Read lunyore YAKOBO 3 Bible Online

YAKOBO 3 - lunyore bible

YAKOBO 3

¹Abaana befwe, abenji khwinywe murabba abebaali tawe, okhuba singa mumanyile, ifwe abebaali khulikhalachilwa hakali okhuyomba abandi.

²Ifwe fwesi khuli abakholanga amabi. Nebutswa nikaba aliho omundu oresiraala mukhukhola khukhwe, khe, uyo niye omundu oli habwene, anyala okhwamiha omubili kukwe kwosi.

³Ifwe khuretsanga ebisambo muminwa chietsisululi mbu tsikhuhulile, ne mbwo khusukhanianga emibili chiatsio chiosi okhutsia aha khwenya.

⁴Nohomba kanil'lekhwo khumeeli, kata olwa eli ikhongo okhusila, ne esundwanga nende omuyeka omululu, enyala okhusukhanibwa nende esichelo esitututu buuli ne etsitsanga hosi ahomusitsa wayo yenya etsie.

⁵Nambwo ol'limi nalwo luli, nesiimo sitititi khumubili ne nilwo ol'li nokhwekhonya amang'ana amenji muno. Paalekhwo obwomutsuru kuli omukhongo kunyala okhusambwa nende omul'lo kwelianda litititi okhusila.

⁶Ol'limi nalwo luli singa omul'lo. Luli esibala sichima esiobusiamu, luli mubiimo biefwe ne luretsanga obulamu bwefwe bwosi mumul'lo okwitsanga okhurula Kehena.

⁷Okhuba omundu anyala okhuruka khandi arukanga ebilonge biosi — tsinyama nabulimo nende amanyonyi kata nende ebimoolanga hasi nende tsisutse.

⁸Nebutswa abulaho omundu wosi onyala okhuruka ol'limi. Ol'limi nesindu esibi ne silurukwangakhwo kata nende omundu mulala tawe; lwayitsulamwo obusungu bwolufu obwiranga.

⁹Khulwa lwo khwitsomianga Omwami khandi Papa; khandi nilwo olwa khulamilanga omundu owalombwa mukhufwana khwa Nyasaye.

¹⁰Okhurula khul'limi l'lala yilwo karulangamwo amang'ana kokhwitsomia nende ebilamo. Abaana befwe, amang'ana yako sikahel'le okhwekhola tawe.

¹¹Sibulaho esitaho silala esirulangamwo amaatsi amelungu nende akechumbi tawe.

¹²Kata abaana befwe, omukhuyu sikunyala okhwama emisabibu kata omusabibu sikunyala okhwama amakhuyu tawe. Ne kata esitaho siamaatsi kechumbi sisinyala okhurulamwo amaatsi amalahi tawe.

¹³Ali hena mwinywe omundu omuchesi khandi oli nokhumanyilisia? Akwana okhumanyia mubulamu bubwe khulwe emilimochie emilahi mubuhoma bwobuchesi.

¹⁴Nebutswa noba noli neisiendekha indulu nende okhwonyonywa khwomubili mumwoyo kukwo, orepaaka ma osiame khubulunji tawe.

¹⁵Obuchesi obwe imbila singa iyi siburulanga mwikulu tawe; nobwesibala, sibuli obwomwoyo tawe habula nobwes'sieno.

¹⁶Aheisiendekha nende obulangu bili, khandi khubetsanga ho nende ingoyani nende obubi bwosi.

¹⁷Nebutswa obuchesi oburulanga ikulu nobusiyikhu olwokhuranga; khandi nobwomulembe, nobuhoma khandi obwokhuyanzisia abandi; buli netsimbabasi tsinyinji khandi bwamanga ebiamo biebikhole ebilahi; sibulimwo nebiela kata obukalama tawe.

¹⁸Ne lichesa liobulunji lirakwanga mumulembe nabandu abaleeranga omulembe.