Read lunyore BAHEBURANIA 4 Bible Online

BAHEBURANIA 4 - lunyore bible

BAHEBURANIA 4

¹Luno Nyasaye wakhuha obusubisie mbu khunyoole okhwinjila mubuhuluukhi obwa yakhubool'lakhwo. Khe chende khweyile kalaha mbu omundu wosi khwinywe aralolekha singa oramilwe okhunyoola obuhuluukhi yibwo.

²Ifwe khwahulila Amang'ana Amalahi singa bo bali okhuhul'la amang'ana nebutswa sikabakhonya tawe, sichila olwa bakahul'la sibakahuchil'la nobusubili tawe.

³Ne ifwe abali okhusubila khwinjilanga mubuhuluukhi tsana, singa obwa yaboola mbu, “Singa obwa ndetsuba muburima bwanje, mbu ‘Sibalenjila musibala esiandakhabahelemwo obuhuluukhi tawe.’ ” Yaboola yaka kata nikali mbu emilimochie chiali nichiahwa okhurula olwesibala sialongwa.

⁴Okhuba kaboolwa habundu handi Mumahandiko khukelitukhu eliakhane nakhataru mbu, “Nyasaye yahuluukha khwitukhu liakhane nakhataru okhurula khumilimochie chiosi echia yali nakhol'le.”

⁵Ne khandi habwene yaho yali okhuboola, “Sibalenjila musibala esiobuhuluukhi tawe.”

⁶Yabo abaranga okhuhul'la Amang'ana Amalahi sibainjila mukhuhulukha tsana tawe, sichila sibasubila tawe. Kho baliho abandi abahuchil'lwa okhwinjilamwo.

⁷Yako yamanyibwanga khusifune mbu Nyasaye yaraho litukhu lindi mbu, “Leelo” nabool'la mumunwa kwa Daudi inyuma wamatukhu amenji singa obwa kabooywe mbu: “Nimuba nimuhul'la omwoyo kwa Nyasaye olwaleelo murakakhamana mumioyo chienywe tawe.”

⁸Yoshwa alaba niyaha abandu obuhuluukhi obwa Nyasaye yasubisia, khane Nyasaye siyakhabooyekhwo akelitukhu lindi olunyuma tawe.

⁹Kho okhuhuluukha khwe Sabato khusikaye khubandu ba Nyasaye.

¹⁰Okhuba omundu oba niyenjiiye mubuhulukhi bwa Nyasaye yasubisia, naye alaba nahulukhile khumilimochie, singa obwa Nyasaye yahuluukha khumilimochie.

¹¹Khulwe yako khurekhwo omwoyo okhwinjila mubuhuluukhi tsana, mbu omundu alekhe okhukwa singa abakuka befwe bakwa khulwa okhubula okhusubila.

¹²Ling'ana lia Nyasaye elili mwoyo likholanga emilimo netsingufu. Neliochi okhuyomba olukanga olwetsimbeka tsiombi, ne lifumiranga okhwola okhwabukhania obulamu nende omwoyo kata amafwosi nende obuhali obulimwo khandi neliangu okhumanyilisia amapaalo komwoyo kata nende okhulalila khwokwo.

¹³Sibulaho esilonge siosi esilebisa imbeli wa Nyasaye, biosi bili esiechenye nibibakalwa ebulafu mutsimoni tsie. Ne khumwene uyo niye owakhulisinjila imbeli we akhuboola akobulamu bwefwe kosi.

¹⁴Chende khufumile butinyu obusubili obwa khweyamanga. Okhuba khuli nende Omwesaalisi Omukhongo okhusila owabir'ra mwikulu natsia imbeli wa Nyasaye, naye ni Yesu, Omwana wa Nyasaye.

¹⁵Omwesaalisi wefwe Omukhongo sali uyo oranyala okhutilwa netsimbabasi khulwa obutofu bwefwe tawe. Nowateemwa mumang'ana kosi singa ifwe, nebutswa siyali netsimbi tawe.

¹⁶Khulwe yako khwome ikholo okhwesunda ahembi khundebe yoburuchi yesirenda mbu khunyoole tsimbabasi nende esirenda okhukhukhonya munyinga eya khutakhanga.