Read lunyore 1 PETERO 1 Bible Online

1 PETERO 1 - lunyore bible

1 PETERO 1

¹Ise Petero, omurumwa wa Yesu Kristo, mandikanga khubandu abelwa ba Nyasaye abasalaanibwa abamenyanga mubibala biebucheni bianga Ponto, Galatia, Kapadokia, Asia nende Bitsunia.

²Mwali okhwelwa singa Nyasaye Papa yekholel'la okhumumanya, mukhutsienulwa khwo Mwoyo Omutsienukhu mbu mumuhulile Yesu Kristo nokhusaabwa namatsahi kaake. Esirenda nende emilembe bimetekhe khwinywe.

³Khufumie Nyasaye khandi Samwana Omwami wefwe Yesu Kristo. Khulwa mbu mumbabasi tsitsie tsingali wakhuhelesia obulamu obuyia mbu khube nende okhunaya khwobulamu khulwa okhusimukukha khwa Yesu Kristo okhurula mubafu,

⁴ma khunyoole obulame oburononekhanga oburali nesipala, oburanialanga, obwa Nyasaye yabikhila abandu baabe mwikulu.

⁵Inywe mulindwanga nobunyali bwa Nyasaye khulwa okhusubila okhwola khukhuhonibwa okhwerechekhele okhubisulwa mumatukhu akesihesi.

⁶Musangalenje muno khuyako kata nimuba nimubelesibwanga luno amatukhu matututu, mukhutemwa tsimbil'li tsinyinji.

⁷Esifune siokhutemwa nokhumanyia mbu obusubili bwenywe nobwatooto. Kata etsahabu enyala okhwononekha olwe esambwanga mumul'lo; ne obusubili bwenywe obuli bwobukusi obutinyu okhuyomba etsahabu okhwola butemwe kho bube obunyala okhuralila. Ma mulanyoola okhwitsomibwa nende obukhongo nolukoosi Khwitukhu elia Yesu Kristo alilolekha.

⁸Mumuyanzanga kata olwa musili okhumulola, mumusubilanga kata olwa muramulolanga luno. Kho musangalanga nobusangali obukali khandi obwoluyali oburanyala okhuboolekha mumang'ana,

⁹sichila munyoolanga okhuhonibwa khwemioyo chienywe okhuli esifune siobusubili bwenywe muye.

¹⁰Amang'ana akokhuhonibwa yikhwo abaroobi barebelesia nibetsotsa muno, khandi bali okhurooba amang'ana akesirenda esia Nyasaye yakhamubeele inywe.

¹¹Bateema okhurunilisia olweinyinga tsana yakhole khandi obwesirenda tsana siakhetse. Yino niyo inyinga eyo Mwoyo wa Kristo owalinji mubo yabamanyia olwa yekholel'la okhubaribul'la okhusalisibwa khwa Kristo, nende obukhongo obwakhabeho olwe inyuma.

¹²Nyasaye yabisula khubaroobi yabo mbu emilimo chiabwe sichiali khulwo obukhala bwabwe tawe, nebutswa khulwe inywe, singa obwa baboola khumang'ana yako aka mumal'le okhuhul'la okhurula khubarumwa abali okhukamba Amang'ana Amalahi mubunyali bwo Mwoyo Omutsienukhu owarumwa okhurula mwikulu. Amang'ana kene yako abamalaika bekomba okhukamanya.

¹³Khulwe yako murechekhe amapaalo kenywe khulwe emilimo. Mwelinde abene bulahi, mubikhe okhunaya khwenywe habwene khusirenda esia mwakhabelwe Litukhu liokhubisukha khwa Yesu Kristo.

¹⁴Mube abahulili khu Nyasaye ne muralekha obulamu bwenywe bwemel'lwe nende okhwekomba okhubi okhwamwali n'nakhwo khale, mumatukhu akobuhingwa bwenywe tawe.

¹⁵Nebutswa singa Nyasaye owali okhumulanga ali omutsienukhu, nenywe khandi mube abatsienukhu mumang'ana kosi akokhumenya khwenywe.

¹⁶Okhuba Amahandiko kaboolanga: “Mube abatsienukhu; sichila ise ndi omutsienukhu.”

¹⁷Nimuba nimumulanga Papa, omwene uyo okhalachilanga siomundu esiina okhulondokhana nemilimo chichie sila ebiela; kho mumenye obulamu bwenywe musibala esiebucheni sino mukhuhana oluyali khu Nyasaye.

¹⁸Okhuba mumanyile simwanunulwa nende ebindu ebiononekhanga, singa efetsa nohomba etsahabu, okhurula mukhumenya khwenywe okhuli butswa okhwa mwanyoola khubakuka benywe tawe;

¹⁹nebutswa kwali omusango kwa Kristo okhwobukusi obutinyu, owali esimeme esirali nende obulema nohomba esipala tawe.

²⁰Yali niyelwa na Nyasaye esibala nisiralongwa ma nabisulwa mumatukhu kesihesi yaka khulwe inywe.

²¹Okhubir'ra muye musubilanga khu Nyasaye, owali okhumusimukusia okhurula mubafu, namuhelesia obukhongo; khulwako okhusubila khwenywe nende okhunaya khwenywe khube khu Nyasaye.

²²Luno khulwa obuhulili bwenywe khukatooto mwamala okhwesiya abene ma mwayola khusikha siokhuyanza abasubili basienywe, kho muyanzane mubwatooto nemioyo emisiyikhu.

²³Okhuba mwamala okhwibulwa esia khabili, ne simwaibulwa khu imwo ebolanga tawe nebutswa mwaibulwa okhurula khu imwo erabolanga, ne nayo niyo ling'ana lia Nyasaye, elili mwoyo elimenyanga emihika chiosi.

²⁴Amahandiko Amatsienukhu kaboolanga “Abandu bosi bafwitsanga singa obulimo, ne obukhongo bwabwe bufwana obwamu bwobulimo. Obulimo bunialanga ne obwamu bwabwo bubungulukhanga.

²⁵Nebutswa ling'ana lia Nyasaye libetsangaho khasotso.” Nalio nilio ling'ana elia Amang'ana Amalahi akakambwanga khwinywe.