Read lunyore 2 TIMOTEO 4 Bible Online

2 TIMOTEO 4 - lunyore bible

2 TIMOTEO 4

¹Imbeli wa Nyasaye, nende imbeli wa Yesu Kristo olibakhalachila abali mwoyo nende abafwa esiina, ne khulwa mbu yakhetse singa omuruchi, khulakanga mbu:

²kamba ling'ana lilie, olitinyilisie nesinani munyinga ekwanile, nende erakwanile, yungia, kondekha, ma olunjisie olwoba niwibaalanga nokhwesimilisia khwosi.

³Tsinyinga tsiakhetse etsiabandu balisuula okhwibaal'lwa amebaalo katooto, nebutswa, balilonda okhwekomba khwabwe abene nokhwenyool'la abebaali abenji abokhubabool'la akamarwi kabwe akatsinzinanga kenyanga.

⁴Bakhasuule okhuhul'la akali akatooto, nibalonda tsingano tsiobubehi.

⁵Nebutswa ibe welinde mumang'ana kosi; wesimilisie musibi, okhole emilimo chiomukambi wa Amang'ana Amalahi, ma ohesia oburumikhi bubwo singa omukholi wa Nyasaye.

⁶Okhuba luno kata ise esaa yanje yokhuhanwa singa omusango yol'le; inyinga yanje yokhurula mubulamu buno yol'le.

⁷Khol'le kosi akanyala mubulwani, mal'le okhupiemana khwanje, ma mal'le okhuhesia obusubili.

⁸Ne luno luliho olusimbi lwobulechi olunindil'langa olwobulunji, olwo Omwami, omukhalachi omulunji, alimbelesia khwitukhu yilio, ne sikali khwise sienyene tawe, nebutswa khandi khuyabo bosi abalindil'langa mubuyanzi okhubisukha khukhwe.

⁹Rakhwo omwoyo khwitsa khwise bwangu.

¹⁰Demasi yayanza esibala sialuno, ne waindekha ma watsia Tesalonike. Keresenike natsia Galatia, Tito naye natsia Delamatia.

¹¹Luka yenyene niye oli n'nase. Nyoola Mariko ne mwitsane n'naye; okhuba ye ali woburumikhi obukali khwise.

¹²Nebutswa Tukiko ndamuruma okhutsia Efeso.

¹³Nyinga oliitsa, olaleerane likoti liandalekha Troa mumukhono kwa Karipo, kata khandi olander're ebitapu ebifumba ne okhusila muno ebialombwa khumaseelo.

¹⁴Alekisanda omuruli wemikasa yakhol'la obubi obwinji: Omwami alamurunge okhuhelana nemilimo chichie.

¹⁵Webelenge khuye sichila yali okhufukula muno amang'ana kefwe.

¹⁶Olwa ndaranga okhukalusia nindesinga siyaliho kata mulala owangobokhela; bosi bali okhundekha. Ne kalekhe okhubal'lwa obubi khubo.

¹⁷Nebutswa Omwami yali okhungobokhela ma niyamba tsingufu okhulanjisia amang'ana kokhurumwa khwefwe mubwitsulu, mbu abetsimbia bosi banyoole okhukahul'la. Ma ndamala nisoolwa okhurula mukhukhalachilwa okhufwa.

¹⁸Omwami yakhaasoole mumilimo emibi chiosi, alininda okhwola khu Bwami bubwe bwomwikulu. Obukhongo bubetsenje khuye inziayo. Amina.

¹⁹Siechisia Piliskila nende Akula, nende abomunyumba ya Onesiforo.

²⁰Erasto, yasikala Korintho, nebutswa ndalekha Terofimo Melita sichila yali nalwala.

²¹Rakhwo omwoyo okhwitsa yino amatukhu komunyiri nikasili okhuchiaka. Eubulo ukhusiesisie nende Pudene, nende Lina, nende Kilaudia, nende Abaana basiefwe bosi.

²²Omwami abe n'nawe. Esirenda sia Nyasaye sibe n'nenywe mwesi.