Read lunyore BAHEBURANIA 10 Bible Online

BAHEBURANIA 10 - lunyore bible

BAHEBURANIA 10

¹Amalako ka Bayahudi sikali likondo liene eliebindu ebitsanga tawe; kali esiinini butswa esiebindu ebilahi ebitsanga. Emisango emitelwa chimalwanga khasotso siomuhika. Kho Amalako kakhanyala mbwena okhubir'ra khumisango singa yichio okhukhola abandu abetsanga okhwekayakaya khu Nyasaye okhubalwa abalunji?

²Nikaba nikakhabeye mbu abandu abekayakayanga Nyasaye bakhabeye nibasiyilwe tsimbi tsiabwe tooto, sibakhabeye nesikha sietsimbi khandi tawe.

³Nebutswa mumisango chiene yichio abandu betsusibwanga tsimbi tsiabwe buli muhika.

⁴Okhuba amatsahi ketsichulukhi nende aketsimbusi sikanyala okhuhonia tsimbi tawe.

⁵Khusifune yisi, olwa Kristo yali nali ahembi okhwitsa musibala yabool'la Nyasaye mbu, “Emisango nende ebihanwa, siobienyanga tawe, Nebutswa wayirechekhela omubili.

⁶Siosangal'langa emisango emisambe nohomba emisango chiokhuhinia tsimbi tawe.

⁷Ma nimboola ‘Lola, nzitsile okhukhola akobulalilo bubwo, Ibe Nyasaye, singa butswa obwa kahandikwa khu Ise musitapu sia Malako.’ ”

⁸Olwokhuranga yaboola mbu, “Emisango nende ebihanwa, nende emisango echisambwanga khulusambwa nende emisango chiokhuhinia tsimbi siobienyanga kata okhubisangal'langa tawe.” Yaboola yaka kata nikali mbu bikholwanga okhulondokhana na Malako.

⁹Ma khandi naboola mbu, “Ndi hano okhukhola akobulalilo bubwo Ibe Nyasaye.” Hano Nyasaye ahiniangaho emisango chiokhuranga ma abikhaho omusango kwa Kristo musilenje siachio.

¹⁰Okhuba mbu Yesu Kristo yakhola akobulalilo bwa Nyasaye, ifwe khusiywanga tsimbi tsiefwe khulwo khuhaanwa khwomubili kwa Yesu Kristo l'lala lwonyene.

¹¹Siomwesaalisi Wesiyahudi asinjilanga sielitukhu nakhola emisango emitelwa hali akhenji; nebutswa emisango yichio sichinyala okhuhonia tsimbi tawe.

¹²Nebutswa Kristo yakhola omusango mulala khulwe tsimbi, omusango okurumikhanga inziayo, ma niyekhala khumukhono omusaatsa kwa Nyasaye.

¹³Nokhurula olwene yilwo alindil'langa okhwola olwa Nyasaye yakhare abasukube hasi webilenjebie.

¹⁴Kho khulwa omusangokwe mulala, yakhola yabo abasiywanga tsimbi tsiabwe okhuba abahesikhu inziayo.

¹⁵Ne Omwoyo Omutsienukhu aribulanga akobukobokhelibwe. Olwokhuranga yaboola mbu,

¹⁶“Yino niyo indakano eya ndakhalakane n'nabo mumatukhu aketsanga, Omwami aboolanga. Ndakhare amalako kanje mumioyo chiabwe, khandi ndakhakahandike mumakani kabwe.”

¹⁷Ma nameeta mbu, “Sindakhetsul'le tsimbi tsiabwe nende ebionono biabwe khandi tawe.”

¹⁸Ne ahokhulekhelwa khwe yibio khuli, okhumala khwemisango chiokhuhinia tsimbi sikhuliho khandi tawe.

¹⁹Kho abaana befwe, khuli nobulakhuule kupu okhwinjila Habundu Hatsienukhu Okhusila munjila yokhufwa khwa Yesu.

²⁰Yesu yakhwikul'la Injila Imbia khandi eyobulamu okhubir'ra mungubo eyepasia, ne niyo injila yokhubir'ra m'mubilikwe omwene.

²¹Khuli nende Omwesaalisi Omukhongo osinjiliye inyumba ya Nyasaye.

²²Khulwe yako khukwana khwesunde ahembi khu Nyasaye nende emioyo chiatooto nobusubili obwahabwene, nemioyo chiefwe echisiyilwe okhurula mumakani amabi, nende emibili chiefwe njisaabilwe namaatsi amalafu.

²³Chende khutinye khubunayi obwa khweyamanga, khulekhe okhusikukha sichila Nyasaye owakhusubisia nomusubilwa.

²⁴Chende khuhendelane abene khubene nikhukhonyana okhumetana tsingufu abene khubene okhumanyia obuyanzi nokhukhola emilimo emilahi.

²⁵Khuralekha ifwo yokhubukana halala singa abandi bakholanga tawe. Nebutswa chende khutinyilisanie abene khubene okhusila muno, okhuba singa mulolanga, Litukhu yilio elio Mwami liesundanga ahembi.

²⁶Okhuba nikhuba nikhutsilil'la okhukhola tsimbi neinjinia, olwa khumal'le okhumanyibwa akatooto, kho omusango okunyala okhuhonia tsimbi sikuliho khandi tawe.

²⁷Harali esisikaye nokhulindil'la muburi obukhongo khulwe Esiina esitsanga nende omul'lo omululu okulimulula yabo abafukula Nyasaye!

²⁸Omundu oralondanga Amalako ka Musa yerwanga narabelwa tsimbabasi tawe, khulwa obukobokheli bwabandu babili nohomba bataru.

²⁹Kho kakhaba mbwena khu Omundu uyo ochiayanga Omwana wa Nyasaye nabala amatsahi keindakano akamutsienula okhuba akabutswa, nanyeka Omwoyo wesirenda? Siakwan'ne esinyasio esitinyu okhusila?

³⁰Okhuba khwamumanya owaboola, mbu, “Es'salia nesianje, nise olirunga.” Khandi owaboola mbu “Omwami alikhalachila abandube esiina.”

³¹Okhukwa m'makhono ka Nyasaye oli mwoyo neling'ana eliokhurisia muno.

³²Mwitsul'le singa kali khwinywe khale. Mumatukhu akabira obulafu bwa Nyasaye nibwakhamala okhumwakhila mwefwila mubindu ebinji, mukhusalila nebutswa simwayombel'lwa nobulwani tawe.

³³Olundi mwanyekwa habulafu, nokhunyasibwa, ne olundi mwahambana nende abakhol'lwanga mbwo.

³⁴Mwabelel'la abali mububohe, nimunuulwa emiandu chienywe, nimwefiilwa nobusangali sichila mwamanya mbu muli nemiandu emilahi echihindilanga okhuyomba yichio.

³⁵Kho murakosia olutswoni lwenywe oluli nomukabwa omukhongo tawe.

³⁶Okhuba kamukhoyele okhwesimilisia, mbu munyoole yako aka Nyasaye yenya nimuba nimukhola aka Nyasaye yamusubisia.

³⁷Okhuba singa Amahandiko kaboolanga: “Hasili hatititi butswa, ma omwene uyo owitsa aletsa, ne sialasisil'la tawe.

³⁸Omundu wanje omulunji alamenya khulwo obusubili, nebutswa naba nakalukha inyuma, omwoyo kwanje sikumusangal'la tawe.”

³⁹Ne ifwe sikhuli singa yabo abakalukhanga inyuma nibatiba tawe. Nikarali ifwe khuli nobusubili khandi khwahonibwa.