Read lunyore BAHEBURANIA 13 Bible Online

BAHEBURANIA 13 - lunyore bible

BAHEBURANIA 13

¹ Mutsilil'le okhuyanzana abene khubene singa abamwabo mu Kristo.

²Murebil'la okhwinjisia abacheni mutsingo tsienywe tawe, sichila mukhukhola mbwo abandu bandi benjisia abamalaika nibaramanya tawe.

³Mubetsul'lenje abali mububohe singa ababohwa n'nabo halala. Mubetsul'lenge abakhupibwa esibi singa abakhupibwa esibi halala n'nabo.

⁴Obuteesani bubetsenje noluyali mubandu bosi, ne abateesania basubilane. Nyasaye yakhakhalachile esiina yabo abasambale nende abaheyi.

⁵Murabba abandu abokhuyanza amapesa tawe, mukhwane nende ebia muli n'nabio. Okhuba Nyasaye omwene yaboola mbu, “Sindakhakhulekhe kata okhukhwebala tawe.”

⁶Khulwe yako khwome ikholo nikhuboola mbu, “Omwami niye omuhabini wanje, sindalaritsanga tawe. Nisina esiomundu namundu anyala okhukholela?”

⁷Mwitsul'le abemeli benywe ba khale abali okhumubool'la amang'ana ka Nyasaye. Mupaale khwo singa bamenya khandi singa bali okhufwa ma mulonde obusubili bwabwe.

⁸Yesu Kristo ni mulala uyo olwabeye nalelo, kata neinziayo.

⁹Murakosibwa namebaalo amacheni tawe. Nobulahi okhunyoola tsingufu tsia Nyasaye okhurula khusirendasie okhuyomba okhulonda amalako khukebiokhulia. Yabo abalondanga amalako singa yako sibanyoolanga obukhala bwosi khuko tawe.

¹⁰Khuli nende esimalilo siefwe siemisango, ne abesaalisi abakholanga mwiheema lia Bayahudi sibahuchil'lwanga okhulia khubiakhwo tawe.

¹¹Omwesaalisi Omukhongo Wesiyahudi aleeranga amatsahi ketsinyama Habundu Hatsienukhu Okhusila okhukahaana mbu kabe omusango kwetsimbi. Nebutswa omubili kwetsinyama yichio kusambilwanga esioba welitaala.

¹²Ne niko akachila Yesu naye khulwo okhutsienula abandu okhurula mutsimbi khulwa amatsahi kaake omwene, yafwila esioba welitaala.

¹³Khulwe yako nefwe khurule khumutsiile esioba welitaala nikhusanga amanyeko akayanyekwa.

¹⁴Okhuba musibala sino sikhulimwo nende litookho elihindila tawe. Khukhaabanga litookho eliene yilio eliakhetse.

¹⁵Kho okhubir'ra mu Yesu uyu, chende khukhole omusango kwokhwitsoomia Nyasaye khasotso. Nakwo nomusango okuhanwa neminwa chiabandu abeyama mbu ye no Mwami.

¹⁶Murebil'la okhukhola amalahi nokhukhonyana abene khubene tawe; sichila emisango echifwana mbwo nichio echiyanzisianga Nyasaye.

¹⁷Hulilenje abemeli benywe, nimulonda amalako kabwe; yabo balindanga emioyo chienywe obutukhu nom'basu, ne bakhahinie obukobokheli bwemilimo chiabwe imbeli wa Nyasaye. Nimuba nimubahulila, balakhola emilimo chiabwe nende obusangali, ne karali mbwo balakhola nesibeela, ne mbwo sikakhaba obukhala khwinywe tawe.

¹⁸Mukhusaayile ifwe. Khandi khuli nobusubili mbu khuli nomwoyo omulahi, okhuba mumang'ana kosi khwenyanga okhuchenda habwene.

¹⁹Muhombanga okhusila muno mbu musaaye mbu Nyasaye nayangalusie khwinywe bwangu.

²⁰Ne luno, Nyasaye wemilembe owasimukusia Omwami wefwe Yesu Kristo okhurula mubafu, Omwayi omukhongo wamakondi, khulwe esifune siokhuratsia amatsahi kaake akeindakano erahwetsanga,

²¹amwitsusie nabuli sindu siosi esilahi, mbu mukholenje aka yenya, ma okhubir'ra mu Yesu Kristo, Nyasaye akhole mwifwe akamuyanzisia. Obukhongo bube khuye inziayo. Amina.

²²Musaaya, abaana befwe, mubukule ling'ana eliobutinyilisi lino nende okhwesimilisia. Yino nebarwa inyimbichiti butswa eyamuhandichiye.

²³Nyenya mumanye mbu omwana wefwe Timoteo yabeye okhubohololwa okhurula mububohe. Naba niyoola hano bwangu ndakhabe n'naye olwandakhetse okhumulola inywe.

²⁴Musiesie abemeli benywe bosi, halala nende abandu ba Nyasaye. Abasiefwe okhurula Italia bamusisie.

²⁵Esirenda sia Nyasaye sibe n'nenywe mwesi. Amina.