Read lunyore YAKOBO 4 Bible Online

YAKOBO 4 - lunyore bible

YAKOBO 4

¹Obulwani bwosi nende obulembani mwinywe burulanga hena? Burulanga mukhwonyonywa khwenywe khwokhwenya obwale, okhuli mwilwana mwinywe khasotso.

²Mwekombanga nebutswa simunyoolanga tawe; khulwako mwiranga. Mukhayilwanga ne simunyoolanga; khulwako mulwananga nimusira lihe. Simunyoolanga akamutakhanga tawe sichila simusabanga Nyasaye tawe.

³Ne olwa musabanga simunyoolanga tawe sichila amakani kenywe namabi; musabanga ebindu biokhurumikhila mubwale bwenywe abene.

⁴Inywe abandu abarali abasubilwa! Simumanyile mbu okhuba abalina besibala kamanyianga mbu muli abasuku ba Nyasaye? Omundu wosi owenyanga okhuba omulina wesibala yekholanga omusuku wa Nyasaye.

⁵Murakaala mbu obwatooto sibuli mwihandiko eliboolanga, “Omwoyo owa Nyasaye yara mwifwe, witsuuye nobwekombi obululu.”

⁶Nebutswa esirenda sia Nyasaye ahaananga nesikufuhalu. Singa Amahandiko kaboolanga, “Nyasaye afukulanga abekhonyi, ne ahaananga esirenda khubetutuyi.”

⁷Kho mwelele khu Nyasaye. Musuule Setani, naye alelukha okhurula khwinywe.

⁸Mwesunde ahembi khu Nyasaye naye alesunda ahembi khwinywe. Mweyosie amakhono kenywe, inywe aboni.

⁹Mube nesibeela, mulakaye, nimwekhuula. Mukalukhanie okhutsekha khwenywe khukwe okhulakaya ne okhusangala khwenywe khukwe esibeela!

¹⁰Mwetutuyie imbeli wo Mwami, naye alamuchingula ikulu.

¹¹Murekhal'lane abene khubene tawe, inywe abaana befwe. Omundu wosi owikhal'langa omusubili wasie nohomba okhumukhalachila esiina, al'lomanga obubi khu Malako nakakhalachila esiina. Noba nokhalachila Malako, kho sioba nofumilanga Lilako, nebutswa oba nolikhalachilanga.

¹²Nyasaye yenyene niye ohananga Amalako khandi niye omukhalachi. Ye yenyene anyala okhuhonia nohomba okhumulula. Ibe okaalanga oli sina olwokhalachilanga owasio esiina?

¹³Luno mumbulile, inywe ababoolanga “Olwaleelo nohomba mukamba nakhutsie mwitaala nalebe; aha nakhumenye omuhika mulala ma nakhwinjile mubukhala nakhunyoole amapesa amenji.”

¹⁴Inywe simumanyile kata obwa obulamu bwamukamba nabufwane tawe! Mufwananga omukhosi kwomwosi okutuumanga hatu ma kuhwaho.

¹⁵Aka mukwana okhuboola kali mbu; “Omwami naba nayanza, nakhube mwoyo ma nakhukhole yili nohomba lila.”

¹⁶Nebutswa luno mwekhonyanga, nimwepaaka; okhwepaaka singa yikhwo khwosi nokhubi.

¹⁷Khulwe yako, omundu omanyile akali amalunji okhukhola ne nabula okhukakhola, khuye netsimbi.