Read lunyore 2 TIMOTEO 3 Bible Online

2 TIMOTEO 3 - lunyore bible

2 TIMOTEO 3

¹Omanye mbu, mumatukhu kokhumal'likha khwakhabeho netsinyinga etsiobutinyu.

²Abandu bakhabe abokhweyanza abene, obokhuyanza efetsa, abeloli, abeinjinia, abanyekani, abarahul'langa abebuli babwe, abaraboolanga embwo, abarali abatsienukhu,

³ababula obuyanzi bwoburulanda khubabwe, ababula tsimbabasi, abarahul'lisaninjia, abekhal'lani, abarali abokhwekaya abene, abalulu pa, abarayanza amalahi;

⁴abasiemani, abomurwe mutinyu, abatsalikhi; bayanzanga okhwesangasia mulimenya okhuyomba okhuyanza Nyasaye;

⁵abefwananianga okhuba nende obunyasaye, ne nibambakhananga obunyali bwobunyasaye tsana. Wehanye khubandu singa yabo.

⁶Mubene yabo balimwo abeyinjisinjia mutsinyumba tsiabandu nibatandania abakhutsakhali, abetuukha tsimbi, abakosibwanga nokhwekomba tsimbila lukano lukano,

⁷abenyanga okhwibaal'lwa khasotso nebutswa sibanyala okhumanyilisia akatooto tawe.

⁸Singa obwa Janesi nende Jambare bafukula Musa, nimbwo abene yabo bafukulanga akatooto, abandu abonekha mumakani kabwe, abononia obusubili bwabwe.

⁹Nebutswa khe sibakhatsitsachil'le muno tawe, sichila abandu bosi bakhalole obuhingwa bwabwe. Nimbwo khandi kekhola khu Janesi nende Jambare.

¹⁰Nebutswa ibe umal'le okhulonda okhwibaala khwanje, nende ifwo yanje, nende esifune mubulamu; umal'le okhulola obusubili bwanje, okhwesimilisia khwanje, obuyanzi bwanje obwetinyilisi bwanje,

¹¹okhukhupibwa esibi khwanje nende okhusandibwa. Ibe wamanya kosi akali okhungwila olwa ndali Antiokia, Ekonia na Lusitera, obwa ndefwila okhukhupibwa esibi okhukali; ne Omwami yasoola muko kosi.

¹²Ne abandu bosi abayanzanga okhumenya obulamu bwobusubili mu Yesu Kristo, balakhupibwa khusibi;

¹³ne abandu ababi nende abakaati bakhatsitsachil'le okhumeetekha mububi bwabwe, nibakaata abandi ne nabo nibakaatwa abene.

¹⁴Nebutswa ibe, otsilil'le mukatooto akawamala okhweka ma nokasubila butinyu. Okhuba ibe wamanya yabo abali okhukhwibaal'la.

¹⁵Khandi okhurula nosili omwana ibe wamanya Amahandiko Amatsienukhu akanyala okhukhuha obuchesi bwokhunyoola obuhonia mubusubili mu Yesu Kristo.

¹⁶Amahandiko kosi kafurwamwo emiiya chia Nyasaye khandi nakobukhala khukhwechesia akatooto, nokhukondokhela obubi, okhukol'losia obusiamu, nende okhwibaala khulimenya liobulunji,

¹⁷mbu omundu wa Nyasaye abe owahabwene kupu, owerechekha khusiomulimo kwosi omulahi.