Read lunyore YAKOBO 1 Bible Online

YAKOBO 1 - lunyore bible

YAKOBO 1

¹Ise Yakobo omurumikhili wa Nyasaye nende owo Mwami Yesu Kristo: mbananga amasiesi khubandu ba Nyasaye bosi abali mukhusalanibwa musibala siosi.

²Abaana befwe, mukabale kosi obusangali, olwa mutemwanga namateemo tsimbila lukano lukano.

³Okhuba mumanyile mbu olwa mubir'ranga mumatemo singa yaka mubusubili, munyoolanga obwetinyilisi.

⁴Mukhole akamunyala okhulola mbu obwetinyilisi bwenywe nabwo bumwemel'langa mumang'ana kosi okhuhesia emilimo mbu mube abahesikhu khandi abetsulu oburalemakhwo esindu siosi tawe.

⁵Nebutswa mulala khwinywe naba natakha obuchesi, akwana okhusaaya Nyasaye amuhelesie; sichila Nyasaye ahaananga namakhono amasiro khandi musirenda khu bosi.

⁶Nebutswa olwa osaaya obe nokhusubila sila okhuba na honzoni, sichila uyo oli nende honzoni ali singa ebikubuli biokhunyanza, ebinuywangwa yiyi ne yiyi nibiyilwa nende omuyeka.

⁷Okhuba omundu singa uyo arakanakana n'no yakhatoola esindu khu Mwami tawe,

⁸omundu wetsinimi tsibili, atendeyanga mutsinjila tsitsie tsiosi.

⁹Omukristo oli omubisandu asangale olwa Nyasaye amuchingula,

¹⁰Omukristo omuhinda naye abe nokhusangala olwa Nyasaye amukalusia hasi. Okhuba omuhinda yakharuleho singa obwamu bwomubulimo.

¹¹Eliuba liakhanga nende oluuya lwalio ol'lulu, niliomia ebirakwa; esimuli siabio sibungulukhanga, ne obulahi bwosi bwonekha. Nimbwo omuhinda yakhakhamulukhe olwaba nakholanga emilimo chichie.

¹²Noweikhabi omundu owefwilanga mukhutemwa, okhuba namal'le okhubira mukhuteemwa alahebwa olusimbi lwobulamu olwa Nyasaye yamala okhusubisia khu yabo abamuyanzanga.

¹³Olwo mundu atemwa namatemo singa yaka araboola “Amatemo yaka karul'le khu Nyasaye tawe.” Okhuba Nyasaye sanyala okhuteemwa nende obubi, naye sateemanga omundu wosi tawe.

¹⁴Nebutswa omundu ateemwanga nyinga aba nakhweeselwe nende okhwekomba khukhwe okhubi omwene, naber'rwe n'nakhwo.

¹⁵Ma okhwekomba khubelekhanga nikhwibula tsimbi; ne olwetsimbi tsibetsanga nitsikhomeye tsibulanga olufu.

¹⁶Abaana befwe abandayanza, murakaatwa;

¹⁷siesihanwa esilahi khandi siomukabwa omulahi birulanga mwikulu; siikhanga hasi okhurula khu Nyasaye omulonji wobulafu bwomwikulu orakalukhananga kata singa esiinini esisukhananga tawe.

¹⁸Khulwo okhuyanza khukhwe omwene yakhuleera mubulamu okhubir'ra mwing'ana lilie liatooto, kho khube nobweyangu bwokhuranga mubilonge bibie biosi.

¹⁹Abaana befwe abandayanza, mwitsul'le ling'ana yili! Siomundu abe omwangu okhuhulila, ne arabba omwangu okhuboola, khandi arabba omwangu khwileko tawe.

²⁰Okhuba lileko liomundu silikholanga obulunji bwa Nyasaye tawe.

²¹Khulwe yako murabba abeifwo yesifwabwi nende emilimo emibi tawe. Mwelele khu Nyasaye ma muhuchil'le ling'ana elia simikhanga mumioyo chienywe elinyala okhumuhonia.

²²Murekaatia butswa khulwo okhuhulila butswa ling'ana tawe, harali mulire mubikhole.

²³Omundu ohulilanga ling'ana naralira mubikhole afwanana nomundu owehengelanga musilang'i niyelola singa ali.

²⁴Yelolanga omwene obulahi ne olwarulaho, ne bwangu yilwo yebil'la singa obwafwan'nenje.

²⁵Nebutswa omundu ohengelesianga nesinani mwilako lihesikhu ma elihetsanga abandu obalakhuule, naba owokhulirechelesia narabba omuhulili owibil'langa olwe inyuma, nebutswa naba nalira mubikhole, omwene uyo niye owa Nyasaye alikasia mumilimo chichie.

²⁶Yakhabaho omundu okaalanga mbu ali nomulukha kwa Nyasaye? Naba naralinda ol'limi lulwe omulukhakwe nokwabutswa, yekaatianga omwene.

²⁷Omulukha kwa Nyasaye Papa alolanga okhuba omutsienukhu khandi okwatooto ni yiku: Okhuhendel'la ababisandu nende abakhutsakhali mubutinyu bwabwe, nende okhwelinda okhurula khububatsa bwemusibala.