Read lunyore 2 TIMOTEO 1 Bible Online

2 TIMOTEO 1 - lunyore bible

2 TIMOTEO 1

¹Ise Paulo omurumwa wa Yesu Kristo Khulwo okhulalila khwa Nyasaye okhulondokhanga nelisubisio liobulamu elili mu Yesu Kristo.

²Mandikanga ebarwa yino khu Timoteo omwana wanje omuyanzwa: Esirenda, tsimbabasi, nende omulembe okhurula khu Nyasaye Papa nende Yesu Kristo Omwami wefwe bibe khuibe.

³Khupilanga Nyasaye embwo owaarumikhilanga nende amakani amahesikhu, singa abakuka banje bakhola. Mukhupilanga embwo nyinga khwitsul'langa ibe mukhusaaya khwanje obutukhu nom'basu.

⁴Nzitsul'langa amasika kaako, ma ndekomba okhusila muno okhukhulola, kho nzitsule nobusangali.

⁵Nzitsul'langa obusubili bubwo oburali nobukalama; obwa nyakukhulu uwo Loisi, nende mama uwo Yunisi baranga okhuba n'nabwo. Ndi nobusubili mbu buli mwibe khandi.

⁶Khusifune yisi khwitsusianga obuusie esihanwa sia Nyasaye yakhuhelesia olwa ndakhubiikhakhwo amakhono.

⁷Okhuba Omwoyo owa Nyasaye yakhuha siali owokhukhukhola abari tawe habula Omwoyo uwe akhukufuhasianga mutsingufu nomubuyanzi nende mukhwelinda.

⁸Kho orabba nende okhusimba omurwe okhuhaana obukobokheli khu ko Mwami; nohomba kata okhusimba omurwe khulwe ise omubohe khulwa Kristo tawe. Harali osange mukhusalisibwa Khulwamang'ana Amalahi singa Nyasaye akhunyal'langa okhukhola.

⁹Yali okhukhuhonia nakhulanga ifwe okhuba abandube bene, ne sikali khulwe emilimo chiefwe nebutswa khulwo okhuchooma khukhwe omwene nende esirenda. Yakhuha esirenda yisio okhubir'ra mu Yesu Kristo tsinyinga tsiabira,

¹⁰ne luno umal'le okhusilera khwifwe okhubir'ra mukhwitsa khwo Omuhonia wefwe Yesu Kristo. Yali okhumulula tsingufu tsiolufu naleera obulamu nende okhubula okhufwa okhubir'ra mu Mang'ana Amalahi.

¹¹Khulwa Amang'ana Amalahi yaka Nyasaye yanzahula okhuba omukambi, ma omurumwa khandi omwibaali wamang'ana yaka,

¹²ma kali khulwe esifune yisi salilanga nebutswa sili nolutswoni olukali sichila ndamanya omwene uyo owandasubila, ma manyile likali mbu ali onyala okhulinda bulahi Amang'ana Amalahi akayaakhola omulindi wako okhwola Khwitukhu liokhumal'likha.

¹³Ohande khumang'ana katooto aka ndakhwibaal'la singa esilolelo siokhulondwa ma otsilil'le mubusubili nomubuyanzi mu Yesu Kristo.

¹⁴Olinde bulahi akatooto aka wahebwa okhulinda khulwo Omwoyo Omutsienukhu omenyanga mwifwe.

¹⁵Ibe umanyile bulahi mbu bosi abali mu Asia baindekha, halala nende Fugelo nende Herimogene.

¹⁶Omwami makano ababeele tsimbabasi abeinyumba ya Onesiforo, sichila hali khasotso yasakulusia omwoyo kwanje; siyasimbakhwo omurwe mbu ndi mububohe tawe,

¹⁷nebutswa nyinga yoola mu Roma yaruna nesinani, ma niyanyoola.

¹⁸Omwami amuhe tsimbabasi tsitsie khu Litukhu yilio! Khandi ibe wamanya obulahi bwene obwa yali okhuurumikhila mumang'ana amenji olwa ndali Efeso