Read lunyore BAHEBURANIA 12 Bible Online

BAHEBURANIA 12 - lunyore bible

BAHEBURANIA 12

¹Kho ifwe khuli nomukanda omukhongo okwabakobokheli imbeli wefwe okukhufumbiye singa lilumbesi. Niko akachila khure halubeka siesindu esikhusitohela, nende tsimbi etsikhulitsanianga ma khurekhwo omwoyo okhwilukha tsimbilo mukhupiemana okhuli imbeli wefwe.

²Khuhenge Yesu owobusubili bwefwe bweletangakhwo mukhuchiaka nende mukhumal'likha khwabwo. Khulwo obusangali obwarebwa imbeliwe, yefwila okhufwa khumusalapa, nachaya es'simba murwe, ne luno yekhalanga hamukhono musatsa okwoluruba lwa Nyasaye.

³Mukanil'le khu Yesu owefwila obufukuli obwinji okhurula khubetsimbi! Kho murafwa mwoyo, nimuchonya tawe.

⁴Okhuba mubulwani bwenywe netsimbi, musili okhulwana okhwola mukhuratsibwa esitsahi.

⁵Khandi mwibiliye amang'ana akokhumutinyilisia aka Nyasaye yamubool'la singa abaanabe mbu. “Mwana wanje, orachaaya okhuchetsiyibwa khwo Mwami, kata orafwa mwoyo olwa akhukondekhela tawe.

⁶Okhuba Omwami achetsiyianga owayanzanga, namutiaba buli mwana owahuchiliiye.”

⁷Mwefwile khulwo okhuchetsihibwa. Nyasaye amukholelanga kosi singa abaanabe. Okhuba ali hena omwana owasamwana arachetsiyianga?

⁸Nebutswa nimuba nimurachetsihibwa singa abaana baabe bandi, kho simuli abaanabe tawe, harali muli abaana ababula samwana.

⁹Okhumeetakhwo, ifwe khwali nabebuli befwe abakhwibula abomubili abakhuchetsiyianga ne kwali okhubaria. Niko akachila khukhoyele okhwelela okhusila khu Papa owemioyo chiefwe mbu khube mwoyo.

¹⁰Okhuba abebuli befwe musibala muno bakhuchetsiyia amatukhu amatititi olwa bali mbalutsi mbu nobulahi, nebutswa Nyasaye akhuchetsiyingia khulwa obukhala bwefwe abene, mbu ifwe khukaase khusanjilane khubutsienukhu bubwe.

¹¹Buli olwa khuchetsiyibungwa silibetsanga ling'ana liobusangali tawe habula eliesibeela. Silili ling'ana eliokhusangal'la tawe habula eliokhubelesia. Inyuma wokhuchetsiyibwa, yabo ababetsanga nibamal'le okhuchetsiyibwa, bachesanga omukabwa kwobulamu obulunji.

¹²Khulwe yako muchinguule amakhono akayokhele, ma mukol'losie amasikamo amatekhele!

¹³Muchendenje khutsinjila tsinunji, mbu esilenje esilema sirasalisibwa nebutswa sihonibwe.

¹⁴Rune okhumenya mumulembe nabandu bosi khandi murune okhumenya obulamu obutsienukhu sichila omundu orali n'nabwo sialamulola Omwami tawe.

¹⁵Mwehenge obulahi omundu wosi aralenda khusirenda sia Nyasaye. Omundu wosi arabba singa es'sina esiobululu esisebukhanga nisiira abenji khulwo obukubila bwasio tawe.

¹⁶Kata arabbaho omusambale kata omundu oraria Nyasaye singa Esau owakusia obukhulundu bwobwibulebwe esiokhulia esilibwakhwo l'lala tawe.

¹⁷Mumanyile mbu olunyuma khwo yekomba okhulamilwa ikhabi tsana naramwa; nebutswa yali okhusuulwa, sichila siyanyoola obweyangu okhukalukhania akayakhola tawe kata olwa yaruna muno nalakaya amasika.

¹⁸Simwitsile khusikulu sia Sinai esinyala okhutilwakhwo ma esiatukhanga omul'lo tawe. Kata simwitsile hasiilima kata hamwamu neimbumbuyeka tawe.

¹⁹Khandi simwitsile khukhupwa khwolwika nomwoyo kwamang'ana tawe. Okhuba yabo abahul'la omwoyo yikwo basaaya mbu barabool'lwakhwo ling'ana lindi liosi tawe,

²⁰sichila baramwa okhwefila yako akalachilisibwa, mbu “Kata inyama nabulimo neba neseenakhwo khusikulu, elaswe namachina.”

²¹Yako kosi kalolekha akokhurisia muno, okhwola olwa Musa yaboola mbu, “Riiye khandi ndecheye.”

²²Nebutswa inywe mwitsile khusikulu sia Sayuni khandi khwitookho lia Nyasaye oli mwoyo, Yerusalemu eliomwikulu, khandi khumukanda kwabamalaika etsehelefu netsihelefu etsirabbalikha tawe.

²³Mwol'le khumukanda kwobusangali okwelikanisa lia abebulwa abokhuranga ba Nyasaye abahandikwa amera kabwe mwikulu. Mwol'le khu Nyasaye omukhalachi wabandu bosi, khandi mwitsile khumioyo chiabandu abalahi abakholwa abahesikhu.

²⁴Mwol'le khu Yesu, omwemeli oweindakano imbia, khumatsahi akamiitswa akaboolanga amang'ana amalahi okhuyomba amatsahi ka Habili.

²⁵Henge, mulole, murasuula okhuhul'lisia ol'lomanga n'nenywe tawe. Yabo abali okhusuula okhuhul'la uyo owababool'la amang'ana komwoyo musibala sibahonokokha tawe. Kho ifwe sikhwakhehonia kata hati nikhuba nikhusuula okhumuhul'la uyo ol'lomanga okhurula mwikulu tawe.

²⁶Olwene yilwo omwoyokwe kwatechesia esibala, ne luno usubisisie mbu, “Ndakhatechesie esibala khandi, ne sisili esibala sionyene tawe nebutswa khandi nende likulu.”

²⁷Ne ling'ana yili “Khandi” likhumanyia mbu ebindu biosi ebialongwa biakhatechesibwe nokhuhinibwa mbu bisikaleho ebiratechesibwa tawe.

²⁸Khulwe yako nefwe khumukhupile Nyasaye embwo okhuba mbu khunyooye oburuchi oburatechesibwa tawe. Khukwana khusangaale nikhwekayakaya Nyasaye munjila yokhumuyanzisia muluyali noburi;

²⁹sichila Nyasaye wefwe niye omul'lo okumululanga.