Read lunyore BAHEBURANIA 3 Bible Online

BAHEBURANIA 3 - lunyore bible

BAHEBURANIA 3

¹Khulwe yako, abaana befwe abatsienukhu, abalangwa na Nyasaye, paale khu Yesu owa Nyasaye yaruma mbu abe Omwesaalisi Omukhongo khukobusubili obwa khweyamanga.

²Yali omusubilwa khu Nyasaye owali okhumwahula okhukhola omulimokwe singa obwa Musa yali omusubilwa munzu ya Nyasaye yosi.

³Yesu yali owoluyali olukali oluyomba olwa Musa, singa omwombokhi weinyumba ali noluyali okhuyomba inyumba yene.

⁴(Buli inyumba yombokhwanga nomundu, ne omwombokhi webindu biosi ni Nyasaye).

⁵Musa yali omusubilwa munzu ya Nyasaye yosi singa omurumikhili okhukobokhela akene yako akali okhuboolwa olunyuma.

⁶Naye Kristo yali omusubilwa khunyumba ya Nyasaye singa Omwana wa Nyasaye. Ne niifwe inzuye nikhuba nikhuralila singa abeikholo nyomu nikhweitsoomia mubunayi bwefwe okhwola khusihesi.

⁷Khulwe yako, singa Omwoyo Omutsienukhu aboolanga, “Nimuba nimuhul'la omwoyo kwa Nyasaye leelo,

⁸murabba abakakhamanu mumioyo chienywe, singa abakuka benywe bakhola olwa bakhol'la Nyasaye esikala marwi, singa obwa bali okhukhola mwitukhu yilio musitsiimi olwa bateema Nyasaye.

⁹Yaho abakuka benywe bandeema nibanjela, kata olwa bali nibalolanga ebikhole bianje emihika amakhumi kane.

¹⁰Khulwe yako ndasinyikhila abolwibulo yilwo, nimboola mbu, ‘Amatukhu kosi basiamanga mumioyo, nibarahuchil'la okhumanya tsinjila tsianje tawe.’

¹¹Niko akachila nindetsuba muburima bwanje mbu ‘Sibalenjila mubuhulukhi bwanje tawe!’ ”

¹²Mube abachesi abaana befwe, omundu alekhe okhuba mwinywe kata mulala owomwoyo omubi okubula obusubili okwakhachila narula khu Nyasaye obetsanga mwoyo.

¹³Nebutswa mutsubanenje sielitukhu olwa lisilangwa mbu “Leelo,” mbu omundu arabba mwinywe otinyianga omwoyo khulwo obukaati bwetsimbi tawe.

¹⁴Okhuba ifwe fwesi khumal'le okhukholwa abasanji halala na Kristo nikhuba nikhuralila butinyu okhwola khusihesi okhunaya okhwa khwali n'nakhwo mukhuchiaka.

¹⁵Yaka niko aka Amahandiko kaboolanga, “Muratinyia emioyo chienywe olwa muhulila omwoyokwe leelo tawe singa olwa abakuka benywe bali okhukhola, olwa bakhol'la Nyasaye esikalamarwi.”

¹⁶Bali bandu sina abahul'la omwoyo kwa Nyasaye ne nibakhola esikala marwi? Sibali yabo bosi abarula Misiri nibemel'lwa nende Musa?

¹⁷Kata nibena aba Nyasaye yasinyikhila emihika amakhumi kane? Sibali yabo abali okhukhola tsimbi, abem'bili chiabwe chiafwila musitsiimi?

¹⁸Kata khandi nibena aba yehwabila mbu sibakhenjila mubuhulukhibwe tawe, nibarali abali abesikala marwi?

¹⁹Kho khulolanga mbu okhubula okhusubila khwabwe khwachila nibarenjila musibala esialakwa.