Read lunyore BAHEBURANIA 5 Bible Online

BAHEBURANIA 5 - lunyore bible

BAHEBURANIA 5

¹Okhuba sio Omwesaalisi Omukhongo yeelwa okhurula mubandu basie ne yahulwa okhurumikhila Nyasaye khulwa abandu mbu ahinienge ebihanwa nende emisango khulwe tsimbi.

²Anyala okhuba omuhoma khu yabo abaramanyile, nende abakhola obusiamu sichila ye omwene nomutofu mutsinjila tsinyinji.

³Khulwe yako akwan'ne okhukhola emisango khulwe tsimbi tsitsie omwene nende etsia abandu bandi.

⁴Abulaho owebukul'langa oluyali, lwokhulangwa Omwesaalisi Omukhongo. Kali khulwa omulango kwa Nyasaye kwonyene mbu omundu akholwanga Omwesaalisi Omukhongo singa butswa Haruni yali.

⁵Nimbwo khandi kali khu Kristo. Siyaebukul'la omwene oluyali lwokhukholwa Omwesaalisi Omukhongo tawe. Nyasaye niye owamubool'la, “Niwe omwana wanje, Leelo ngwiye Papawo.”

⁶Khandi yaboola mbu habundu handi, “Niwe omwesaalisi inziayo, mumukhosi Melikisedeki.”

⁷Mumatukhu kobulamu bwe musibala, Yesu yali okhusaaya nende okhusaba nalakaya butinyu nende amasika khu Nyasaye owakhanyal'le okhumuhonia okhurula mukhufwa. Ne khulwa mbu yali owokhwetutuyia khandi owokhwehana, Nyasaye yali okhumuhul'la.

⁸Ne kata olwa yali Omwana wa Nyasaye, yeeka okhuba omuhulili munjila yokhusalila.

⁹Olwa yali namal'le okhukholwa omuhesikhu, yakholwa es'sina siobuhonia khu yabo bosi abamuhulilanga.

¹⁰Khandi Nyasaye namukulikha okhuba Omwesaalisi Omukhongo mumukhosi kwa Melikisedeki.

¹¹Khuli namang'ana amenji akokhuboola khwing'ana yili, nebutswa nobutinyu okhumwinoosia sichila simuli abangu okhukamanyilisia tawe.

¹²Mwabeye neinyinga ehela eya mukwana okhuba abebaali luno nebutswa musirunanga omundu okhumwibaal'la ebikha biokhuranga ebiamang'ana ka Nyasaye. Ne obukhala bwokhulia ebiokhulia ebitinyu, musinywetsanga amabeele.

¹³Omundu wosi osinywetsanga amabeele sali omusitsa weling'ana eliobulunjikhi tawe, sichila asili omwana omutoro.

¹⁴Nebutswa ebiokhulia ebitinyu nebiabandu abakhulundu yabo abanyala okhwabukhania amalahi nende amabi; khulwa okhwenasia khwabwe.