Read lunyore 1 PETERO 4 Bible Online

1 PETERO 4 - lunyore bible

1 PETERO 4

¹Khulwa mbu Kristo yasalila mumubili kukwe, nenywe khandi mwetinyilisie nokhulalila khwene yikhwo; okhuba uyu owasalilanga mumubili kukwe wayabukhana nende tsimbi.

²Okhurula luno amatukhu kosi akamusili n'nako mumubili muratsitsachil'la okhumenya mukhwekomba khwabandu tawe, nebutswa mumenye mukhulalila khwa Nyasaye.

³Okhuba amatukhu akabira kole yaho khulwo okhukhola aka Betsimbia balalilanga, nokhuchenda mubusoti, mukhwonyonywa mukhukholwa, mukhutongoola, nende okhunywa khusirebe, nende okhwekayakaya emisambwa echili es'sinyo khu Nyasaye.

⁴Luno abandu abaramumanya Nyasaye bahukanga sichila sibalolanga nimuchenda halala n'nabo okhwola khubulangu bwokhukhola khwabwe tawe, ma kho bamwikhal'langa:

⁵Nebutswa bakhasinjile imbeli wa Nyasaye okhuboola yako kosi abene khuye owerechekha okhukhalachila esiina abali mwoyo nende abafwa.

⁶Niko akachila Amang'ana Amalahi nikakambilwa kata abafwa, mbu bakhalachilwe esiina singa abandu abali mumubili, nebutswa bamenye mumioyo chiabwe singa Nyasaye alalilanga.

⁷Esihesi siebindu biosi sili ahembi. Mube nokhwelinda kho mube abanyala okhusaaya.

⁸Okhuyomba kosi muyanzane abene khubene mubwatooto sichila obuyanzi bufuunikhanga tsimbi tsinyinji.

⁹Mwinjisie abasienywe mutsingo tsienywe sila okhwelakayil'la.

¹⁰Singa obwa siomundu yali okhuhebwa esihanwa, asirumikhilenje mu inywe abene, singa abalindi abalahi abesirenda sia Nyasaye esikali.

¹¹Omundu wosi okambanga, okhwola akambe amang'ana ka Nyasaye; omundu wosi orumikhanga, okhwola arumikhe mutsingufu tsia yahebwa na Nyasaye kho mumang'ana kosi oluyali luhanwe khu Nyasaye okhubir'ra mu Kristo Yesu, niye oli nende obukhongo nende okhwamiha emihika nemihika. Amina.

¹²Aba ndayanza, murahuke khukhuteemwa okhululu okhwa musalilanga, singa neling'ana licheni eliekholanga khwinywe tawe.

¹³Nebutswa musangale mbu muli abasanji bokhusalisibwa khwa Kristo, kho obusangali bwenywe bwakhameetekha olwo obukhongo bubwe bwakhabisulwe.

¹⁴Nimuba nimuchaaywanga khulwe eliira lia Kristo, muli neikhabi; sichila Omwoyo wobukhongo wa Nyasaye amenyanga mwinywe.

¹⁵Omundu khwinywe arasalisibwa singa omwiri wabandu, nohomba singa omwibi, nohomba singa omukholi wobubi, nohomba singa omusemi mumang'ana kabandu bandi tawe.

¹⁶Nebutswa omundu naba nasalisibwa singa omukristo, arasimba omurwe tawe; nebutswa yetsoomie Nyasaye mbu nomukristo.

¹⁷Litukhu liol'le eliokhukhalaka esiina, ne silachiaka nabandu ba Nyasaye. Ne nikaba esiina siranjila khwifwe, kho kakhabe mbwena mukhumal'likha khwabandu yabo abarasubilanga amang'ana ka Nyasaye?

¹⁸Singa Amahandiko Amatsienukhu kaboolanga mbu, “Nobutinyu abandu abalunji okhuhonibwa, kho kakhabe mbwena khubandu betsimbi abararia Nyasaye?”

¹⁹Khusifune yisi yaba abasalisibwanga singa obwa Nyasaye alalilanga babiikhe emioyo chiabwe mukhukhola obulahi khumulombi obetsanga omusubilwa okhuhesia lisubisio lilie.