Read lunyore YAKOBO 2 Bible Online

YAKOBO 2 - lunyore bible

YAKOBO 2

¹Abaana befwe, singa mwasubila mu Mwami Yesu Kristo, Omwami wobukhongo, murabba nebiela khumundu wosi tawe.

²Omundu omuhinda owesiahile ingaka yetsahabu nende tsingubo tsiolukoosi naba niyenjila hakari helibukana lienywe, ne habwene yaho naye yenjile omundu omutakha owebikhile tsingubo tsiamatasi,

³ne nimwakhamanyia oluyali uyo owebikhile tsingubo tsiolukoosi nimumubool'la; “Yikhala habundu holukoosi yaha,” ne nimubool'la omutakha “Ibe sinjila yila;” noho, “Wikhale hasi mubilenje bianje,”

⁴khe muli nebiela hakari wenywe, ne obukhalachi yibwo burulanga khu tsinganakani tsienywe tsimbi.

⁵Hulile abaana befwe, abandayanza! Nyasaye yali okhwela abandu abatakha bomusibala yimu babe abahinda mubusubili nabalamila obwami obwayasubisia yabo abamuyanzanga.

⁶Nebutswa inywe mubachayanga abandu batakha! Sibali abahinda nibo abamuminanga. Sibali nibo bamufuubanga imbeli wabayali bomuse?

⁷Sibali nibo abanyekanga eliira lilahi elia mwali okhuhebwa?

⁸Mwakhaba nimukholanga obulahi nimuba nimuhesinjia lilako likhongo mukosi singa obwa kali okhuhandikwa mu Mahandiko Amatsienukhu; “Omuyanze owasio singa obwa weyanzanga omwene.”

⁹Ne nimuba nimukholanga ebiela mubandu, mukholanga tsimbi, omuse kumufwilanga singa abafunaki bamalako.

¹⁰Omundu wosi ofumila amalako kosi, nebutswa nafunaka elala, omuse kumufwilanga kho nomwoni khukosi.

¹¹Okhuba uyo owaboola “Oraheya tawe,” niye owaboola khandi mbu “Oreera tawe.” Kho noba noraheyanga tawe, ne niwiranga, khe ukwiye omufukuli wamalako.

¹²Kho muboole nimukhola singa abandu abakhakhalachilwa esiina nende lilako elikhukholanga abalakhule.

¹³Okhuba Nyasaye siyakhamubeele tsimbabasi olwa akhalachilanga uyo orabeeleye owasie tsimbabasi. Tsimbabasi tsiyembel'langa obukhalachi bwesiina.

¹⁴Abaana befwe, kali nabukhala sina omundu okhuboola ali nende obusubili ne nabula emilimo? Okhusubila khukhwe khwonyene khwakhanyala okhumuhonia noho?

¹⁵Amwabo nohomba mbotswa naba nali esiechenye, natakha esiokhulia sielitukhu,

¹⁶nibukhala sina obuliho mulala khwinywe namubool'la mbu, “Otsie nomulembe owenywe, osangale ma olie wikure,” sila okhumuhelesia ebindu ebiaba natakhanga khulwo omubili?

¹⁷Kho nimbwo kali nobusubili; nibuba nibuli bwonyene sila ebikhole kho bwafwa.

¹⁸Yee tooto omundu undi alaboola. “Omundu mulala ali nobusubili, ne oundi ali nende emilimo,” likalusio lianje ndielino “Manyiakhwo obwomundu anyala okhuba nobusubili sila emilimo. Nase ndakhakhumanyia obusubili bwanje khulwe emilimo chianje.”

¹⁹Ibe osubilanga mbu aliho Nyasaye mulala yenyene? Okholanga bulahi! Kata ebisieno nabio bisubilanga mbwo khandi nibitechela.

²⁰Omuhingwa ibe, khe siolola mbu obusubili obubula emilimo buli obukhaya?

²¹Kuka wefwe Aburahamu siyalangwa omulunji khulwe emilimo olwa yahaana omwana uwe Isaka khusimalilo siemisango?

²²Khe, mulole, singa obwo obusubili bubwe bwali obwochi halala nende emilimo chichie; obusubili bubwe bwahesikha khulwe emilimo chichie.

²³Amahandiko Amatsienukhu kahesibwa muyako akaboolanga; “Aburahamu yasubila Nyasaye, ne khulwo obusubili bubwe Nyasaye yamuhuchil'la singa omulunji.” Khulwako Aburahamu yalangwa omulina wa Nyasaye.

²⁴Yaho, khe mulole omundu abalwanga okhuba omulunji khulwe emilimo, ne tawe khulwo obusubili bwonyene.

²⁵Ne munjila ndala yiyi nimbwo kali khumusambale Rahabu. Yabalwa omulunji khulwe emilimo chichie, khulwa okhwinjisia abalambuuli ba Isiraeli nende okhubakhonya batsie owabwe okhubir'ra khunjila yindi.

²⁶Khe, singa obwa kali omubili sila omwoyo kwafwa, nimbwo khandi obusubili sila emilimo bwafwa.