Read lunyore BAHEBURANIA 7 Bible Online

BAHEBURANIA 7 - lunyore bible

BAHEBURANIA 7

¹Melikisedeki owali omuruchi wa Salemu, khandi Omwesaalisi wa Nyasaye Oweikulu Okhusila yali okhwakana nende Aburahamu nachelelanga okhurula mwihe okhwira abaruchi, ma Melikisedeki namulamila ikhabi.

²Ma Aburahamu namukabila esielikhumi khubindu biosi ebia yali n'nabio. (Esifune esiokhuranga esieliira yili Melikisedeki ni “Omuruchi wobulunji” khandi sichila yali Omuruchi wa Salemu, kho es'sina sieliira yili siali “Omuruchi Womulembe.”)

³Siyali na samwana nohomba nyina kata olwibulo tawe. Amatukhuke kabula obuchachilo, obulamubwe bwabula esiakamo. Ne ali singa Omwana wa Nyasaye mbwo; abetsangaho Omwesaalisi inziayo.

⁴Kho luno mulole obwomundu uno ali omukhongo. Aburahamu, kuka wefwe owamanyikha yamuhelesia esielikhumi khubindu biosi ebia yayaaka.

⁵Khwamanya mbu okhulondokhana namalako, abaana ba Lawi abalinji abesaalisi bali nende obalakhuule okhusolola esielikhumi mubandu, eliboolanga mubaana babwe, kata nikali mbu barula khulubeela lwa Aburahamu.

⁶Nebutswa Melikisedeki owolwibulo lulwe lurarula muba Lawi yabukula esielikhumi sia Aburahamu; namulamila ikhabi uyo owa Nyasaye yali niyaha obusubisie.

⁷Ne kamanyikhan'ne obulahi mbu omukhongo niye olamilanga omutututu ikhabi.

⁸Khandi mbu abesaalisi ababukulanga esielikhumi nabandu abafwitsanga, nebutswa yaho Melikisedeki tsana obukulanga esitonye esielikhumi okhurula khu Aburahamu, kaboolekha mbu safwitsanga tawe.

⁹Kata khwakhanyala okhuboola mbu olwa Aburahamu yahaana esielikhumi, kho Lawi (owabaana baabe babukulanga ebitonye bielikhumi) naye khandi yarunga esitonye sielikhumi.

¹⁰Okhuba Lawi yali nasili munda mwa Kukawe Aburahamu olwa Melikisedeki yabukaana n'naye.

¹¹Abandu Baisiraeli bali okhuhebwa amalako okhulondokhana nende obwesaalisi bwa Balawi. Ne luno ngali mbu obwesaalisi bwa Balawi bwali obuhesikhu, nisina esichila omwesaalisi undi abukhe m'mukhosi kwa Melikisedeki narabbal'lwa m'mukhosi kwa Haruni?

¹²Okhuba obwesaalisi nibuba bukalukhana, kho amalako nako okhwola kakalukhane.

¹³Naye Omwami wefwe, owamang'ana yako kaboolwa khwo, yarula mulwibulo lundi, ne omundu wosi siyarula khwo mulwibulo tsana okhurumikha hasimalilo siemisango singa omwesaalisi tawe.

¹⁴Kamanyikha obulahi mbu Omwami wefwe yebulwa mulwibulo lwa Yuda, ne Musa siyaboolakhwo ling'ana liosi khuluyia yilwo halubeka wabesaalisi tawe.

¹⁵Khandi ling'ana lino nelia habulafu okhusila mbu: omwesaalisi undi ofwana Melikisedeki uruliyemwo.

¹⁶Ye siyakholwa omwesaalisi khulwo olwanzilo lwamalako komubili tawe, harali khulwo obunyali bwobulamu oburali nesihesi tawe.

¹⁷Okhuba amahandiko kaboolanga mbu, “Wakhabe omwesaalisi inziayo, okhulonda mumukhosi kwa Melikisedeki.”

¹⁸Lilako liakhale liahinibwaho okhuba liabula tsingufu kata obukhala.

¹⁹Okhuba amalako ka Musa sikakhakhola esindu siosi okhuba esihesikhu tawe. Ne luno okhunaya okhulahi okhusila khwareyweho okhuchilanga nikhwesuta ahembi khu Nyasaye.

²⁰Ne kano sikekhola sila esiesuho sia Nyasaye tawe. Abalala bakholwanga abesaalisi sila esiesuho.

²¹Nebutswa Yesu yakholwa omwesaalisi khulwe esiesuho olwa Nyasaye yamubool'la mbu, “Omwami wesuuhile, ne sialikalukhana, ‘Wakhabe omwesaalisi inziayo.’ ”

²²Okhurula khubwabukhani yibwo, Yesu yekhola omusinji kweindakano eyili indahi okhusila.

²³Obwahukhani bundi ni mbu, abesaalisi bandi yabo bali abenji sichila bafwitsanga ma sibatsilil'langa nemilimo chiabwe tawe.

²⁴Nebutswa Yesu yali nobwesalisi oburakalukhana tawe sichila abetsangaho inziayo.

²⁵Khandi niko akachilanga nanyala okhutsilil'la buli lwosi okhubahonia yabo abesutanga ahembi khu Nyasaye okhubir'ra muye, okhuba abetsanga mwoyo inziayo okhubasaayila.

²⁶Omwesaalisi Omukhongo singa uyo niye okhoyanga mubunyakhani bwefwe. Ye nomutsienukhu, obula esikha, omusiyikhu; owahulwa okhurula mubetsimbi, ne wayemekhwa ikulu okhuyomba likulu liene.

²⁷Ye, siali singa abesaalisi bandi abakhongo tawe, sakwana okhumala emisango khulwe tsimbi tsitsie omwene mbelio, ma kho amale khulwe tsimbi etsiabandu tawe. Okhuba yamala omusango elala olwayehaana omwene.

²⁸Amalako ka Musa karetsangaho abandu nabandu abali abatofu okhuba abesaalisi abakhongo, nebutswa ling'ana liesiesuho yisio elietsa inyuma wamalako liamuraho Omwana owakholwa omuhesikhu inziayo.