Read lunyore BAHEBURANIA 6 Bible Online

BAHEBURANIA 6 - lunyore bible

BAHEBURANIA 6

¹Khulwe yako chende khutsie imbeli khumebaalo kobulamba, khwibil'le amebaalo kobukristo akokhuranga. Sikhukwan'ne khandi khuyabe omuse kwokhwekalukhania okhurula khubikhole ebifu nokwobusubili khu Nyasaye;

²okwa amebaalo kobubaputisi nokhurebwakhwo amakhono; nende akokhusimukusibwa khwabafu, nakokhukhalaka esiina esirahwa tawe.

³Chende khutsie hambeli Nyasaye naba nahuchil'la.

⁴Okhuba sibuli obutoro okhukalusia yabo abali nibasubilakhwo ma nibakwa okhweyama tsimbi tsiabwe khandi tawe. Yabo nabandu abalinji mubulafu, nibatsanzama khusihaanwa sio mwikulu, nibanyoola omukabwa kwabwe okwo Omwoyo Omutsienukhu.

⁵Batsanzama khwing'ana elia Nyasaye nibalilola okhuba lilahi, khandi bamanyilisia obunyali obwe tsinyinga etsitsanga.

⁶Ma balekha obusubili bwabwe sikanyalikha okhukalusia mukhwekalukhania okhurula mutsimbi khandi tawe, sichila abene bamubambanga Omwana wa Nyasaye khumusalapa esiakhabili, nibamusimbia omurwe habulafu.

⁷Nyasaye akasianga liloba elinywetsanga khumatsi keifula ekwitsanga khulio khandi ekhusianga emimela etsikasilanga yabo abalimilwanga.

⁸Nebutswa niliba nilimesianga emisala chiamahwa nende amarakalu, siliba nobukhala bwosi tawe. Liba nilili mubutinyu bwokhunyoola esilamo siobubi okhurula khu Nyasaye ne liakhasambwe mumul'lo.

⁹Nebutswa inywe abalina banje abayanzwa, kata nikhuba nikhuboola mbwo, khuli nokhunaaya okhukali khulwe inywe. Khumanyile mbu mwanyoola tsikhabi tsindahi etsiobuhonia.

¹⁰Nyasaye sali sila obulunji tawe. Siyakhebil'le emilimo chienywe kata nende obuyanzi bwa mwamanyia habulafu khuye mubukhonyi obwa mwahana ma musitsilil'langa okhuhana khubandu ba Nyasaye.

¹¹Nefwe khwekomba mbu siamulala khwinywe amanyienge esinani tsana okhwola khusihesi, ma kho amang'ana kamunayanga khwo kahesikhe.

¹²Murabba abakara, nebutswa mube singa yabo abasubilanga nibesimilisia ma khulwako banyoolanga aka Nyasaye yasubisia.

¹³Olwa Nyasaye yasubisia Aburahamu ling'ana yesuha omwene okhukhola aka yali nasubisisie. Yesuhila eliiralie omwene okhuba siyaliho oundi omuyomba tawe.

¹⁴Yali okhuboola mbu, “Khusubisianga mbu ndakhakhulamile ikhabi ma ndakhuhelesie abetsukhulu abenji.”

¹⁵Aburahamu yali okhwesimilisia, khulwako yanyoola aka Nyasaye yamusubisia.

¹⁶Abandu besuhanga khu uyo oli omukhongo okhubayomba, ne muburambane bwabwe, esiesuho nisio esitinyilisianga ling'ana.

¹⁷Nyasaye yaralisia lisubisiolie nende esiesuho; ne khulwe yako, yamanyia yabo abayasubisia mbu sanyala okhukalukhania lichoomolie tawe.

¹⁸Kho khuli nebindu b'bili yibi mbu lisubisio nende esiesuho ebiranyala okhukalukhana tawe, kata mubiene yibio sikanyalikha khu Nyasaye okhuboola obubehi tawe. Khulwe yako ifwe abelukhila omulembe kukwe, khutinyilisibwanga muno okhuralila mukhunaya yikhwo okhwarebwaho imbeli wefwe.

¹⁹Okhunaya okhwakhuli n'nakhwo nokhuralilu, ne khwinjilanga nikhubir'ra mungubo isinga yomuhekalu yomwikulu okhwola habundu hatsienukhu.

²⁰Yesu yekholel'la okhwinjilamwo khulwefwe ma ye no Omwesaalisi oweinziayo Omukhongo mumukhosi kwa Melikisedeki.