Read lunyore FILIMONA 1 Bible Online

FILIMONA 1 - lunyore bible

FILIMONA 1

¹Ise Paulo, omubohe wa Yesu Kristo, nende Timoteo omwana wefwe, khuhandikanga khuibe Filimona omulina wefwe, khandi omukholi wemilimo wasiefwe,

²nende khubelikanisa elibukan'nanga munzu yiyo, nende khuibe Apofia mbotswa wefwe, khandi nende Afrikipo omusikari wasiefwe.

³Esirenda sibe khu inywe nende emilembe, echirulanga khu Nyasaye Papa wefwe nende Omwami Yesu Kristo.

⁴Aefwe Filimona, khupilanga Nyasaye embwo buli lwosi olwa khwitsul'langa mukhusaaya khwanje.

⁵Okhuba mbul'langa akobuyanzi bwoli n'nabwo khubandu ba Nyasaye bosi nende obusubili bwoli ninabwo mu Mwami Yesu.

⁶Okhusaaya khwanje khuli mbu obusanjilani bwefwe n'nawe singa abasubili bulaleera obumanyilisi obweyinikhu khu sieikhabi indahi eya khuli n'nayo mubulamu obwa khuli n'nabwo mu Kristo.

⁷Obuyanzi bubwo mwana wefwe bwambelesia obusangali obwinji nokhuhotselekha okhukali! Ibe wasakulusia emioyo chiabandu ba Nyasaye bosi.

⁸Khu sifune yisio, ndakhabeye nolutswoni singa omwana wenywe mu Kristo okhukhulaka okhukhola eliokwanile okhukhola.

⁹Nebutswa khulwobuyanzi bwanje khuibe ndakhakhusaaya busaaya butswa. Kholanga mbwo kata nindi nise Paulo omurumwa wa Yesu Kristo khandi luno ndi omubohe khulwaye.

¹⁰Khusaayanga khulwomwana wanje Onesimo mu Kristo, okhuba olwa ndali mububohe ndali okhukwa papawe wemumwoyo.

¹¹Amatukhu kandi siyali nobukhala khuibe, nebutswa luno ali nobukhala[1] khuibe nende ise.

¹²Murumanga akalukhe khuibe, naye nomuyanzwa wanje okhusila.

¹³Ndakhenyele muhandekhwo amenye n'nase olwa sili mububohe mbu yafulukhanile khululwo khulwa Amang'ana Amalahi.

¹⁴Harali sinyenya khuhachie okhuukhonya tawe; bwakhabeye obulahi okhole mukhwenyakhwo omwene. Kho sindakhakhola ling'ana liosi ibe norahuchiliye khwo tawe.

¹⁵Haundi esifune esiachila Onesimo nakhurula khwo hatututu siali mbu wakhamubukule olabe n'naye amatukhu kosi,

¹⁶ne sali butswa singa omuhambe khandi tawe, nebutswa ayomba omuhambe. Ye no mwana wefwe omuyanzwa mu Kristo. Ali nobukhala obukali khu ise. Kho siyakhaba nobukhala obukali muno khuibe singa omuhambe khandi singa amwabo wo mu Mwami?

¹⁷Khe noba niumbalanga singa omusanji halala n'nawe, omwinjisie khandi singa obwa wakhanyinjisisie ise.

¹⁸Naba niyakhukhol'la obubi kata naba nali nelikobi khu ibe, umbanze ise.

¹⁹Ise, Paulo, mandikanga kano nende omukhono kwanje omwene mbu Ise Paulo nakhurunge. (Singwana okhukhwitsusia mbu oli nelikobi khwise eliobulamu bwo bwene tawe.)

²⁰Kho, aefwe Filimona, nyenyanga oyanze ukhol'le ling'ana yili khulwo Omwami; singa omwana wefwe mu Kristo, osangasie omwoyo kwanje.

²¹Manyile tooto mbu olwa mandikanga yaka mbu olakhola aka khusabanga — kata manyile olakhola kata okhuyombia.

²²Halala neyako, urechekhele inyumba yabacheni, ahokhuhulukhila, sichila nayanga mbu Nyasaye nakalusie amasaayo kenywe mwesi ma nayangalusie khwinywe.

²³Epafura, oli mububohe halala n'nase khulwa Yesu Kristo ukhusiesisie ibe,

²⁴khandi mbwo Mariko, Arisitariko, Demasi na Luka abakholi bemilimo halala n'nase nabo bamusiesisie.

²⁵Esirenda sio Mwami wefwe Yesu Kristo sibe halala n'nenywe mwesi.