Read lunyore BAHEBURANIA 2 Bible Online

BAHEBURANIA 2 - lunyore bible

BAHEBURANIA 2

¹Khulwe yako okhwola khufumile butinyu yako kosi akatooto aka khwali okhuhul'la khase khwakharel'la nikhukwa.

²Amang'ana akabamalaika babool'la abakuka befwe kanyoolekha nikali akobwatooto, ne omundu wosi orakalonda kata okhukafumila yali okhunyoola esinyasio esimukwan'ne.

³Kho nefwe khwakhahonokokha mbwena nikhuba nikhusuula obuhonia obukhongo singa yibwo? Omwami omwene yaranga okhuribula obuhonia yibu, ne abali okhumuhul'la bali okhukaribula khu ifwe mbu nakatooto.

⁴Nyasaye naye khandi yali okhuribula obukobokheli bubwe khubwabwe khulwa okhukhola akamangalimwa lukano lukano nende akokhuchenya amenji, nende okhukabul'la abandu ebihanwa bio Mwoyo Omutsienukhu mukhuyanzakhwe omwene.

⁵Nyasaye siyayela abamalaika okhwamiha esibala esihia esia khul'lomangakhwo tawe.

⁶Nebutswa singa kaboolwanga habundu undi mu Mahandiko mbu: “Omundu ali sina E Nyasaye, mbu omupaalenjekhwo; kata omwana womundu nisina mbu omuhendel'le?

⁷Ibe wamukhola hatututu abe hasi wabamalaika; wamubiikha olusimbi lwoluyali neifuma indahi.

⁸Ibe wara ebindu biosi hasi webilenje bibie mbu abiruke.” Okhuba olwa yara ebindu biosi hasiwe, siyalekha esindu siosi esioba woburuchibwe tawe. Luno sikhulolanga ebindu biosi hasiwe tawe.

⁹Nebutswa khumulolanga Yesu owakholwa omutititi mbu abekhwo hasi wabamalaika hatututu, nabiikhwakhwo olusimbi lwoluyali neifuma indahi, khulwo obusalili bwokhufwa khukhwe mbu khulwe esirenda sia Nyasaye atsanzame okhufwa khulwa abandu bosi.

¹⁰Okhuba kamuyanzisia Nyasaye, olonganga ebindu biosi khandi owebindu biosi bilindwanga khulwaye akhole Yesu okhuba omuhesikhu munjila yokhusalila kho yenjisie abaana abenji okhusanga mubukhongo bubwe. Okhuba Yesu niye obemel'langa okhunyoola obuhonia.

¹¹Uyo otsienulanga abandu okhurula mutsimbi tsiabwe nende yabo abatsienulwanga bosi bali nende Papa mulala. Niko akachila Yesu narasimba omurwe okhubalanga abaana babwe.

¹²Abool'langa Nyasaye, “Ndakhakambile abaana befwe yako aka wakhola.”

¹³Khandi, aboolanga mbu, “Ndalara lisubila lianje mu Nyasaye.” Khandi “Lole, ise ndi nende abaana aba Nyasaye yali okhumba.”

¹⁴Kho olwa bali abaana, singa abalanganga, bo nabandu bomubili namatsahi, Yesu mwene yali singa mulala khubo, ma nasanga muliiba liabwe liomubili. Yakhola mbwo kho mbu khulwa okhufwa khukhwe amulule Setani oli nobunyali khulufu.

¹⁵Khandi mbu asoole yabo bosi abalinji mubuhambe amatukhu kabwe kosi khulwo okhuria okhufwa.

¹⁶Okhuba kali tooto mbu sibali abamalaika aba yasoola tawe. Nebutswa singa Amahandiko kaboolanga “Yasoola abolwibulo lwa Aburahamu.”

¹⁷Khulwe yako kali akholwe okhufwanana nabaana babwe mutsinjila tsiosi, kho abe Omwesaalisi Omukhongo owetsimbabasi khandi omusubilwa mumulimo kwa Nyasaye okhulekhela abandu ebionono biabwe.

¹⁸Ne luno anyala okhukhonya yabo abatemwanga sichila ye mwene yali okhuteemwa khandi yali okhusalila.