Read lunyore 1 PETERO 3 Bible Online

1 PETERO 3 - lunyore bible

1 PETERO 3

¹Khandi mbwo, inywe abakhasi, mwelele khubasaatsa benywe abene; kho nibaba nibaliho abasatsa balala abarasubilanga ling'ana lia Nyasaye, bakhanyala okhusubila khulwa okhulola ifwo yenywe indahi. Sikakhamutakha inywe okhubabool'la ling'ana tawe;

²okhuba balalola ifwo yenywe indahi khandi eyoluyali.

³Murarumikhila eng'oono eyesioba eyokhusiira liswi, nohomba eyokhwesiaha etsilulu bietsahabu, nohomba eyetsingubo tsiamwebikhanga tawe.

⁴Habula, eng'oono yenywe ebe eyom'mwoyo mukari mukhwebiikha okhurononekhanga, okhwomwoyo omuhoma khandi omuholelu, okubetsanga okwobukusi obutinyu imbeli wa Nyasaye.

⁵Okhuba abakhasi abatsienukhu abamatukhu ka khale, abanaayanga khu Nyasaye, nimbwo bali okhwesiaha abene, nibelela khubasaatsa babwe.

⁶Sara yali singa mbwo. Yali omuhulili khu Aburahamu, namulanganga omwami. Nenywe muli abakhaana baabe, nimuba nimukhola bulahi, nimurarisibwa nesindu siosi tawe.

⁷Khandi nenywe abasaatsa mumenye nabakhasi benywe mubuchesi, singa obwa kahel'le sichila bo nemibili emitekhele. Mubahelesie oluyali; okhuba bakhanyoole halala n'nenywe obulamu singa esihanwa okhurula khu Nyasaye. Mukhole yaka kho esindu siosi sirekal'la amasaayo kenywe tawe.

⁸Eliokhumal'likha ndielino mbu, mube nokhulalila khulala, abokhubelel'lana, abokhuyanzana singa abaana bomundu mulala, abahoma khandi abokhwetutuyia omundu nende oundi.

⁹Murarungane obubi khububi, nohomba mwararungana amanyeko khumanyeko kandi tawe; nebutswa mubasaayilenje ikhabi; sichila Nyasaye yamulanga inywe mbu munyoole ikhabi.

¹⁰Singa Amahandiko kaboolanga “Oyanzanga okhuba mwoyo, alole amatukhu amalahi okhwola yekal'le ol'limi lulwe khububi, ne omunwa kukwe kuraboola akokhubehelesia tawe.

¹¹Yelukhe okhurula khububi, akhole amalahi; arune emilembe nomwoyokwe kwosi.

¹²Sichila Omwami ahendelanga abalunji, khandi ahulilanga okhusaaya khwabwe; Nebutswa afukulanga abakholanga obubi.”

¹³Naye niwina owakhamusalisia, olwa muli abesinani mukhukhola amalahi?

¹⁴Nebutswa kata nimuba nimusalisibwa khulwa okhukhola obulunji, muli nende ikhabi. Murarisibwa nomundu wosi, nohomba murahendahenda tawe.

¹⁵Nebutswa mukoosie Kristo mumioyo chienywe nimumuhelesia oluyali singa Omwami. Mwerechekhenge okhukalusia khu siomundu omurebanga esifune esiokhunaya khwenywe okhwa muli n'nakhwo, nebutswa mubuhoma nende muburi.

¹⁶Mube namakani amalahi; kho olwa mwinjil'lwanga namang'ana; yabo abanyekanga ifwo yenywe indahi singa abalondi ba Kristo, bakhasimbibwa emirwe chiabwe khu kosi akababoolanga.

¹⁷Okhuba nobulahi okhusila nikaba nikali okobulalilo bwa Nyasaye mbu, musalisibwenje sichila mukholanga obulahi okhuyomba okhusalisibwa sichila mukholanga obubi.

¹⁸Okhuba Kristo yafwila tsimbi l'lala lwonyene ma niluhela, ye owali omulunji khulwa abarali abalunji, mbu akhuleere khu Nyasaye. Yali okhwirwa omubili, nebutswa mumwoyo yakholwa omulamu,

¹⁹ne mubulamubwe bwomwoyo, yatsia okhukambila emioyo echiali mububohe.

²⁰Yichi chialinji emioyo echieyabo abarahulilanga Nyasaye olwa Nyasaye yesimilisianga nalindil'la mumatukhu aka Noa yali nasilombanga esafina. Abandu munane bonyene, bahonibwa okhurula khumatsi.

²¹Akene yaka kali esilolelo esichoomianga khukhubaputisibwa, okhumuhoninjia inywe. Sikali okhusaaba khwesifwabwi siomubili, nebutswa nokhuribula okhwomwoyo omulahi khu Nyasaye. Kamuhonianga okhubir'ra mukhusimukukha khwa Yesu Kristo,

²²owali okhutsia mwikulu ma ali khumukhono musaatsa kwa Nyasaye, ne abamalaika nende abakali nende abaruchi belelanga khuye.