Read lunyore 2 TIMOTEO 2 Bible Online

2 TIMOTEO 2 - lunyore bible

2 TIMOTEO 2

¹Khe ibe, Omusiani wanje, okufuhale musirenda esili mu Yesu Kristo.

²Obukule amebaalo akomal'le okhuhul'la ningambanga imbeli wabakobokheli abenji ma wibaal'le abandi abasubilwa abakhanyala okhwibaal'la abandi khandi.

³Osange mukhusalila singa omusikari omulahi wa Yesu Kristo.

⁴Omusikari oli khumilimo akhaabanga okhuyanzisia etswoni uwe, kho siyetsokanga mumang'ana kokhumenya yikhwo tawe.

⁵Omundu opiemananga mutsimbilo sasiahwanga olusimbi narahesisie amalako tawe.

⁶Omulimi otiyanga butinyu niye okwananga okhunyoola ebichese ebirongole biomumukunda kukwe.

⁷Opaalekhwo khukamboolanga, okhuba Omwami alakhuhelesia ibe okhumanyilisia khwamang'ana kosi.

⁸Yitsulila Yesu Kristo owasimukukha okhurula mukhufwa, yali es'soni sia Daudi, singa kebaalwanga mu Mang'ana Amalahi akangambanga.

⁹Amang'ana Amalahi tsana kachilanga nisalisibwa khandi ndabohwa eminyol'lo singa omukholi wobubi. Nebutswa ling'ana lia Nyasaye siliabohwa tawe.

¹⁰Khulwe yako ndefwilanga sieling'ana khulwa abelwa, mbu nabo banyoole obuhoni bwa Yesu Kristo nende obukhongo bwabwo obweinziayo.

¹¹Okhuboola yikhu nokhwatooto: “Nikhuba nikhwafwa halala n'naye khulimenya n'naye khandi;

¹²nikhuba nikhwefwila n'naye, khwakharuke halala n'naye; nikhuba nikhumwambakhana, naye khandi alikhweyambakhana ifwe;

¹³nikhuba nikhurabba abasubilwa, ye wamenya nali omusubilwa, sichila sanyala okhweyambakhana omwene tawe.”

¹⁴Yitsusia abandu baabo amang'ana yaka, ma obachetsiyie imbeli wa Nyasaye mbu balekhe okhuhingananga khumang'ana. Sikakhonyanga omundu wosi tawe, habula kononinjia abakahulilanga.

¹⁵Otiye butinyu okhwemanyia khu Nyasaye singa omukholi wemilimo owahuchil'wa orasimbibwa omurwe tawe, owibaalanga habwene ling'ana liatooto.

¹⁶Nebutswa wehanye amanyekano kabutswa akobusilu, akahinianga abandu okhurula khu Nyasaye.

¹⁷Amebaalo singa yako kali singa likhwaku lilulu elimalanga inyama yomubili. Abandu babili abebaala amebaalo singa yako ni Humenaya nende Fileto.

¹⁸Abandu abebera okhurula khukatooto, ne bakosianga obusubili bwabandi olwa baboolanga mbu okhusimukukha khwamala okhubira.

¹⁹Nebutswa omuse okwa Nyasaye yasimikha kwaralila; ne kulikhwo esimanyilo yisi: “Omwami wamanya yabo abali abaabe” khandi mbu “Lekha uyo olanganga khuliira lio Mwami arule khumilimo emibi.”

²⁰Munyumba ikhongo sibilimwo ebilonje ebietsahabu nende ebiefetsa bionyene tawe, habula bilimwo khandi ebiemisaala nende ebiobutoyi; ebilala khulwo oburumikhi bwolukoosi ne ebindi ebioburumikhili bwakhase.

²¹Nikaba omundu wosi yakhesiiya omwene okhurula khumang'ana amabi yako, khe yakharumikhilwa khwichoomo likali, sichila wayehaana khandi ali nobuha obukali khu Mwamiwe, wayerechekha khulwo omulimo kwosi okuli omulahi.

²²Wehanye okwekomba okhubi khwobubuukha ne okhaabe nesinani obulunji, obusubili, obuyanzi, nende emilembe halala nende yabo bosi abalanganga khuliira lio Mwami okhurula khumwoyo omusiyikhu.

²³Orabbakhwo nokhwinjila mukhutwakana khwoluhingwa tawe; sichila umanyile khuchemanga obusoolo.

²⁴Omurumikhi wo Mwami sakwan'ne okhusoolana tawe nebutswa abe owobuhoma khubandu bosi, omwibaali omulahi khandi owokhwesimilisia.

²⁵Owibaal'langa yabo abamufukulanga mubuhoma sichila haundi Nyasaye yakhabaha obweyangu bwokhwekalukhania ma bamanye akatooto.

²⁶Ma bakhaba namakani amalahi ma bahonokokhe mumubero kwa Setani, owali niyabatiila ma niyabakhola okhuhesia okhukhola obulalilo bubwe.