Read lunyore YAKOBO 5 Bible Online

YAKOBO 5 - lunyore bible

YAKOBO 5

¹Ne luno inywe abahinda, mumbul'le! Mulakaye nimwekhuula khubutinyu obwitsanga okhumukwila.

²Obuhinda bwenywe bumal'le okhubola ne tsingubo tsienywe tsiliywe namache.

³Etsahabu nende efetsa yenywe elakhupa olukukhu, ne olukukhu tsana nesimanyilo siokhumufukula ne lulalia emibili chienywe singa omul'lo. Mwayebunjikhila abene obuhinda mumatukhu kokhumal'likha kano.

⁴Hulile amekaano kabandu abamukhol'la emilimo chiamakhono sila okhubarunga emirungo chiabwe. Amalakayo ake yabo abamucheselanga ebiokhulia kol'le mumarwi ka Nyasaye, Omwami Wokhunyala Biosi.

⁵Mumenyanga musibala mukhwelakhula nende mubwale. Mwakhomesia emioyo chienywe khulwe litukhu liokhwirwa.

⁶Inywe mukhalachiye abandu abalunji esiina nimubera, nabo sibamwikaliye tawe.

⁷Kho abaana befwe mube abesimilisi okhwola olwa Omwami yakhetse. Lole singa omulimi alindil'langa omukunda kukwe okhwama ebiamo ebilahi. Alindil'langa mukhwesimilisia okhulola ifula yomuhika nende eyesubwe.

⁸Nenywe khandi okhwola mwesimilisie. Mulindil'le nokhunaaya okhukali okhuba Litukhu lio Mwami lili ahembi.

⁹Abaana befwe, muratulane abene khubene tawe, kho mbu Nyasaye abule okhumukhalachila esiina. Omukhalachi wesiina ali ahembi, werechekhele okhulolekha.

¹⁰Abaana befwe, mwitsul'le abaroobi abal'loma muliira lio Mwami. Mubalole singa ebifwanani biokhwefwila mukhwetinyilisia mukhukhupa esibi.

¹¹Khubalanganga abanakhabi sichila befwila. Mwahulila akokhwesimilisia khwa Ayubu, nenywe mumanyile obwo Omwami yamuhelesia kosi akayatakhanga olwe inyuma. Okhuba Omwami ali netsimbabasi nende esirenda esinji.

¹²Okhuyomba kosi, abaana befwe muresuha olwa mukholanga amalakano tawe. Muresuha nelikulu kata esibala nohomba kata nende esindu sindi siosi tawe. Muboole butswa “Yee” olwa muchoomanga okhuboola Yee; khandi “Tawe” olwa muchoomanga okhuboola tawe, ma simwakhenjila mukhukhalachilwa khwa Nyasaye tawe.

¹³Aliho mulala mwinywe oli musibi? Akwana okhusaaya. Aliho osangalanga? Yembe tsinyembo tsiokhwitsoomia.

¹⁴Aliho mulala mwinywe omulwaye? Alange abakhulundu belikanisa bamusaayile nibamutsukhilil'lakhwo amafura muliira lio Mwami.

¹⁵Okhusaaya yikhu okhukhol'lwe mubusubili khulahonia omulwaye, ne Omwami alamubusia okhurula mukhutsunwa, ne naba niyakhola tsimbi alalekhelwa.

¹⁶Khulwe yako mweyame tsimbi tsienywe abene khubene khandi musaayilane abene khubene, ma kho munyoole okhuhona. Okhusaaya khwomundu omulunji khuli nobunyali obukali mutsingufu tsiakhwo.

¹⁷Elija yali omundu weliiba elala singa ifwe khuli, ne yali okhusaaya butinyu mbu ifula erakwa tawe, ne ifula siyakwa khusibala oluhono lwe mihika chitaru nende enusu tawe.

¹⁸Khandi yamala asaaye likulu nilitsukha ifula yalio ma esibala nisiama ebiamo biasio.

¹⁹Abaana befwe, omundu wosi naba narula khwisubila ma oundi namukalusia khwo,

²⁰mwitsul'le mbu uyo okalusianga owetsimbi okhurula mutsinjilatsie tsisiamu alahonia omwoyo kwomundu wetsimbi uyo okhurula khulufu ma yakhachile okhulekhelwa khwetsimbi okhwinji okhubaho.