Read lunyore BAHEBURANIA 11 Bible Online

BAHEBURANIA 11 - lunyore bible

BAHEBURANIA 11

¹Okhuba nende obusubili nokhuba nobwatooto obwa amang'ana akakhunaayanga; okhusubil'la akene yako akaralolekhanga tawe.

²Abakhulundu bakhale bahuchil'lwa nende Nyasaye khulwo obusubili.

³Khulwo obusubili khumanyilanga elala mbu esibala sialongwa khulwe ling'ana lia Nyasaye, kho ebindu ebilolekhanga bialombwa okhurula khu yibio ebiralolekhanga.

⁴Khulwo obusubili Habili yakhol'la Nyasaye omusango omulahi okhuyomba okwa Kaini. Ne khulwo obusubilibwe Nyasaye yamukobokhela khulwa ebihanwabie mbu nomulunji. Ne khulwo obusubilibwe kata niyafwa asiboolanga.

⁵Khulwo obusubili Nyasaye yaatisia Enoka mbu arafwa tawe. Siyalolekha khwo khandi tawe sichila Nyasaye yali namwatisisie. Amahandiko kakobokhelanga mbu olwa Enoka yali nasili okhwatisibwa yali niyamuyanzisia Nyasaye.

⁶Ne sila obusubili sikanyalikha okhumuyanzisia Nyasaye tawe. Okhuba owitsanga khu Nyasaye kamuhel'le okhusubila mbu Nyasaye aliho, khandi niye obakabilanga abamukhaabanga.

⁷Khulwo obusubili, Noa yahulila amachetsiyio ka Nyasaye khumang'ana akali nikasili okhwekhola. Yali omuhulili khu Nyasaye ma nalomba esafina omwa ye nende abeinzuye bahonibubwa. Khulwe yako esibala siakhalachilwa esiina, ma Noa nanyoola okhurula khu Nyasaye obulunji obunyoolwanga khulwo obusubili.

⁸Khulwo obusubili Aburahamu yali omuhulili olwa Nyasaye yamulanga okhutsia musibala sia Nyasaye yasubisia okhumuha. Yarula natsia naramanyile ahatsitsanga.

⁹Khulwo obusubili yamenya singa omucheni musibala esia Nyasaye yamusubisia. Yamenya mumaheema khandi nimbwo Isaka nende Yakobo abayalaamilwa n'nabo obusubisie tsana bamenya.

¹⁰Aburahamu yali nalindil'langa litookho elia Nyasaye ali omwombokhi khandi omukholi walio elili nomuse omukufuhalu.

¹¹Khulwo obusubili kata Sara olwa yali nabir're emihikachie, yabelekha omwana, okhuba yamanya mbu Nyasaye owasubisia nomusubilwa.

¹²Khulwe yako okhurula khumundu mulala uyo Aburahamu, owali nali singa owafwa, bebulwamwo abandu abenji muno abarabbalikha singa tsinyininyini tsiokhwikulu nende omuyekhe kwokhunyanza.

¹³Abandu yaba bosi bafwa mubusubili. Bafwa nibasili okhunyoola aka Nyasaye yabasubisia, Nebutswa bakalol'la butswa ehale ma nibakasangal'la nibeyama mbu nabacheni khandi abarende musibala.

¹⁴Okhuba abandu ababoolanga amang'ana singa yaka, bamanyianga kol'lani mbu bakhabanga esibala siabwe abene.

¹⁵Nibaba nibakhetsuliye esibala siabarulamwo, khane bakhanyooye obweyangu okhukalukhayo.

¹⁶Nebutswa bekombanga esibala sindi esilahi okhusila, esibala esiomwikulu. Ne niko akachila Nyasaye narasimba omurwe okhulangwa mbu niye Nyasaye wabwe, okhuba wabarechekhela litookho.

¹⁷Khulwo obusubili Aburahamu yahaana omwanawe Isaka singa omusango olwa Nyasaye yamutema. Aburahamu niye owali niyanyoola akobusubisie bwa Nyasaye; ne kata mbwo, yekhoya okhuhaana omwanawe omutelwa singa omusango.

¹⁸Ne niye owa Nyasaye yabool'la mbu, “Okhubir'ra mu Isaka nimwo omwa olinyool'lamwo abetsukhulu abandakhusubisia.”

¹⁹Aburahamu yasubila mbu Nyasaye anyala okhusimukusia Isaka okhurula mukhufwa, ma mbwo Aburahamu yanyoola omwanawe nakalusiibwe khuye okhurula mukhufwa.

²⁰Khulwo obusubili Isaka yalamila Yakobo nende Esau ikhabi khumatukhu kabwe akakhetse.

²¹Khulwo obusubili Yakobo olwa yali nafwitsanga yalamila abaana ba Yosefu ikhabi, simulala simulala, niyekayakaya niyelet'te khundabusiye.

²²Khulwo obusubili Yosefu, olwa yali nali ahembi okhufwa yaribula akokhurula khwabaana ba Isiraeli Emisiri nalachilisia amebaalo khukobulindi bwomubili kwe.

²³Khulwo obusubili olwa Musa yali niyebuywe, abebulibe bamubisa emiesi chitaru sichila balola nali omwana owelikondo lilahi, ne sibaria lilako liomuruchi tawe.

²⁴Khulwo obusubili, olwa Musa yali nakhul'le, yasula okhulangwa omwana womukhaana wo Muruchi we Misiri.

²⁵Yalola mbu bwakhaba obulahi akhupibwe esibi halala nabandu ba Nyasaye, okhuyomba okhuba nobusangali bwetsimbi khumatukhu amatu.

²⁶Yalola mbu okhunyekwa khulwa Masihi nobuhinda obwinji okhuyomba obuhinda bwosi obwesibala sie Misiri. Okhuba yalindil'langa omurungo okwa yakhanyoole olwe inyuma.

²⁷Khulwo obusubili, Musa yarula Emisiri nararia oburima bwo omuruchi tawe, narakalukha inyuma singa omundu oluutsi Nyasaye oralolekhanga tawe.

²⁸Khulwo obusubili yakhola Epasaka nokhutsukhil'la amatsahi khumiliango, mbu Om'malaika wo Olufu arera abebulwa abokhuranga ba Isiraeli tawe.

²⁹Khulwo obusubili babir'ra munyanza Inzakhanyu hakari singa khunjila inyomu. Ne olwa Abaamisiri batema okhukholakhwo mbwo bafwila m'matsi.

³⁰Khulwo obusubili amasisi ka Yeriko tsialikulukhila hasi olwa Abaisiraeli balibotokhana amatukhu kane nakataru.

³¹Khulwo obusubili Rahabu omutamba siyafwa halala nabesikala marwi tawe, sichila yali niyenjisisie abalambuuli nemilembe.

³²Nase mboole sina khandi? Okhuba mbula obweyangu obuhela obwokhwinoosia aka Gideoni, Baraki, Samusoni Yefetsa, Daudi, Samweli nende abaroobi bosi.

³³Khulwo obusubili yabo bosi balwana lihe namahanga kandi nibakaleka. Bakhola akali akahabwene ma nibanyoola aka Nyasaye yali niyasubisia. Bali okhwikala eminwa chietsisimba,

³⁴basimia obunyali bwomul'lo, bahonokokha okhwirwa nolukanga. Bali abatekhele, nebutswa banyoola tsingufu. Bali abalulu mwihe, ma nibakhungania amahe kabasuku.

³⁵Ne abakhasi abusubila bakalusibubwa abafu babwe nibasimukusibubwe. Abandi nibarahuchil'la okhulakhuulwa tawe, bafwa mukhukhupa esibi mbu banyoole okhulamusibwa nokhwinjila mubulamu obulahi okhusila.

³⁶Abandi batsekhel'lwa, nibanywekhwa tsikhoba ne abandi babohwa neminyol'lo nokhufubwa mubuhambe.

³⁷Balaswa namachina, bakhalakwa mubitonye b'bili nemisimeno, berwa nolukanga. Bachendachendanga nibebikhile amaseelo kamakondi nende amaseelo ketsimbusi, nibaba abandu abatakha, nibakhupibwa khusibi, khandi nibasandibwa.

³⁸Esibala sisiali matsami khubo tawe. Babokaboka mubitsiimi nomubikulu nende mumangaywa nomumako kesibala.

³⁹Ne yabo bosi bali okhumanyikha khulwo obusubili bwabwe. Kata mbwo sibamala banyoole aka Nyasaye yabasubisia tawe,

⁴⁰sichila Nyasaye yali narechekhele obuloosie obulahi khulwefwe. Lichoomo lia Nyasaye liali mbu yabo sibakhakhol'lwe abahesikhu bonyene sila ifwe tawe.