Read lunyore 1 PETERO 2 Bible Online

1 PETERO 2 - lunyore bible

1 PETERO 2

¹Mufuube ehale obubi bwosi, nokhubehelesia khwosi, nende obukalama bwosi, nende okhusiendekha khwosi, nende okhwikhal'la khwosi.

²Mube singa abaana batoro abebuywe, nimwekombanga amabeele akomwoyo akali amasiyikhu mbu olwa mukanywa mukhule n'nako okhwola mukhuhonibwa.

³Inywe mwamala okhumanya obwo Mwami ali omulahi.

⁴Mwitse khu Mwami ouli lichina elili mwoyo eliabandu bali okhusula, nebutswa Nyasaye yali okhuliahula okhuba lilahi khandi eliobukusi obutinyu.

⁵Mwitse singa amachina akalimwoyo ma mwehane okhurumikhilwa mukhwombokha Ehekalu yomwoyo, aha mwakharumikhe singa abesaalisi abatsienukhu, okhukhola emisango chiomwoyo echihuchil'lwanga khu Nyasaye okhubir'ra mu Yesu Kristo.

⁶Okhuba Amang'ana Amatsienukhu kaboolanga mbu, “Lole, retsanga mu Sayuni lichina likali elielwa eliobukusi okhusila. Ne naye osubilanga khuye sialisimbibwa omurwe tawe.”

⁷Kho obukusi buli khwinywe abasubilanga: nebutswa khu yaba abarasubilanga, “Lichina eliabombokhi basuula, Eliene yilio liakwa lichina eliobukhonyi obukali.”

⁸Khandi, Amahandiko Amatsienukhu kaboolanga mbu, “Nelichina liokhwesiraasia, khandi nolwanda lwokhwesikar'rakhwo.” Okhuba besiraalanga sichila sibahulilanga ling'ana yili; ne nilio elia Nyasaye yababikhila okhurula mukhuchiaka.

⁹Nebutswa inywe muli abolwibulo olwelwa, abesaalisi bo Mwami, oluyia olutsienukhu, abandu ababetsanga omwandu kwa Nyasaye omwene, abelwa okhubisula obulahi bwa Nyasaye omwene, owali okhumulanga mbu murule musiilima mwinjile mubulafu bubwe obukali.

¹⁰Inywe abaraali nimuli abandu ba Nyasaye khale, nebutswa luno muli abandu ba Nyasaye; inywe abaraali nimubeelwanga tsimbabasi, nebutswa luno mubeelwanga tsimbabasi.

¹¹Aba ndayanza, muhombelesianga inywe singa abandu abamenyanga musibala siebucheni nende abatisibwa, mwehanye okhwekomba okhubi khwomubili okhuhingananga nende omwoyo.

¹²Ifwo yenywe imbeli wa Betsinzibulo ekwana okhuba indahi okhusila mbu olwa baboola muli abakholi bobubi, babe abanyala okhulola emilimo chienywe emilahi echia mukholanga, ma betsoomia Nyasaye Mwitukhu liokhwitsa khukhwe.

¹³Mwelele khubunyali bwosi obwabandu khulwo Omwami: mwelele khumuruchi wesibala omukali, oli niye omukhongo mubunyali.

¹⁴Khandi khubakafuna[1], abarumwa okhurula khuye babalul'le abakholanga obubi khandi betsoomie abakholanga obulahi.

¹⁵Okhuba obulalilo bwa Nyasaye nimbwo buli, khulwa okhukhola bulahi khusiling'anianga obuhingwa bwabandu abarali nende obuchesi.

¹⁶Mumenye singa abandu abalakhulwa abararumikhilanga okhulakhulwa khwabwe okhuba esifunikho siobubi, nebutswa singa abahambe ba Nyasaye.

¹⁷Muhelesie abandu bosi oluyali, mubayanze abasubili basienywe mumurie Nyasaye, ma muhelesie omuruchi oluyali.

¹⁸Inywe abarumikhi, mwelele khubami benywe nende okhuria khwosi; murelele butswa khubalahi nende khubahoma bonyene tawe, nebutswa khubalulu khandi.

¹⁹Nyasaye alamukasia khwing'ana yili nimuba nimwefwila obusalili bwokhusandibwa okhwa murakwan'ne okhunyoola sichila omwoyo kwenywe kuli khu Nyasaye.

²⁰Okhuba nibukhala sina obwa mwakhanyoola nimuba nimwefwila okhusalila okhwa mukwana okhunyoola khulwa mbu mukholanga obubi? Nebutswa, nyinga mukholanga obulahi, ma musalisibwa, nimwefwila, Nyasaye alamulamila ikhabi khulwako.

²¹Okhuba mwalanjilwa ling'ana yili, sichila Kristo naye yasalisibwa khulwe inywe, namulekhela esilolelo mbu, mulonde mubilenje bibie.

²²Kristo siyakholakhwo tsimbi tawe, ne kata okhubehelesia sikhwanyoolekha mumunwa kukwe tawe.

²³Olwa yanyekwa, siyakalusia amanyeko tawe; olwa yasalisibwa, siyali okhwekhana nebutswa yara okhunaaya khukhwe khwosi khu Nyasaye, omukhalachi wesiina owahabwene.

²⁴Niye owachinga tsimbi tsiefwe mumubili kukwe khumusalapa, kho ifwe, abali nikhwafwa khutsimbi tsiefwe, khumenye mubulunji. Mwahonibwa khulwa okhukhupakwa khukhwe.

²⁵Mwali nimukoranga singa amakondi; nebutswa luno mwakalusibwa khu Mwayi ma khandi Omuhenji wemioyo chienywe.