebutswa olunyuma bakosia injila yokhusubila. Esirenda sia Nyasaye sibe n'nenywe mwesi!