Read lunyore BAHEBURANIA 9 Bible Online

BAHEBURANIA 9 - lunyore bible

BAHEBURANIA 9

¹Indakano yokhuranga yali namalako akokhwekayakaya nende habundu ahombokhwa nabandu khulwo okhwekayakaya.

²Liheema lialombwa ne hambeli walio halimwo ebihani bietsitaya, nemesa, nemikaati echiahanwanga khu Nyasaye. Habwene yaho halangwa mbu Habundu Ahatsienukhu.

³Ne Inyuma weingubo eyakhabili eyepasia halimwo liheema elialangwa mbu Habundu Hatsienukhu Okhusila.

⁴Mwalimwo esitsu esietsahabu khulwo okhusamba obwali, nende Lisanduku lie Indakano eliafunikhwa etsahabu tsimbeka tsiosi nil'limwo esitobolio sietsahabu nende amana, indabusi ya Haruni eyasebukha, nende orubaho rubili orwahandikwakhwo amalako.

⁵Ikulu we Lisanduku yilio abakerubi boluyali balikhwo okhumanyia obunyali bwa Nyasaye. Khulwe tsimbaha tsiabwe, bafuunikha indebe yetsimbabasi. Ne luno sikhunyala okhwinoosia akebindu yibio biosi tawe.

⁶Kho ebindu yibio biosi nibimal'le okhukaasibwa, abesaalisi benjilenje mwiheema liokhuranga amatukhu kosi, nibakhola akobwesaalisi bwabwe.

⁷Nebutswa Omwesaalisi Omukhongo yenyene niye owenjilanga mwiheema eliakhabili, ne yakholanga mbwo l'lala lwonyene khumuhika. Ne olwa yenjila mwo yabukulanga amatsahi aka yahaananga khulwa ye omwene, khandi khulwe tsimbi tsiabandu bakhola nibaramanyile tawe.

⁸Mwing'ana yilio Omwoyo Omutsienukhu yebaalanga silunjikha mbu olweliheema eliokhuranga lisiliho, kho Injila eyokhwinjila Habundu Hatsienukhu esili okhwikukha.

⁹Ling'ana yili nesifwanani okhukhwibaal'la khunyinga tsia n'nondi. Limanyianga mbu ebihanwa nende emisango ebiahanwanga sibinyala okhukhola omwoyo kwobwekayakayi okhuba habwene tawe,

¹⁰khusifune mbu biali butswa ebiokhulia, nebiokhunywa, nende emilukha chiokhwesiya lukano luno. Yako kosi namalako akom'mbili akali nobunyali okhwola khunyinga eya Nyasaye aliralisia amang'ana amahia.

¹¹Nebutswa Kristo wamala okhwitsa nali singa Omwesaalisi Omukhongo webindu ebilahi ebiamala okhwitsa. Akholanga obukhalabani bubwe mwiheema likhongo eliahabwene elirasimikhwa namakhono tawe, akaboolanga mbu silili eliobulonji bwesibala sino tawe.

¹²Yenjil'la elala Habundu Hatsienukhu Okhusila yaho l'lala lwonyene. Ne siyayinjila nali nende amatsahi aketsimbusi nende ebimoosi tawe, habula namatsahi kaake omwene namal'le okhunyoola obununuli obweinziayo.

¹³Abandu yabo abarali abasiyikhu khulwomulukha basiywanga khulwa okhumiitsa khumibili chiabwe amatsahi ketsimbusi, netsichulukhi, nelikokhe elie ing'ombe emooli.

¹⁴Kho amatsahi ka Kristo sikalasiya emioyo chiefwe okhusila muno? Khulwa Omwoyowe weinziayo, Kristo yehaana omwene omusango khu Nyasaye, sila esikha siosi. Amatsahi kaake kalasiiya emioyo chiefwe okhurula khumilimo chiesifwabwi mbu khurumikhile Nyasaye oli mwoyo.

¹⁵Khusifune yisi Kristo niye oloosinjia indakano imbia khu yabo abalangwa na Nyasaye obulame bwelisubisio oburahwa tawe. Yaka kanyalikha sichila okhufwa khwa Kristo khwanunula abandu okhurula mutsimbi etsia bakhola hasi weindakano yokhuranga.

¹⁶Okhuba aheindakano yobulaame eli, khatimba okhufwa okhwomwene uyo owalaka indakano khumanyikhe habulafu.

¹⁷Okhuba Indakano yobulaame eli nobunyali okhufwa nikhumal'le okhwekhola. Indakano sielikhwo nobunyali bwosi olwa owachilaka asili omulamu tawe.

¹⁸Niko akachila kata indakano eyokhuranga iyio siyahuchil'lwa sila amatsahi tawe.

¹⁹Okhuba olwa Musa yali namal'le okhubool'la abandu bosi buli lilako eliom'malako yabukula amatsahi ketsichulukhi netsimbusi, nende amaatsi ma nakamitsa khusitapu siamalako nende khu bandu bosi narumikhilanga olubinu nende obwoya bwamakondi amakhanyu.

²⁰Musa naboola, mbu “Kano niko amatsahi akaralisianga indakano eya Nyasaye yali okhumulaka mbu muchilonde.”

²¹Khandi yamiitsa mbwo amatsahi khwihema nende khubindu biosi ebiobukhalabani bwobwekayakayi.

²²Okhuba amalako kalakanga mbu ebindu biosi bisiiywe namatsahi, ne okhuraatsa amatsahi nikhuraliho, okhulekhelwa khwetsimbi sikhuliho tawe.

²³Kho khatimba ebifwano biebindu biomwikulu bisiiywe namatsahi tsana. Nebutswa ebindu ebiomwikulu biene okhwola bisiywe nemisango emikufu echiyomba yichio.

²⁴Okhuba Kristo siyayinjila Habundu Hatsienukhu ahombokhwa namakhono kabandu ahafwana likondo eliatooto tawe. Yenjila mwikulu mwene aha alolekha imbeli wa Nyasaye khulwefwe.

²⁵Omwesaalisi Omukhongo wa Bayahudi yenjilanga Habundu Hatsienukhu Okhusila siomuhika namatsahi ketsinyama. Nebutswa Kristo siyayinjila mwo okhwehana hali akhenji tawe.

²⁶Nikakhabeye mbwo khane yasalila halikhenji okhurula mukhulongwa okhwesibala. Nebutswa singa kali, olwa amatukhu kesihesi kali nikolanga, yalolekha l'lala lwonyene khandi olwokhumal'likha mbu ahinieho tsimbi khulwa okhwehana omwene singa omusango.

²⁷Kalakwa mbu abandu bafwe l'lala, ne olunyuma basinjile Imbeli wa Nyasaye okhukhalachilwa esiina.

²⁸Munjila indelwa iyio Kristo yali okhuhanwa l'lala okhulekhela tsimbi tsiabandu abenji, olwakhabili alilolekha ne sikali khulwo okhulekhela tsimbi, nebutswa okhuhonia yabo abamulindil'langa nesinani.