Read lunyore BAHEBURANIA 8 Bible Online

BAHEBURANIA 8 - lunyore bible

BAHEBURANIA 8

¹Ling'ana likhongo mumang'ana aka khuboolanga ndielino mbu, khuli nende Omwesaalisi Omukhongo ofwana mbwo, owikhalanga khumukhono omusaatsa kweindebe yoburuchi ya Nyasaye Papa wefwe oli mwikulu.

²Akholanga emilimo chio Omwesaalisi Omukhongo habundu ahatsienukhu okhusila. Habundu tsana neliheema liatooto ne siliayombokhwa nende omundu tawe nebutswa nende Omwami.

³Sio Mwesaalisi Omukhongo arebwangaho okhumuhan'na Nyasaye ebihanwa, nokhumala emisango. Khulwe yako Omwesaalisi wefwe Omukhongo naye akwana abe nende esiahana.

⁴Ne alaba nali musibala khane sali omwesaalisi tawe, okhuba baliho abahaananga ebihanwa yibio okhulondokhana nende amalako.

⁵Oburumikhi bwabwe obwobwesaalisi nomufwano butswa nende esiniini esiebindu ebili mwikulu. Kali singa butswa Musa yamanyibwa olwa yali niyenya okhulomba Liheema. Okhuba yali okhubool'lwa mbu, “Lola olombe ebindu biosi okhulondokhana nende omufwano okwa wamanyibwa khusikulu.”

⁶Nebutswa luno Yesu wahebwa obukhalabani obwobwesaalisi obuli obukhongo okhuyomba obwabwe, singa indakano eya yali okhuloosia hakari wa Nyasaye nende abandube eli indahi okhusila, sichila eli nomusinji kwayo khumasubisio akali amalahi okhusila.

⁷Okhuba indakano yokhuranga elaba neraali nesikha, khane indakano yakhabili siyakhakhol'lwe tawe.

⁸Okhuba Omwami yalola obulemu bwabwe naboola mbu, “Lole amatukhu ketsanga, olwa ndakhalakane indakano imbia, nabandu ba Isiraeli nende aba Yuda.

⁹Indakano yino sieliba singa eyokhuranga eyandalakana nabakuka babwe khwitukhu yilio olwa ndabatiila omukhono nimbemel'la okhurula musibala sie Misiri tawe. Sibaali abasubilwa mundakano yanje tawe. Nase ndamala nimbalekha.

¹⁰Yino niyo indakano eya ndakhakhole nabandu ba Isiraeli m'matukhu aketsanga, Omwami aboola Ndakhare amalako kanje m'makani kabwe, khandi ndikahandika mumioyo chiabwe. Ndakhabe Nyasaye wabwe, nabo bakhabe abandu banje.

¹¹Omundu salebaal'langa owasie kata omundu okhubool'la omwana wabwe mbu, ‘Omumanye Omwami’ tawe. Okhuba balaba nibaamanyile bosi okhurula khumuti okhwola khumukhongo.

¹²Ndibabeela tsimbabasi khutsimbi tsiabwe, khandi kata sinditsul'lakhwo tsimbi tsiabwe tawe.”

¹³Mukhuboola mbwo, Indakano imbia yakhunguyia eyokhuranga; khandi eyili ikhulu ma ikhungu elanguha okhuhwaho.